Ilaqutariittut inuunerup sorsuutiginera

Angerlarsimaffiup avataanut inissinneqartartut ukiuni qulikkaani kingullerni amerliartorsimapput, ullumikkullu Kalaallit Nunaanni meeqqat 4,5 procentiisa missaat inissinneqarsimapput. 

Kisitsit annikillisinneqassasoq meeqqanut, inuusuttunut ilaqutariinnullu naalakkersuisuusimasoq Mimi Karlsen (IA) 2022-mi iliuusissatut pilersaarummik saqqummiussigami oqarpoq. Iliusissatut pilersaarummi meeqqat ikinnerit inissinneqarsimassasut 2030-mi anguniarneqarpoq. 

Tamanna angajoqqaat ilaatigut tapersersornerisigut ilaqutariinnilu pinaveersaartitsinermik annertunerusumik suliaqarnikkut pissaaq. Kommunini tallimani tamani ilaqutariit atugarliortut najugaqarfissaannik peqalernissaa iliuusissatut pilersaarummi suliniutit ilagaat.

Nuummi Kuserneq naartusunut ilaqutariinnullu mikisunik meeralinnut, angajoqqaatut imminut napatissinnaajumallutik tapersersorneqarnissamik sakkussanillu pisariaqartitsisunut, najugaqarnissamut katsorsartinnermullu neqeroorutaavoq. Kusernermi inissiat aqqanillit ilaanni Seqininnguaq Eugenius 33-nik ukiulik erneralu Aputsiaq sisamanik qaammatilik najugaqarpoq. Seqininnguaq Eugenius siorna inuunermini piffissami eqqissiviilliorfiusumi inissiani annaagamiuk angerlarsimaffeeruppoq.

- Uippakajaarnartorujussuuvoq, ingammik angerlarsimaffeqanngitsuunikuunngisaannarlunga. Ullut tamaasa unnukkut sumiinnissaq eqqarsaatigisariaqarlugu uippakajaarnarpoq.

Initaarnissani utaqqigaa

Seqininnguaq Eugenius Aputsiamik naartulerami nalunngilaa inissarsiortariaqarluni. Kommunimukarpoq januaarillu 26-ani Kusernermi initaarluni.

- Ulloq taanna eqqaamalluarpara angerlarfissaqanngereerlunga maannarlunga eqqissineq misigigakku. Piffissaq siulleq siniffigineruara.

Seqininnguaq Eugenius Aputsiap saniatigut tallimanik meeraqarpoq. 2022-mi uinilu nakuusertartoq qimannermi kingorna ikiaroornartumik imigassamillu atornerluisutut inuulerami, meeqqat angerlarsimaffiup avataanut inissinneqassasut nammineerluni aalajangerpaa. Meeqqat sisamat Nuummi meeqqat angerlarsimaffianni najugaqarput angajullerlu meerarsiaalluni.

- Meeqqakka najugaqatigiunnaarakkit piffissamilu tassani anaanaga toqummat nakkangasorujussuuvunga. Akioruminaatsippara, imertalerlungalu ikiaroortalerpunga. Nipituumilli imminut oqarfigaanga taama inuujumananga. Anaanama annaaneranit, uikuma persuttaasarneranit meeraaninniillu misigissutsit suliarisariaqarpakka.

Seqininnguaq Eugenius maanna atornerluisuujunnaarsimavoq, meeqqanilu sisamat angerlarsimaffiup avataanut inissinneqarsimasut sapaatip-akunnerata naanerani paarisarlugit. Meeqqami tigoqqinnissaannut INI A/S-imiit aalajangersimasumik initaarnissani utaqqivaa.

- Qitornama takusarneri uannut pingaaruteqartorujussuuvoq. Uanni sinittaleqqinnerat nukissamik piumassusermillu tunisipput. Najorsimatillugit ajunnginnerujussuanngortarpunga, angerlarsimaqatigiuaannarusuppakkalu.

Angerlarsimaffeqanngitsorpassuit sullinneqartut

Seqininnguaq Eugenius meeraalluni angerlarsimaffiup avataanut inissinneqarsimavoq. Inuusuttuaraanerani angajoqqaavi imertalerput, namminerlu angerlarsimaffiup avataanut inissinneqarniarluni aalajangerpoq. Qaqortumi sullissisup neqeroorfigaa Seqininnguullu neqeroorut akueraa.

- Tillittartunik imerajuttunillu ikinnguteqarama Nuuk qimakkusussimavara. Taakku qimakkusukkakkit.

