KL

DK

NAATSORSUUSERISUUSIMASUMUT EQQARTUUSSINEQ

Ilisimannittoq pingaarutilik: Fakturani atsiornerit eqqortuunngillat

- Atsiornerinngilara, ilisimannittoq Qeqqata Eqqartuussiveqarfiani marlunngornermi nassuiaasinneqarnermini oqarpoq. Ilisimannittup pingaarutillip KNI A/S-imi peqquserlussimanermut tunngasumut suliami marlunngornermi ulloqeqqanngitsoq nassuiaasinneqarami oqaluttuarpoq fakturat arlallit akuerisimanagillu nammineq atsiorsimanagit. Taassuma aamma mailit eqqunngitsut unnerluutigineqartumit nassiunneqarsimasut ilisarisinnaanngilai. 

Peqquserlunneq pillugu suliaq annertooq Qeqqata Eqqartuussiviani ulluni tallimani suliarineqarpoq, tassani KNI-mi naatsorsuuserisuusimasiq unnerluutigineqarpoq. Illersuisup pinngitsuutinneqarnissaa piumasaraa, unnerluussisullu ukiuni sisamani pineqaatissinneqarsimasunut inissiisarfimmiittussanngortinnissaa piumasaraa.
Dorthea Reimer-Johansen
Journalist
Offentliggjort

KNI-imi naatsorsuuserisuusimasoq Qeqqata Eqqartuussiveqarfiani Sisimiuni inimi eqqartuussiviusumi issiaqqippoq. Ulluni tallimaasuni pingajuat marlunngornermi ingerlanneqarpoq, tassani Namminersorlutik Oqartussat suliffeqarfiutaani peqquserlussimasutut eqqartuussineq angisooq suliarineqarluni. 

Unnerluutigineqartorli kisimi issianngilaq.

Ilisimannittoq pingaarutilik, tassaasoq KNI A/S-imi aningaasaqarnermut pisortaanerusoq ilisimannittut issiavianni issiavoq nassuiaalluni.

KNI A/S-imi pisortaaneq, Jeppe Jensen isiginnaartut issiavianniit eqqartuussineq malinnaaffigaa.

- Uanga atsiugarinngilara

KNI-ip 2014-imiit oqaluttuassartaasa ilai ilisimannittup nassuiaatigai, kiisalu naatsorsuuserisuusimasup atorfininnermini isumaqatigiissutaasoq, akissarsiai atorfimmilu sulerisuunerata oqaluttuassartaa aamma nassuiaatigai.

Oqaluttuaq naalisarlugu, unnerluussisussaatitaasoq Morten Hvergel pappilissanik arlalinnik isiginnaarutikkut saqqummiivoq, tassani fakturat mailikkullu attaveqatigiinnerit saqqummiunneqarlutik. 

Saqqummiussani tamani unnerluussisussaatitaasoq ilisimannittumut aperisarpoq:

- Illinuna atsiornerit?

Imaluunniit:

- Illinuna akuerisat?

Ilisimannittorlu akisarpoq "Naamik".

Fakturat akuerineqareernermi kingorna allanngortinneqarsimasut aningaasaqarnermullu pisortaq avaqqullugu ingerlateqqinneqarsimasut aamma saqqummiunneqarput. Unnerluutigineqartup mailit aningaasaqarnermut pisortaanermut aamma nassiussimasai takutinneqarput, tassanili ilisimannittup mailit nassiunneqarsimasut ilisarisinnaannginnerarpai, mailianilu nanineqarsinnaasimanatik. Ilisimannittoq nassuiaavoq mailit allagarsiani nassiussaniluunniit piianngisaannarlugit.

Marloriaammik akissaqartoq

Ilisimannittoq ilaatigut nassuiaavoq unnerluutigineqartoq akissarsialerinermut systemi aqqutigalugu 2019-miit akissarsisalersimasoq, taamaattumik akissarsinissaq siunertaralugu fakturanik nassiussisariaqarunnaarluni. Ingerlariuseq taamaakkaluartoq naatsorsuuserisuusimasoq suli fakturanik nassiussisarsimasoq ilisimannittup oqaluttuaraa. Taamaattumillu marloriaammik akissarsisalersimalluni. Marloriaammik akissarsisalersimanera isumaqarpoq qullersaminiit akissarsiakkaanerulersimasoq.

Unnerluutigineqartoq suli pinngitsuunerarpoq. Tassani pisunut katillugit 29-nut unnerluutigineqarpoq, aningaasat pissarsiassarinngisani katillugit 3,3 millionit koruunit pissarsiarisimallugit. 

Eqqartuussinermi pilersaarutit naapertorlugit pingasunngornermi naggataarutaasumik piumasaqaatit saqqummiunneqassapput aalajangiisoqarlunilu. Sisamanngornermi aalajangernerup inernera eqqartuussisumit saqqummiunneqassaaq.

Unnerluussisussaatitaasut piumasaraat ukiuni sisamani pineqaatissinneqarsimasut inissiisarfiannut inissinneqassasoq, illersuisuatali pisuni tamani pinngitsuutinneqassasoq piumasaraa.

bedrageri samfund qeqqata kredsretten inuiaqatigiit sisimiut kni

ATORFIIT Se alle jobs

Powered by Labrador CMS