Ilisimatusarfimmi nutaami siulersuisunut ilaasortassat toqqarneqartut
Naalakkersuisut siulersuisunik, Kalaallit Nunaanni Filminstitutimik aqutsisussanik, maanna toqqaasimalerput. Filmiliortartoq Malik Kleist siulittaasuussaaq.
- Kalaallit Nunaanni Filminsitutip pilersinneqarnera Kalaallit Nunaanni filmiliornermik ineriartortitsinermi pingaarutilittut alloriarneruvoq, naalakkersuisoq Nivi Olsen (D) oqarpoq.
Toqqorsivimmiit assi: Leiff Josefsen
Inatsisartut Kalaallit Nunaanni filmiliornermik inuussutissarsiuteqarneq nukittorsarniarniarlugu filmiliornermik ilisimatusarfimmik pilersitsinissaq 2024-mi ukiakkut ataatsimiinnerminni akueraat.
Ilisimatusarfik pisortanit pigineqarluni nutaatut namminersortunngortinneqartussanngorpoq, 2026-llu ingerlanerani pilersinneqassasoq naatsorsuutigineqarmat maanna siulersuisut ilisimatusarfimmik aqutsisussat inissinneqarput, Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfik tusagassiutitigut nalunaarummi ilisimatitsivoq.
Siulersuisut tallimanik ilaasortaqartussat filmiliornermik misilittagaqarluartuusariaqarlutillu tusagassiuutilerinermi, ussassaarinermi, ingerlatsinermi, aningaasaqarnermi aqutsinermilu piginnaasaqarluartariaqarput.
Naalakkersuisut siulersuisumik toqqaasassapput, matumanilu filmiliortoq Malik Kleist toqqarneqarsimavoq.
Siulersuisunut ilaasortat ukiuni marlunni atorfeqartussatut toqqarneqarput, naalakkersuisullu Nivi Olsenip siulersuisut maanna inississimanerat nuannaarutigaa.
- Kalaallit Nunaanni filmiliornermik suliaqarfimmik ineriartortitsinermi alloriarneq pingaarutilik filminstituttimik pilersitsinerup takussuserpaa, nunatsinnilu filmiliortarnerup siuarsarnissaanik anguniagaq taperserlugu aamma innuttaasut filmiliornermik suliaqartarnissamut periarfissaannik amerlanerulersitsivoq, taanna oqarpoq.
Siulersuisut Naalakkersuisunit toqqarneqartut ukuupput:
- Siulersuisuni siulittaasoq Malik Kleist
- Ilaasortaq Claus Erik Nielsen, Film.gl-imit innersuunneqartoq
- Ilaasortaq Ulannaq Ingemann, Kalaallit Nunaanni Eqqumiitsulianik Aningaasaliisartut Peqatigiiffiannit innersuunneqartoq.
- Ilaasortaq Nukakkuluk Kreutzmann, isiginnaartitsisartut peqatigiiffiannit SILA-mit innersuunneqartoq
- Ilaasortaq Julia Pars, Sulisitsisunit aamma NUSUKA-mit innersuunneqartoq.
