ILLERSORNISSAQARFIMMI NAAMMAGISIMAARINNINNEQ ANNERTOOQ
Ilinniarfittaami ilinniarlersuni 22-ni 19-it angusisut
- Inuusuttut kajumissuseqarluarlutillu pimoorussipput, ilinniarnerullu ingerlanerani ineriartortuarsimallutik, Issittumi tunngaviusumik ilinniarfiup pisortaa Simon Kokfelt ilinniartut siulliit ilinniakkaminnik naammasseqqammersut pillugit oqarpoq. Taakku amerlanersaat upalungaarsimasunut Illersornissaqarfimmulluunniit ilinniassallutik ingerlaqqipput.
Kalaallit inuiaqatigiit upalungaarsimanerat nukittorsarnissaat Issittumi tunngaviusumik ilinniarnerup siunertaraa. Ilinniartut ilinniarnerminni sakkutuutut piginnaasanik upalungaarsimanermullu tunngasunik assigiinngitsorpassuarnik ilinniartinneqartarput.
Assiliisoq: Arktisk Kommando
Issittumi tunngaviusumik ilinniarfiup pisortaata Simon Kokfeltip ilinniartut siulliit qanoq ingerlaneri pillugit unnersiornera naammagisimaarinnittorujussuuvoq.
Ilinniartuni 22-usuni 19-it tunngaviusumik ilinniagaq naammassivaat allagartartaarlutillu:
- Tamanna naammagisimaarluarparput. Inuusuttut ilinniartinneqaraangamik angerlarsimaffimminniillu ungasissumut aallartariaqaraangamik unitsitsinnartoqarsinnaaneranik aarlerinartoqartartoq nalunngilarput, ilinniartut siulliit naammassinerat pillugu Sermitsiamut allakkatigut akissuteqarpoq.
Inuusuttut taakkua kajumissuseqarluartut, pimoorussisut ineriartortsimasut Simon Kokfeldt oqarpoq. Ilinniartullu imminnut nuannersumik unammilleqatigiissimallutik.
Ilinniartut isumalluarfigineqartut
Ilinniarfiup pisortaata oqarnera naapertorlugu ilinniartut ilinniarnerminnik attassiinnarnerannut peqqutaanerpaasoq tassaavoq isumalluarfigineqarnerat:
- Inuusuttut piffissaq eqqorlugu takkussinnaanatillu ineriartuutaasumik isornartorsiorneqarnissartik tusarusunneq ajoraat inuiaqatigiinni sumiiffinni assigiinngitsuni tusarsimavara.
- Ilinniartulli piumasaqaataasunik naammassinnissinnaasutut isumalluarfigineqaramik ilinniarfimmi tamanna iluatsissimagipput maluginiarpara, Simon Kokfelt oqarpoq.
Issittumi tunngaviusumik ilinniarfimmi ilinniartut piumassuseqarnermik, ikioqatigiinnermik, sapiissuseqarnermik aamma artornaraluaraangalluunniit pinertusaarsinnaanermik takutitsisimapput. Tamatuma saniatigut timikkut tarnikkullu nukittunerulersimapput siunissami sutigut tamatigut iluaqutigisinnaasaminnik, ilinniarfiup pisortaa Simon Kokfelt oqarpoq.
Assiliisoq: Arktisk Kommando
Aamma ilinniartitsisut iliuuserisimasaat tulluusimaarutigai, ilinniartummi assigiinngitsorpassuarnik piginnaasallit ilinniariarput, ilinniartitsisullu taakkuninnga isumaginnilluarsimapput.
- Illersornissaqarfimmi tunngaviusumik ilinniarfiit allat assigalugit ilinniartut piumassuseqarnermik, ikioqatigiinnermik, sapiissuseqarnermik aamma artornaraluaraangalluunniit pinertusaarsinnaanermik takutitsisimapput. Tamatuma saniatigut timikkut tarnikkullu nukittunerulersimapput siunissami sutigut tamatigut iluaqutigisinnaasaminnik, Simon Kokfelt oqarpoq.
Amerlanerit ingerlaqqittut — ataaseq sakkutuunngorusuttoq
Ilinniartuni 19-ini amerlanersaat illersornissaqarfimmi upalungaarsimasuniluunniit ilinniarfinnut assigiinngitsunut ingerlariaqqissinnaalerput, amerlanersaallu siunissami qanoq pinissamik misilittaanermut toqqaannartumik ingerlaqqittut Simon Kokfeldt oqarpoq, ataaserli Danmarkiliarluni sakkutuunngorniarluni.
Siunissami qanoq pinissamik misilittaanissamik ingerlariaqqiffik qaammatini arfinilinni sivisussuseqartarpoq. Tassanilu Illersornissaqarfik periarfissarpassuarnik neqerooruteqarpoq, soorlu qatserisartutut ilinniarneq, Issittumi Sakkutooqarfiup umiarsuaani sulinermik misiliineq, Kalaallit Nunaanni Politiini suleriaaseq pillugu paasisaqarneruneq aamma umiartornermut inuussutissarsiuteqarsinnaanermut ilinniarneq.
- Issittumi tunngaviusumik ilinniarneq Danmarkimi sakkutuunngorniarnermi ilinniakkatullu periarfissaqarpoq. Ilinniartut assigiimmik ilinniartinneqarput, maannalu Kalaallit Nunaanni upalungaarsimasuni illersornissaqarfimmiluunniit sulilersinnaallutik periarfissaqarlutik, Simon Kokfelt nassuiaavoq.
Ilinniartut amerlanerusinnaanerat isumaqatiginninniutaasoq
Issittumi tunngaviusumik ilinniarfik Kangerlussuarmi maajip tallimaani ammaanersiorneqarpoq, tassani Naalakkersuisut Illersornissaqarfiullu sinniisaat najuullutik. Ilinniarfik Issittumi piginnaasanik annertusaanissamut pilersaarummut Folketingimit akuerineqartumut kingornalu Naalakkersuisunik isumaqatiginninniutigineqartumut ilaavoq.
Ilinniartut siulliit eqqaaneqareersutut 22-upput, maannali ilinniartut amerlanerusut ilinniarfimmi aallartissinnaanissaat anguniarlugu aningaasat amerlanerusut pissarsiarineqarnissaat isumaqatigiinniutigineqarpoq.
