Ilisimatusarfik Danmarkimi universitetimik isumaqatigiissuteqarpoq
Ilisimatusarfik Aalborg Universitetilu biologimik ilinniartunik paarlaasseqatigiinnissamik isumaqatigiissuteqaqqammerput, taamaalillunilu SILA-mi bachelorinngorsimasut Aalborg Universitetimi biologimik kandidatinngorniarsinnaapput.
- Suleqatigiinnikkut kalaallit qallunaallu biologimik ilinniagaqartut immikkut ittumik neqeroorfigisinnaavavut, Aviâja Lyberth Hauptmann Aalborg Universitetimik suleqateqalerneq pillugu oqarpoq.
Asseq nammineq pigisaq
Ukiumi nutaami februaarip aallaqqaataani Ilisimatusarfimmi biologimik ilinniagaq nutaaq, SILA, aallartissaaq.
Ilinniarfik nutaamik pisoqartitsisuuvoq, siullermeertumimmi Kalaallit Nunaanni biologimi bachelorinngorniartoqarsinnaalerpoq, maannalu ilinniartut kandidatinngorniarnissaminnut periarfissaqalerput, taannalu bachelorinngorniarnermit qaffasinnerusumik ilinniagaqarneruvoq.
SILA-mi bachelorinngorsimasut Danmarkimi universitetimi biologimi kandidatinngornissamut akuerineqarsinnaassasut, Ilisimatusarfik Aalborg Universitetilu isumaqatigiissuteqarput.
Aammattaaq universitetit taakku marluk ilinniartunik paarlaasseqatigiinniarput, universitetit tusagassiuutinut nalunaarummi allapput.
Suleqatigiinneq immikkuullarissoq
Ilisimatusarfimmi lektori immikkoortortamilu pisortaq Aviâja Lyberth Hauptmann, SILA-mik ilinniarnermik ineriartortitseqataasimasoq, ilinniartunut neqeroorut immikkut ittutut oqaatigaa:
- Suleqatigiinnikkut kalaallit qallunaallu biologimik ilinniagaqartut immikkut ittumik neqeroorfigisinnaavavut, Aviâja Lyberth Hauptmann oqarpoq, SILA-milu ilinniartut Aalborg Universitetimi biologimik ilinniagaqarnermit, Kalaallit Nunaannut tulluarsarneqarsimanngitsumit, ilinniagassarpassuaqarumaartut erseqqissarlugu.
Aalborgip universitetiani suleqatigiinneq aamma nuannaarutigineqarpoq:
- Suleqatigiinnissaq tamanna nuannaarutigeqaarput, taamaalillunilu kalaallit qallunaallu biologimik ilinniagaqartut issittumi uumassusillit pillugit immikkut ittumik ilinniagaqarnissamut periarfissaqalissapput, Kalaallit Nunaanni pinngortitaq kulturilu qitiutillugit, lektor Simon Bahrndorff Institut for Kemi og Biovidenskabimeersoq oqarpoq.
Kalaallit biologimi kandidatinngorniat tikilluaqqusarnissaat qilanaaraa, tamatumalu saniatigut Aalborg Universitetiani biologimi ilinniartut ilinniarneq aallartippat SILA-mi pikkorissarnerit toqqagassatut ilinniagaqarfigisinnaalernissaat sulissutigineqartoq oqaatigalugu.
