Ilisimatooq USA pillugu: – Kalaallit Nunaat erseqqissumik oqariartorpoq
USA-p præsidentiata, Donald Trumpip nunatsinnik nakkutiginninnerulerusunneranik oqariartoqattaarnerani nunatsinni politikerit nunatta tuniniagaannginnera uteqattaartuarpaat. Oqaatip uteqattaarneqartarnera naammappa, imaluunniit Issittumi illersornissaq pillugu oqallinnermi naalagaaffiillu pissaanillit soqutigisaat pillugit oqallinnermi peqataanerusariaqarpugut?
Jeppe Strandsbjerg, lektor og forsker på Ilisimatusarfik.
Privatfoto
USA-p præsidentiata Donald Trumpip nunatta aqunneqarnissaanik oqariartuuteqartuarnerani Kalaallit Nunaata tuniniarneqannginneranik oqariartuuteqartuarnissaq naammappa, imaluunniit oqariartuut sakkortusiniarlugu iliuuseqarnerusariaqarpa?
Ilisimatusarfimmi Issittumi Inuiaqatigiilerinermi Aningaasaqarnermullu Immikkoortortami lektori apeqqut tamanna pillugu Sermitsiap oqaloqatigaa.
Lektori isumaqarpoq nunatta politikerii nunatta iluani avammullu erseqqarissumik oqariartuuteqartartoq. Tamannali naammannersoq, tigusisussamut apeqqutaavoq.
- Tigusisussaq qanoq tigusissanersoq aqunneqarsinnaanngilaq.
- Kalaallit naalagaaffinngorusunnerannik amerikarmiut tusagaqaraangamik, amerlasuut eqqarsartarput illersornissaq pillugu USA akisussaaffimmik annertunerumik tigusissasoq, qanorluunniit imaqaraluarpat.
- Apeqqutaaginnarpoq isumaqartoqarsinnaanersoq Kalaallit Nunaannut iluaqutaasumik isumaqatigiinniartoqarsinnaasoq, imaluunniit USA-p namminissarsiorluni sunniuteqarnerulerniarnissani pinngitsoorsinnaanavianngikkaa, soorlu USA-mik qularinnittut ernumagigaat,
Tamanna Kalaallit Nunaannik nalorninartorsiortitsivoq:
Danmarki illersornissamut tunngatillugu suli suleqatigineqarnerunissaa inissinneqassava? Taanna eqqarsaat ajornanngitsuaqqamik paatsoorneqarsinnaavoq, soorlu naalagaaffinngorusunnermut annikillisaasumik.
Danmarkip Kalaallit Nunaatalu illersornissaq pillugu suleqatigiinnerat kingullermik isumaqatigiissummi immikkoortumi siullermi januaarimi atsiorneqartumi erseqqissarneqarpoq.
- Tamatuma takutippaa illersornissamut tunngasut ineriartortinneqareersut, aamma Kalaallit Nunaata isumannaallisaanermi isumaqatigiinniarnerni peqataasarnera, Jeppe Strandbjerg isumaqarpoq.