Nuummi Frelsens Hærimi angerlarsimaffeqanngitsut amerlapput. Frelsens Hærimi aqutsisup Nathanaël Münchip inuusuttut angerlarsimaffeqanngitsut takkuttartut namminneq angerlarsimaffiup avataanut aamma inissinneqarnikuusimasut qaammatini kingullerni paasivaa.

- Aammattaaq inersimasut angerlarsimaffeqanngitsut illutsinnut orniguttartut ilaat angajoqqaajupput, taamaattumillu meeraat aamma angerlarsimaffiup avataanut inissinneqarsimasutut peroriartorlutik, oqarpoq.

Aammali nuannersunik oqaluttuanik nalaataqartarpoq. Angajoqqaat ajornartorsiutiminnik aaqqiiniarlutik sorsussimasut, kommunimullu sukataarsimasut meeqqatik tigoqqikkusullugit takusimavai. Arlallit, Seqininnguaq Eugenius assigalugu, meeqqamik tigoqqinnissaat iluatsilertorpaat.

- Aammali ilaqarput tamakkiisumik angajoqqaajusinnaanngitsumik, assigiinngitsumilli periuseqarlutik meeqqami inuuneranni, peroriartorneranni tapersersornerannilu ajornartorsiulernerannilu tapersersornissaannik peqataasinnaallutik, Nathanaël Münch oqarpoq.

Tasiilaq qimakkaa

Kusernermi inissiami allami Maaria aamma Louis Jonathansen ernertik qaammammik ataatsimik utoqqaassusilik peqatigalugu najugaqarput. Tasiilami najugaqarallaramik 2021-mi meeqqaminnik arfinilinnik arsaagaapput. Maaria aamma Louis Jonathansenip meeqqatik Nuummut aallartinneqarmat inigisartik qimallugu meeqqat malinniarlugit aalajangerpaat. Nuunneralli ajornartorsiorfiuvoq, aappariillu Nuummi angerlarsimaffeerupput.

- Artornarpoq nukkiornarlunilu. Tasiilamit maanga nuunneq imaannaanngitsuuvoq. Taarsiornarpoq sumilu sininnissara nalunarluni. Annilaangasimaqaanga sioorasarlungalu, Maaria Jonathansen oqarpoq.

Naggataani kommunimukarput inissarsiortutut allatsikkiartorlutik angerlarsimaffeqanngitsullu unnuisarfianniilerlutik. Ukiut pingasut missaanni unnuisarfimmi ikinngutiminniluunniit unnuk taanna inissaqartitsisuni sinittarput.

- Nuunnissara akuerisariaqarnikuuara, Tasiilamiiginnarnermit meeqqakka pingaarnerummata, Maaria Jonathansen oqarpoq, oqaluttuarporlu meeqqaminik arsaagaanera pissutissaqarsimasoq.

- Atornerluisuunikuugatta, oqqattarluta meeqqagullu paarilluarnagit.

Tassa meeqqassinnik arsaagaanikuunersi paasisinnaavat?

- Aap, immitsinnut illersorniarluta meeqqagullu illersorniarlugit. Meeqqalli Nuummut aallarunneqarnerat akueriuminaassimavoq.

Siumut isigisut

Aappariit piffissami sivisuumi ajornartorsioreerlutik maanna sulilerput, Katsorsaavimmilu atornerluinermut katsorsartinnermik naammassinnissimallutik. Inimik naleqquttunik tunineqarnissamik utaqqinerminni Kusernermi najugaqarput. Meeqqatik arfinillit tigoqqinniarlugit naleqquttumik initaarnissartik utaqqivaat.

- Katsorsaasoq iluaqutaangaatsiarpoq. Qitornakka peqatigalugit toqqissisimasumik inuusinnaaqqullunga sakkussannik pissarsivunga, Maaria Jonathansen, nammineerluni meeraalluni angerlarsimaffiup avataanut inissinneqarsimasoq, oqarpoq.

Ilaqutariit Kusernermi najugallit ilaqutariittut siunnersorneqartarput katsorsaariaatsinillu assigiinngitsunik ikiorneqartarput, taamaalillutik imminut isumaginissamut meeqqaminnullu isumaginninnissamut ikiorneqartarlutik. Ilaqutariit assigiinngitsunik ikiorneqartarnerat pingaaruteqartoq Nathanaël Münchip oqarpoq.

- Ilaqutariit Kusernermiittut marluk taakkua takussutissaapput meeqqat qulit sullinneqartut isumagineqarsinnaalernissaannut, neriuutigisinnaavaallu pitsaanerusumik siunissaqarlutik atornerluisunngoqqinnissamik angerlarsimaffeeruteqqinnissarlu pinngitsoortinneqarsinnaassasut, aqutsisoq oqarpoq.