Ilimanami neriniartarfik Michelinik ullorissanik annaasaqarpoq
Savalimmiormiut neriniartarfiat Koks, ukiut marluk matuma siorna Ilimanamut nuunneqartoq, ataasinngormat ukioq manna nersornaasiinermi Michelinik ullorissanik marlunnik annaasaqarpoq.
Restaurant Egede, Ilimanaq
Assiliisoq: Greenland Travel
Neriniartarfiup Michelinik ullorissanik marlunnik 2019-imi tunineqarnera iggavimmi pisortap nersornaaserneqarnikup Poul Andrias Ziskap attatissallugu iluatsinngilaa.
2022-mi Ilimanami, Ilulissanit kujammut nalunaaquttap akunnerata affaata missaani umiartorluni tikitassami, iggavimmi pisortap neriniartarfik pilersippaa. Nunarsuarmi avatangiisit kusanarnerpaat ilaanni kangerlummut iluliarpassuanittartumut isikkivilimmi Kalaallit Nunaata Michelilinnik neriniartarfeqalernera malugineqangaarpoq.
Restaurant Egedemi, Kalaallit Nunaanni illut 1700-kkunneersut pisoqaanersaannut eqqissisimatitanut ilaasumi, nerisassat sassaalliutigineqartarput.
2024-mi suleqatigiinneq ingerlaannassasoq
Koks ukiuni marlunni nunaqarfimmi Ilimanami 80-it missaannik inoqartumiissasoq pilersaarutaasimagaluarpoq, World of Greenlandimilli Hotel Arcticimillu suleqateqarneq 2024-mi ingerlateqqinneqassasoq kingusinnerusukkut aalajangerneqarpoq.
2022-mi periarfissaq immikkorluinnaq ittoq Restaurant Koksimik piginnittumi Gist og Vistimi pisortap Johannes Jensenip eqqartorpaa.
- Kalaallit Nunaannukarnissaq pinngortitarlu alutornartoq inuussutissallu immikkuullarissut misigalugit nuannersinnaasoq isumaqarpugut: naasut, timmissat, tuttut, umimmaat sorpassuillu, dr.dk-mut oqarpoq.
