IMAK Namminersorlutik Oqartussanik aningaasarsianik aappaagu isumaqatiginninniaqqissaaq.
Taamaattumik ilaasortat atuarfinni sunik ulapputeqarnersut paasiniarlugu ilinniartitsisut kattuffiat nuna tamakkerlugu angalasimasoq siulittaasoq Elna Heilmann ilisimatitsivoq. Ilaasortat arlallit ulluinnarni aningaasaqarneq aqussinnaajumallugu marlunnik suliffeqartariaqartut taanna oqaluttuarpoq, tamannalu inuussutissat akitsoriartorneranni ajornannginnerulersimanngilaq. Tamatuma saniatigut kommunit ilaanni ilinniartitsisut qaangiuttoorlutik sulisinnaatitaannginnerat piumasaqaatigineqarpoq, tamatumalu kingunerisaanik sunngiffimminni allamik suliffittaartariaqartarput.
IMAK Namminersorlutik Oqartussanik aningaasarsianik aappaagu isumaqatiginninniaqqissaaq.
Taamaattumik ilaasortat atuarfinni sunik ulapputeqarnersut paasiniarlugu ilinniartitsisut kattuffiat nuna tamakkerlugu angalasimasoq siulittaasoq Elna Heilmann ilisimatitsivoq. Ilaasortat arlallit ulluinnarni aningaasaqarneq aqussinnaajumallugu marlunnik suliffeqartariaqartut taanna oqaluttuarpoq, tamannalu inuussutissat akitsoriartorneranni ajornannginnerulersimanngilaq. Tamatuma saniatigut kommunit ilaanni ilinniartitsisut qaangiuttoorlutik sulisinnaatitaannginnerat piumasaqaatigineqarpoq, tamatumalu kingunerisaanik sunngiffimminni allamik suliffittaartariaqartarput.
- Ilaat ulloq unnuarlu paaqqinnittarfinni sulisarput, allat sunngiffimmi atuartitsisarlutik, pisiniarfinni sulisarlutik taxartartuullutillu, Elna Heilmann AG-mut oqarpoq.
– Sullivinni tarnikkut atukkat unammillernartuupput, soorlulusooq ballon-erujussuaq qaartinnagu iliuuseqarfigisariaqakkatsitut ittoq, IMAK-ip siulittaasua Elna Heilmann oqarpoq.
Assi: Leiff Josefsen
Taamaattumik akissarsiat qaffanneqarujussuarnissaat qularnanngitsumik isumaqatigiinniarnerni piumasarineqassaaq.
Kommunini qaangiuttoorluni sulisinnaanermik akuerinniffiusuni ilaasortat ilaat ima qaangiuttoorlutik sulitigisarput allaat uippakajaalersarlutik. Taamaattumik IMAK-ip upernaaq angalareerluni sullivinni tarnikkut atukkat sammissavai.
- Sullivinni tarnikkut atukkat unammillernartuupput, soorlulusooq ballon-erujussuaq qaartinnagu iliuuseqarfigisariaqakkatsitut ittoq, Elna Heilmann oqarpoq.
Meeqqat atuarfianni suliniutit ilinniartitsisunit atuarfinnilu pisortanit peqataaffigineqarnerunissaat, IMAK-ip aamma kissaatigingaarpaa.
- Ilinniartitsisut peqataatinnagit politikerit suliniutissanik aalajangiisarnerat suleqatigiissitassanillu pilersitsisarnerat kommunini nalinginnaalluinnarpoq, Elna Heilmann oqaluttuarpoq.
Ilinniartitsisut kissaatigingaagaat alla tassaavoq ilinniaqqinnissamut piginnaanngorsaanissamullu periarfissaqarneq. Tamatumunngali tunngatillugu IMAK-ip ilaasortaanik pikkorissaanissamut neqeroorfigisinnaasaannut kommunit sipaarniuteqarnerat akornutaasarpoq. Elna Heilmann naapertorlugu amerlanertigut ataatsimut pikkorissartitsisoqartarpoq, inuttullu piginnaanngorsaaneq tunulliunneqartarluni.
