Ilinniarfik nutaaq soqutigineqarluartoq
Uumassusilerinermik ilinniarfimmi nutaami SILA-mi aqqaneq-marluk siulliullutik aallartissapput.
Immikkoortortaqarfimmi pisortaq Aviaja Lyberth Hauptmann Ilisimatusarfimmi biologimik bachelorinngorniarfimmik nutaamik, SILA-mik, ineriartortitsisimasutut Ukiumut nersornaaserneqarpoq.
Assiliisoq: Emil Nørgaard Stach / Ilisimatusarfik
Nunatsinni uumassusilerinermik ilinniarfik siulleq, SILA, qanittukkut aallartissaaq.
Ilinniakkamut qinnuteqarsinnaanermut killigititaq qaangiuttoq ilinniarfillu nutaaq soqutigineqaqisoq Ilisimatusarfik ilisimatitsivoq.
Ilinniartut aqqaneq-marluk februaarimi aallartissapput:
- 12-inik ilinnialertussaateqarluta, tamarmik Kalaallit Nunaanni pinngortitap immikkuullarilluinnartup pinngortitallu ataqatigiinnerata pulaffiginissannut pileritsaattunik, februaarip aallaqqaataani 2025 ilinniakkap aallartinnissaa qilanaaraarput - utaqqisinnaanngingajavippugullu, Ilisimatusarfik immikkoortortaqarfimmilu aqutsisoq Aviaja Lyberth Hauptmann allapput.
Ilinnialertussat biologiimi apeqqutit annertuut taakkualu teoriisa misissuiviginissaannut periarfissinneqassapput - tamannalu ilutigalugu pinngortitap tupinnartuliai qanimut misigissavaat.
- Ilinnialertussat taakkua 12-it siunissami periarfissagissaassapput, Kalaallit Nunaanniinnaanngitsoq, aammattaarli nunani tamalaani ilisimatusarnermit avatangiisinillu aqutsinermit ilinniartitsinermut tunngasut iluanni tamani., Ilisimatusarfimmiit oqaatigineqarpoq.
Ilinniartut kandidatinngorniarlutik, bachelorinngorniarnermit ingerlariaqqiffiusumik ilinniagaqarsinnaalersut Aviaja Lyberth Hauptmannip oktobarimi ilisimatitsissutigaa.
Ilisimatusarfik Aalborg Universitetilu SILA-mi bachelorinngorsimasut Danmarkimi universitetimi biologimi kandidatinngorniarsinnaanissaannik isumaqatigiissuteqarmata tamanna periarfissaalerpoq.
Aammattaaq ilisimatusarfiit taakku marluk ilinniartunik paarlaasseqatigiittassapput.
