IA Trump pissutigalugu nunanut allanut politikkimik nutaamik piumasaqartoq
Nunarsuarmi pissutsit allanngorput, USA-millu siorasaarinerit pissutigalugit iligisanut tunngatillugu allatut isiginnittaaseqartariaqartugut Inuit Ataqatigiit isumaqarput.
Inatsisartuts nunanut allanut sillimaniarnermullu politikkimut ataatsimiititaliaata siulittaasua, Pipaluk Lynge (IA).
Assi: Jensine Berthelsen
Inuit Ataqatigiit sinnerlugit Inatsisartuni ilaasortat taamatut isumaqarput. Taakku tusagassiuutinut nalunaarummi Naalakkersuisut kajumissaarlugit partiit peqatigalugit periusissiaq ingerlaannaq nutarterneqassasoq kaammattuutigaat.
Periusissiaq taanna 2024-mi suliarineqarpoq, ukiulli ataatsip qaangiunnerani piffissamut naleqqutikkunnaareersimallu.
- Nunatta oqartussaaffigilerneqarnissaanik tiguarneqarnissaanillu sioorasaarinissaq sioqqugu, imaluunniit Trumpip USA allisikkusullugu kissaateqarnini saqqummiutinngikkallarmagu periusissiaq atsiorneqarnikuuvoq. Aamma partiit ilarpassuisa qineqqusaarnermi nunanut allanut politikiminnik allannguisimasut isumaqarpunga, tassami ilitsinniit sioorasaarneqarnissaq ilimasuffiginnginnatsigu. Taamaammat allanngortittariaqarpoq, Inuit Ataqatigiit Inatsisartuni gruppiannit Pipaluk Lynge oqarpoq.
USA-p præsidentiata Donald Trumpip ukiup nikinneraniilli Kalaallit Nunaata oqartussaaffigineqarnera pillugu oqaasii sakkortusiartuinnarput. Kalaallit Nunaanni kilitsissiaqanerulernissamik USA-mi pilersaarusiortoqartoq amerikami aviisip Wall Street Journalip sapaatit akunnerisa siuliani aamma allaaseraa.
Taamaattumik IA-p nunanut allanut politikki nutaamik periusissiorneqarnissaa kissaatigineqarpoq.
- Maannakkut pissutsinut naleqqussartariaqarpugut, Pipaluk Lynge oqarpoq.
Suleqatigiit inissisimaffii allaanngortut
Kalaallit Nunaata Europamut attaveqarnera nukittorsarneqartariaqartoq Naalakkersuisut siulittaasuata Jens-Frederik Nielsenip (D) USA-mit oqariartuutigineqartartut pissutigalugit arlaleriarluni oqaatigaa. Tamanna Pipaluk Lyngep tapersersorpaa Europamuk suleqateqarnerup eqqarsaatigalugu qanoq isumaqartoqarnersoq ersarissumik oqariartuutigineqarsinnaasoq taanna isumaqarpoq.
Suleqatigiinneq aqqutissaasoq taanna oqarpoq.
- Sioorasaarineq tamanna akiortariaqarparput nunallu allat oqaloqatigisariaqarlugillu suleqatigisariaqarlugit.
Qinigaaffimmi kingullermi IA-p Siumullu naalakkersuisooqatigiinneranni inatsisiliarineqartunut akerliusumik USA piffissami matumani inatsisiliortarlunilu peqqussutiliortartoq taassuma tikkuarpaa. Soorlu assigiinngisitsinnginnissaq pillugu inatsit assersuutigalugu.
- Assigiinngisitaarneq tapersersorlugu, namminiilivinnissaq sulissutigalugu, aammali maannakkut suleqatigiit akornanni allanngortoqarnera pissutaalluni suleqatigiinneq pitsanngorsarusullugu Kalaallit Nunaat ersarissumik paasiuminartumillu avammut oqariartuuteqartoq isumaqarpunga, Pipaluk Lynge oqarpoq.
Pipaluk Lynge Inatsisartuni nunanut allanut sillimaniarnermullu ataatsimiititaliami aamma siulittaasuuvoq.
