Nuummut tikillatsiarneq
akunnernik sisamanik minutsinilu 33-inik sivisussuseqartoq pillugu
Kalaallit Nunaat nunarsuarmi tusagassiorfinnit nunani tamalaani
politikkimik sulialinniillu sammineqangaatsiarpoq.
Inuttaata
Donald Trump Jr.-ip pisortatiguunngitsumik namminerli inuttut
kalaaleq Make America Great Again-imik (MAGA, Amerika
ingerlallualeqqilli, aaqq.) tapersersuisoq Jørgen Boassen
naapinniarlugulu inuit aqqusinermi naapitani oqarloqatiginiarai,
Trumpip suliniaqatigiivi inuinnaallu sunniiniarlutik suliniuteqartut
oqariartuutitik siammarterlugit ulappupput.
Nammineerlunga inuttut sunngiffiga atorlugu maanngarpunga, Trump Jr. timmisartoqarfimmi tusagassiortunut oqarpoq.
Ataataa
Donald Trump, januaarip 20-ani USA-p præsidentiisa 47-ssaattut
ivertinneqartussaq,
ernermi
Trump Jr-ip Nuummiinnerata nalaani Mar-a-Lagomi tusagassiortunik
katersuutitsivoq. Tassani Danmarkip Kalaallit Nunaat USA-mut
tunniunnianngippagu qallunaat nioqquttaasa immikkut ittumik
akitsuusernerisigut Danmark aningaasaqarnikkut tatissinnaallugu
eqqarsaatigalugu saqqummiuppaa.
Trumpip
Kalaallit Nunaannik piserusunnermini ”USA-p nunatut
isumannaatsuunissaa nunarsuarmilu eqqissineq qulakkeerniarlugu
Kalaallit Nunaata pigalugulu aqunnissaa pisariaqarluinnartoq”
peqqutigalugu nittartakkatigut inuit naapittarfiatigut Truth
Socialikkut decembarimi saqqummiuppaa.
Trumpip
suliniaqatigiiffiani sulisut erniusup Nuummut tikinnissaanut
piareersarluarsimapput. Ulloq ataaseq sioqqullugu tikikkamik
Nuummiunut teqqialinnik MAGA-mik allassimasulinnik tunioraallutillu
inuit USA-p Kalaallit Nunaannik pisinissaanik Trumpimut
isumaqataallutik tuluttut oqaaseqartut videoliareriarlugit
nittartakkatigut inuit naapittarfianni Truth Socialimi aamma
siammartersimavaat.
Maga-mik
tapersersuisoq tikilluaqqusisoq
”Yeaah”,
Trumpip nammineq timmisartuutaa – Boeing 757 Trump Force One-imik
taaguuteqartoq Nuup nunanut tamalaanut mittarfianut nal. 11.00 mimmat
inuit, ilaat MAGA-mik allasismasulimmik teqqiaqartut, suaarput.
Inuttaa,
inuusuttut Amerikamiut konservativit Trumpimik tapersersuisut „Trump
Force One“-mik allassimasulimmik kavaajallit ilagalugit tikittoq,
timmisartoqarfimmi inuit alapernaappaat. Taakkua ilagaat Charlie
Kirk, podcastimik „Turning Point USA“-mik pilersitsisoq,
taassumalu assiliisuisa angalanerata ilaa immiuppaat, maannalu inuit
attaveqaqatigiittarfiini videoliatut oqaloqatigiillunilu
aallakaatitassiatut siammarterneqassaaq.
Maga-mik
tapersersuisoq Jørgen Boassen Nuummeersoq, Donald Trumpimut
qinersisissarsiorluni novembarimi angerlarsimaffinnut
kasuttoqattaarnikoq, qaqortumik annoraalerluni siuttuuvoq:
- Præsidentinngortussap Kalaallit Nunaat soqutigigamiuk ernini angajulleq piareersaatinik suliakkertuaannarpaa. Taassuma manna qanoq innersoq alakkarlugu maanna tikippoq. Massakkullu suleqatigiinnissaq piareersassavarput. Kalaallit USA-mik toqqaannartumik suleqateqarsinnaanissaminnut niueqateqarsinnaanissaminnullu periarfissaqassapput, Jørgen Boassen oqarpoq, maannalu Donald Trumpip Kalaallit Nunaat aappassaanik nunarsuarmi tusaamaneqalersikkaa ikasarluni oqaatigaa.
- Kalaallit Nunaata nittarsaannissaanut maanna Visit Greenland pisariaqartinngilarput, Jørgen Boassen, ullormut takornariartitsisuusoq, oqarpoq.
Jørgen Boassen Donald Trumpip
januaarip 20-ani præsidentit 47-ssaattut ivertinneqarnissaani
peqataanissaminut qaaqqusaavoq.
Donald Trump tapersersortuaannariga nalunnginnamikku præsidentitut ivertinneqarnissaanut qaaqqussallunga pilersaarput. Nuannerpoq pissanganarlunilu, Jørgen Boassen, ataasinngorpat USA-liarluni aallartussaq, oqarpoq.
Naalakkersuisut
aamma Trump Jr.
Naalakkersuisuni
siulittaasoq Múte Bourup Egede (IA) aamma Aningaasaqarnermut
Akileraartarnermullu Naalakkersuisoq Erik Jensen (S) Trump Force One
Nuummut tikimmat Danmarkiliarniarlutik aallartussat
utaqqisarfianniipput.
Taakku
Donald Trump jr. tikittut utaqqisarfiannut iserniariartoq
tungaanukarput. Naalakkersuisut præsidentinngortussap ernera
nunatsinniinnerata nalaani naapittussaanagu siumungaaq
nalunaarutigereeraluarlugu Trump Jr.-ip tikilluaqqunissaanut
oqaloqatiginissaanullu periarfissaqarsimanersut ilisimaneqanngilaq.
