ULLOQ UNNUARLU NALUNAARUSIAQ
Ikuallatsitsineq, angallat kivisoq aqqaneq-marlunnillu ukiulik umiatsiamik aallarussisimasoq naammattoorneqartoq
Ulloq unnuarlu kingulleq ikuallatsitsisoqarsimavoq angallatillu kivinerata kingorna uuliamik mingutsitsisoqarluni.
Assiliisoq: Leiff Josefsen
Kalaallit Nunaanni Politiit ullormut nalunaarusiaanni arlalitsigut pisoqarsimasoq pigaartut pisortaat Jeppe Andsager Sermitsiamut ataasinngornermi ullaakkut ilisimatitsivoq.
Sapaammi ullup-qeqqariitsiartoq nal. 12.43 Nuummi Timersortarfissuarmi containeri ikuallattoq nalunaarutigineqarpoq.
Pigaartut pisortaat oqarpoq ikuallatsitsisoqarsimassasoq, videomi takuneqarsinnaammat inuusuttut pingasut qulingiluat aqqaneq-marlullu akornanni ukiullit ikuallatsitsisut.
Politiit pisumut ilisimannittut takunnissimasulluunniit tusarfigerusuppaat. Oqarasuaammut uunga sianertoqarsinnaavoq: 70 14 48.
Qatserisartut ikuallattumut ornigupput, apunnerannili ikuallattoq pizzarniarfimmi sulisunit qaminneqareersimavoq. Ikuallattoq qaminniarlugu iliuuseqapallannertik pillugu qatserisartut pisortaannit nersualaarneqarput, taassumalu aamma erseqqissarpaa ajoqusertoqarsimanngitsoq.
Angallat kivisoq
Politiit sapaammi nalunaaquttap-akunnera ataaseq qaangiuttoq umiarsuaq anginngitsoq Aasiaat eqqaanni nunaqarfiup Akunnaap eqqaani kivisimasoqnalu naarfigineqarput.
- Umiarsuaq kisaqqasimavoq kitsallu allunaasartaa kittorarsimalluni, Jeppe Andsager oqarpoq.
Angallat inuttaqanngilaq, angallalli uuliakoormat oqartussaasut ornigupput.
Qatserisartut uuliakoorfik ornippaat puttasunillu aassiaqusersorlugu, ataasinngornermilu sumiiffimmukaqqissapput.
Ilinniarfimmut isertoqartoq umiatsiamullu tillinniartoqarluni
Ataasinngornerup unnuaani nal. 01.46 Nuummi peqqissaasutut ilinniarfimmut tillinniartoqarsimasoq pigaartut pisortaat aamma oqarpoq. Ilinniarfimmi kalerrisaarut aallartippoq matulu ammarneqarluni, kisianni tillinneqartoqarsimanngilaq.
Umiatsiaq Limbo aallarunneqarsimasoq ataasinngornermi ullaakkut nalunaaqutaq 05.25 politiit aamma nalunaarfigineqarput.
Umiatsiamik piginnittup nukappiaqqat marlunnik naammattoorpai, nukappiaqqallu aappaa qimaasimavoq aappaalu aqqaneq-marlunnik ukiulik politiit tikiunnissaata tungaanut paarineqarluni.
Nukappiaqqat taakku marluk umiatsiaaqqamik angalareersimapput, umiatsiamillu piginnittup talinneranni naapippai.
Nukappiaraq aqqaneq-marlunnik ukiulik isumaginninnermut oqartussaasunut tunniunneqartoq pigaartut pisortaat oqarpoq.
