FOLKETINGIMI OQAATSINIK ATUINEQ
IA Aki-Matildamut tapersiivoq
- Folketingimi kalallisut oqaasilik immikkoortinneqassanngilaq, IA-p Inatsisartuni gruppianit Folketingip Siulittaasoqarfiannut isornartorsiuinertik taamak aallarniuserpaat.
- Kikkut tamat qineqqusaarsinnaatitaapput, tamat oqartussaanerup aqqani, oqaatsit tunngavingalugit immikkoortitsineq tassaavoq nunasiaateqarsimanermit ileqqut pigiliutiinnakkanik immikkoortitsinermik tunngaveqarluni politikkeqartarnerup ersiutaa, Mariane Paviasen Jensen (IA) tikkuaavoq.
Assiliisoq: Leiff Josefsen
Folketingimi ilaasortaq Aki-Matilda Høegh-Dam (Siumut) Folketingimi ataatsimiinnerit kingulliit arlallit ingerlanerini oqaatsinik nammineq inunnguutsiminik atuisinnaajumalluni piumasaqarsimavoq.
Folketingimi siulittaasoqarfiat periarfissarsiuussinerannik tamanna kinguneqarpoq, aammalu 67.000 koruuninik qaammammut nutserisarnermut atugassatut tapiissutit ilaneqarlutik, piumasaqaatigineqarluni Folketingimi ilaasortat qallunaatut oqalunngitsut namminneq oqaasiisa nutserneqartut agguaatsittassagaat.
Kisianni Aki-Matilda Høegh-Dam piumasaqarpoq, qallunaatut oqalunngitsut Folketingimi toqqaannartumik nutserinermi atortorissaarutit atorneqarnissaat periarfissiissutigineqassasoq.
Apeqqut pillugu ineriartorneq tassaavoq, Folketingip siulittaasoqarfiannit aalajangiunneqarmat Folketingimi ilaasortanut, qallunaatut oqaatsinik atuinatik oqalugiaateqartunut apeqqutinik saqqummiisoqassanngitsoq.
IA-kkut kissaammersimaqisut erseqqissumik paasisaqarusupput
- Kunngeqearfik Danmarkip tunngaviusumik
inatsisaanni tamat oqartussaaqataanerat tunngaviit pingaartut ilagaat. Taamaakkaluartoq
Folketingimi nunatsinnit ilaasortaasoq kalaallisut saqqummiussisussaq
aperineqarsinnaatitaassanngitsoq Folketingip siulittaasuata nalunaarutigaa,
taamatut aalajangersaaneq akuerineqarsinnaanngilaq, IA-p politikkikkut oqaaseqartartua Mariane Paviasen Jensen nalunaarumminni erseqqissaavoq.
Taassuma ilanngullugu erseqqissaatigaa kikkut tamat qineqqusaarsinnaatitaasut,
tamat oqartussaanerup aqqani, oqaatsit tunngavingalugit immikkoortitsineq IA-p isumaa naapertorlugu tassaaneragaavoq nunasiaateqarsimanermit ileqqut pigiliutiinnakkanik
immikkoortitsinermik tunngaveqarluni politikkeqartarnerup ersiutaa.
- Folketingip siulittaasoqarfiata
aalajangernera taamaattoq imaannaanngilaq, taamaattumillu Inuit Ataqatigiinni
isumaqarpugut pissutsit taamaarusaaginnarsinnaajunnaartut
alloriartoqaqqittariaqalerneranullu ersiutaasoq.
- Folketingimi ilaasortaqarnerup nunatsinniit
aallartitaqartarneq Folketingip akuerinngippagu ersarissumik
nalunaaruteqarnissaat piumasaraarput. Danskillu inatsisaat tunngaviusoq taava taamaalilluni.allanngortissallugu
suliassaalersimassaaq, taamak naggasiivoq Mariane Paviasen Jensen (IA).
