NAATSORSUUSERISUT PISORTARISIMASAAT EQQARTUUSSIVILERSUUNNEQARTOQ
Ilisimannittut: Tatigisimavarput
KNI A/S-imi naatsorsuuserisutut pisortaasimasoq ataasinngornermi eqqartuussivimmi sassarteqqinneqarami ilisimannittut pingasut suliffeqarfimmut attuumassuteqartut attuumassuteqarsimasulluunniit aggersarneqarput killisiorneqarlutillu. Taakkua ilai pisortaasimasumut tatiginnissimallutik oqaluttuarput, iliuusereqqusaalu taamaammat iliuuserisimallugit.
En stor bedragerisag skal igennem fem arbejdsdage behandles i Qeqqata Kredsret, hvor en tidligere KNI-chef skal sidde på anklagebænken. Forsvaret kræver frifindelse mens anklagerens påstand er fire års anstaltsanbringelse.
Dorthea Reimer-Johansen
KNI A/S-imi naatsorsuuterisutut pisortaasumasup eqqartuussaanera ataasinngornermi nangeqqinneqarpoq.
Sisimiut ullaakkut nalunaaqutaq qulingiluanut nittaaleruttortoq eqqartuussivimmi eqqartuussisoq eqqartuusseqataasartut pingasut ilagalugit inimut eqqartuussiviusumut iserpoq, oqarlunilu:
- Kumoorn. Inimiittut tamarmik nikuipput ataqqinninnermik takutitsiniarlutik.
Eqqartuussisup immiartorfini imermik immerpaa oqarlunilu:
- Ullumikkut ingerlaqqissaagut.
Eqqartuussinermi unnerluunneqartoq apersorneqaqqissaaq, kingornalu ilisimannittut pingasut aamma apersorneqartussaallutik. Ilisimannittut taakku unnerluunneqartumut KNI-mulluunniit attuumassuteqarput.
Akiligassat allanngortinneqartut
Unnerluussisussaatitaasup unnerluussaq apersorlugu nangeqqippaa, tassani akissarsiat, akissarsialerinermi systemi, pappiaqqat, mailikkut attaveqatigiinnerit, akiligassanillu akuersissutit pillugit apersorlugu.
KNI-mut akiligassanik nassiussani takuneqarsinnaavoq unnerluussaasup akiligassat akuerineqareersut ilasarsimagai, soorlu akiligassartaa allanngortillugu imaluunniit ilallugu.
Unnerluussisoq aperivoq sooq taamaaliortarsimanersoq.
Unnerluunneqartoq nassuiaavoq angalanermut ajunngitsorsiassat akileraarutitaqanngitsut imaluunniit akileraarutinik ajunngitsorsiassat ilannguttarsimallugit. Unnerluutigineqartoq nassuiaavoq stressernini paasiuminaatsitsininilu pissutigalugit kukkussuteqartarsimalluni.
Maili piviusuusaartitaq
Allagaatit allat aamma apersuinermi saqqummiunneqarput, ilaatigut akiligassat nassiunneqartut atsiorneqarsimanngitsut, mailikkut akuerineqarsimasut. Apersuinermi aamma eqqaaneqarpoq unnerluutigineqartup akiligassaq ingerlateqqikkaangamiuk aningaasaqarnermut pisortaq ilanngullugu mailimik ilisimatitsissummik nassinneq ajorsimagaa.
Unnerluussisussaatitaasoq aamma oqarpoq, naatsorsuuserinermut pisortap nassiussaa aningaasaqarnermut pisortap mailiani nassaarineqarsinnaasimanngitsoq. Taamaattumik unnerluutigineqartoq aperineqarpoq mailimut piviusuusaartitamik pilersitsisimanersoq, taamaaliorsimannginnerarporli.
KNI A/S-imi sulisut naatsorsuuserisumut tatiginnissimagaluarput
Ilisimannittut marluk KNI A/S-mut attuumassuteqartut attuumassuteqarsimasulluunniit nassuiaapput naatsorsuuserisumut tatiginnissimagaluarlutik, taamaattumillu peqqussutai malittarsimallugit. Ilisimannittup siulliup nassuiaatigaa unnerluutigineqartoq nunatsinnut akileraartarusummat akissarsiai qaffanneqartarsimasut, akissarsiaali ingerlatsinermut kontomut nakkartinneqartarsimallutik.
Eqqartuussineq ataasinngornermi nalunaaqutaq pingasunut naammassivoq, marlunngornermilu eqqartuussinermi ilisimannittut marluk allat apersorneqassallutik. Taakkua saniatigut uppernarsaatinik saqqummiussisoqassaaq unnerluutigineqartullu aamma inuttut atugai sammineqassallutik.
Unnerluutigineqartoq pisunut 29-inut eqqartuussivilersuunneqarpoq, tassani peqquserluttuliorsimasutut allakkanillu eqqunngitsunik suliaqarsimasutut unnerluutigineqarpoq. Sulili pinngitsuunerarpoq.