- Meeqqat atuarfianni sulisussanik piginnaanilinnik kissaateqarutta, taava ilinniaqqinnissaq sulissutigisariaqarparput, ilinniartitsisullu sumiiffinniittut sulisartutut attannissaat sulissutigisariaqarlutigu, IMAK-ip siulittaasua oqarpoq, ilanngullugulu oqaatigalugu naak ilinniartitsisut amerlasuut nunap iluani allamut nuuttaraluartut, patajaallutik ukiorpassuarni sumiiffimmi ataatsimi sulisimasut ilinniartitsisut amerlasuujusut.
Ilinniartitsisussaaleqineq
Meeqqat atuarfianni unammillernartut piffissap ingerlanerani annikilliartorsimanngillat.
Sumiiffinni assigiinngitsuni, minnerunngitsumik illoqarfinni minnerusuni nunaqarfinnilu ilinniartitsisunik amigaateqarneq suli atuuttoq, IMAK-ip siulittaasua tikkuaavoq. Illoqarfiilli pingaarnersaanni aamma ilinniartitsisunik amigaateqartoqarpoq. Assersuutigalugu atuarfimmi nutaami Inussummi ilinniartitsisutut atorfiit 15-it inuttassarsiuunneqarput, Elna Heilmann oqarpoq. Inissaaleqineq pissutaalluni ilinniartitsisut Nuummut tikiukkuminaapput.
- Angajoqqaat ilinniartitsisullu akornanni attaveqatigiittoqassaaq. Killiliisinnaasoqartoq isumaqatigiissutigisariaqarpaat
Elna Heilmann, IMAK-imi siulittaasoq.
Nunami meeqqat atuarfii allat assiginagit Atuarfik Inussummi nutaami ukioq manna atualernissaq ullunik 14-inik kinguartinneqarpoq, sanaartortitsisut atuartunik tikilluaqqusinissamut piareersimannginnamik.
Atuarfissuaq nutaaq, Kalaallit Nunaanni siullersaasoq, IMAK-imit neriuuteqarluarfigineqarlunilu qilanaarineqarpoq.
- Isumassarsiaq pissanganartoqarsoraarput, misilinneqarnikuunngilarmi, iluatsissappallu immikkoortortat tamarmik suleqatigiittariaqarput, Elna Heilmann oqarpoq.
Atuartut unammillernartut
Atuartut atugarliortut timertik atorlugu sakkortuumik qisuariartartut pillugit ukiuni kingullerni ilinniartitsisut kattuffiat mianersoqqussuteqartarpoq.
Atuartut taakku suli tusarsaapput, aammali atuartut allat ilinniartitsisunit attaveqarfigiuminaatsinneqartarput.
- Ilinniartitsisut meeqqanik attaveqarneq unammillernartippaat, immaqa spillerneq nittartakkanilu inuit attaveqaqatigiittarfii meeqqat inuuneranni inituallaarmata, angerlarsimaffimmilu angajoqqaaminnik attaveqarneq ilinniarsimanngimmassuk, Elna Heilmann oqaluttuarpoq.
IMAK-ip siulittaasuata tikkuarpaa ”Youtube-mi oqaatsit” pilersinneqariartuaartut, meeqqat tuluttut oqaluttarlutik, kalaallisut qallunaatullu oqalunnatik. Aamma tuluttut oqaatsit eqqortumik atorneqarneq ajorput, tuluttulli oqaasiliat inuit ilaanni oqariaatsitut atortagaannik oqaluttarput.
Ingammik unammillernartarpoq ilinniartitsisut atuartunik killiliinialeraangata. Meeqqat inersimasunit angerlarsimaffimminni killilerneqarneq sungiusimanngippassuk ajornartorsiut ingasatsikkiartulersinnaavoq.
- Atuartitsinermik eqquisinnaavoq. Meeqqat immikkut klassinut inissinneqartarput, naak ilisimasaqarluaraluarlutik isummertarnikkullu nalinginnaalluinnartuugaluarlutik, Elna Heilmann oqarpoq.
Ajornartorsiut pillugu inuiaqatigiit ilisimasaqarnerulernissaat kiisalu angajoqqaat akisussaaffii pillugit aammalu ilinniartitsinikkut kulturi kissaatigineqartoq pillugu paasititsiniaanerit kissaatigai.
- Angajoqqaat ilinniartitsisullu akornanni oqaloqatigiinneqassaaq. Killiliisinnaasoqartoq isumaqatigiissutigisariaqarpaat, IMAK-imi siulittaasoq oqarpoq.