Uagut
siunissarput nammineq suliassaraarput
Naalakkersuisusuni
siulittaasup Múte Bourup Egedep Kalaallit Nunaat kalaallit pigigaat
uteqqissallugu Kangerlussarmut aqqusaarnermini piffissaqarfigaa.
“Uteqqillara
- Kalaallit Nunaat kalaallit pigaat. Inuiattut siunissarput
naalagaafinngornissarpullu, uagut nammineq ilutsinni suliassaraarput.
Danskit, amerikamiut allarpassuillu isumaqarsinnaapput,
uisakajaartunulli sunnertinnata, nammineerluta allanillu
tikkuartuigata isumatusaartumik siunissarput pillugu
aalajangiissaagut. Inuiattut pisinnaatitaaffigut pisussaaffigullu
atorlugit ingerlarsussaagut, sapinngilagut aamma suleqateqarluta”,
marlunngormat Facebookimi allappoq.
Nuummiut ullup-qeqqasioqatigigai
Tikittut
mittarfimmiit Hans Egedep eqqaassutissaanukarput, tassani Trump Jr.
oqarasuaatini angallattagaq atorlugu videoliornissaminut
piffissaqarami ajoqersuiartortup Hans Egedep 1721-mi Nuummut
tikissimanera, taassuma Nuutoqqami illu sungaartoq aappaluttortalik
illorigaa, nikorfaffigisamilu isikkiviginnersua oqaluttuaraa.
- Siorna upernaakkut maanngartussaanikuugaluarpunga, nunatsinnili qineqqusaarneq allallu pimmata maanngarnissara taamaatiinnartariaqarnikuuara. Ataatama timmisartuutaa atorlugu maanngaraanni sivikinnerulaassaaq. Timmisartuussisartunut ilaagaanni ullut pingasut maanga ullullu pingasut utimut angalanermut atorneqassapput, tamannalu piffissaqarfigivallaarsimanngilara. Kingusinnerusukkut maanngaqqikkusuppunga, umimmanniarusullungalu, Trump Jr. Hotel Hans Egedemut ullup-qeqqasioriartorluni ingerlaqqinnginnermini oqarpoq.
Nuummi
innuttaasut Brugsenimut niuerniartut namminneq akiliinatik Donald
Trump Jr. Hotel Hans Egedemi ullup-qeqqasioqatigissallugu
qaaqqusaapput. Tassani ilassinissaanut periarfissaqarlutillu,
teqqialinnik MAGA-mik allassimasulimmik tunisillutillu
nerianiartarfimmi susoqarsimanersoq oqaaseqaqqusaanatik
ilitsersuunneqarput.
Ullup-qeqqasiorlutalu kaffisorpugut, taavalu USA Donald Trumpilu pillugit qanoq isumaqarnersugut apersorneqarpugut. Tassaniinnitsinni Donald Trump Jr. attaveqaatitigut ataatani isigalugu oqaluuppaa, ataatatalu ilassivaatigut, qaaqqusaasut marluk MAGA-mik allassimasulinnik teqqialerlutik akunnittarfiup isaariaaniit anillakkamik oqaluttuarput.
- Atorfikkaat nunanit allaneersut allatut naapippagut. Uagut inuinnaasugut qaqutigorujussuaq taamatut pineqartarpugut, neriniartarfimmilu kusanartumi nerisassanik illinnasaakkanik kaffimillu sassaalliipput. Tamanna siornatigut misiginikuunngilarput, innuttaasoq kinaassutsiminik oqaatiginnikkumanngitsoq præsidentip erneralu assiliseqatigiissimanerminnik takutitsisoq oqarpoq.
Assiliisut
tusagassiortullu arlallit akunnittarfiup isaariaani katersuupput,
ullup-qeqqasioqatigiinnermut isertoqaqqusaanngilaq, Donald Trump
Jr.-illi Nuummi innuttaasut naapinneri nuannaarutigalugit oqarpoq.
- Inunnik naapitsineq nuanneqaaq, inuillu naapissalluta nuannaraatigut. Naapinnerat ataqqinaataavoq.
Ataata
maanngartariaqassaaq
Donald
Trump Jr.-ip, Charlie Kirk-ip assiliisullu Nuummi innuttaasut
nalunaaquttap akunnerini marlussunni ullup-qeqqasioqatigereerlugit
Qilakitsormiut paniinnarnikut Nunatta Katersugaasivianut alakkarpaat.
Tassani
assiliisut eriagisassat, soorlu Umiaq, Qajaq uumasullu
assigiinngitsut piniarneqartartut amii takuniarlugit arlalinnik
immiussipput.
- Inuit Alaskamiittut Kalaallit Nunaanniittullu assigiingajannik oqaaseqaramik immikkoortikkuminaassinnaapput. Siornatigut ataqatigiinnerunikuullutillu Sibiriamiit Beringip Kangerliumarnga ikaareeramikku kangimut siaruaapput, Donald Trump jr. Charlie Kirk-imut assiliisunullu katersugaasivimmi malinnaasunut oqarpoq.
Kalaallit
Nunaat tikillugu qanoq ippa?
- Torrappoq, uteqqittariaqarlungalu tulliani pinngortitami piniarusuppunga, Donald Trump Jr. Sermitsiamut oqarpoq, taakkulu apereqqipput.
Ataatavit tikeraarnissaa piareersarpiuk?
Ullut ilaanni maanngartariaqassagunarpoq. Maanngassappat qanoq isumaqassanersoq paasiumaarparput. Maanngarusussasoq qularinngilara, Donald Trump Junior, nalunaaquttap akunneri sisamat minutsillu 33-it Nuummeereerluni USA-mut utertoq, oqarpoq.
