Ilisimatusarfimmi tikeraatut ilinniartut: Nuanneq, pissanganaq naleqqulluinnarlunilu

Ilisimatusarfik semesterit tamaasa nunarsuarmit tamarmeersunit 15-20-nik tikeraartunik ilinniartuuteqartarpoq. Ukiaq manna ilinniartut Danmarkimit, Norgemit, USA-mit aamma Japanimeersuupput.

Christian Bundgaard (31) qallunaat Ilisimatusarfimmi semesterit tallimassaanni atuarniarluni aalajangersimasut ilagaat. Taanna Aarhus Universitetimi Perorsaanermut Ilinniartitaanermullu ilisimatusarfimmi ilinniartuuvoq.

Kalaallit Nunaat immikkuullarissumik inissisimavoq

Ilinniartitaaneq pillugu ilisimatusarnikkut ilinniarnerup, ilinniartitaanerup perorsaanerullu meeqqat atuarfiini ilinniarfinnilu qanoq pingaaruteqartiginerat ilisimatusarfigineqartarpoq, tassungalu atatillugu Kalaallit Nunaat immikkut soqutiginartoq, Christian Bundgaard oqarpoq.

– Kalaallit Nunaat ilinniagaqarnermik ingerlatsinermi immikkuullarissumik inissisimavoq, oqartussaaffik angerlaanneqarnikuuvoq, maannalu ilinniartitsinermilu aaqqissuussineq qanoq ittoq pilersikkusunneqarnersoq paasiniarneqarpoq. Soorunami Danmarkimit allanillu kingornussisoqarnikuuvoq, taamaattorli ukiuni makkunani nammineq sorlaqarnermik aallaaveqarluni ilinniartitaanermi katiterisoqarniarpoq. Tamannalu uannut soqutiginarpoq isiginnittuuffigissallugu. Nunarsuarmi sumiiffinni allarpassuarni ilinniartitaaneq tamakkiisumik inissinneqareermat.

– Tamatuma saniatigut ilaquttakka ukiorpassuarni Kalaallit Nunaannukartuartuupput, uangalu nammineq ukiut 18-it matuma siornatigut Kangerlussuarmi najugaqarnikuuvunga, Christian Bundgaard oqarpoq, taassumalu pingaartippaa Ilisimatusarfik universitetiarannguusoq, qallunaat universitetiini takussaaqisutut ikusikkaaniuffiunngitsoq.

Ataqatigiilluarneq

Christian Bundgaardip aamma misigaa tikeraatut ilinniartut allat peqatigalugit ataqatigiilluartoqartoq.

– Ilisimatusarfimmiit tikeraajulluni ilinniartunut aaqqissuussinernik ataatsimoorlunilu sammisassanik aaqqissuussinerit aqqutigalugit suliniuteqarluartoqartarpoq. Tamanna isumaqarpoq akulikitsumik naapittartugut tamannalu ataqatigiilluarnermik nukittuumik kinguneqarpoq.

Danskit oqaasii allamiut oqaasiisut

Ataqatigiinnerup nukittunera Mette Gadegaardip (24) isumaqataaffigaa. Taanna Syddansk Universitetimi ”Interkulturel pædagogik og dansk som andetsprog”-imi (kulturit assigiinngitsut perorsaariaasiat danskillu oqaasiisa allamiut oqaasiisut ilinniarneqarnerat, aaqq.) ilinniartuuvoq.

Taanna Ilisimatusarfimmi isumaginninnermut siunnersortinngorniat ilinniagaasa ilaannik ilinniarpoq teologimillu fagimik ataatsimik ilinniarluni.

– Maanga tikeraarneq nuannerlunilu pissanganartorujussuuvoq. Aamma qallunaat oqaasii oqaatsit aappaattut ilinniakkannut naleqqulluinnarpoq. Ilinniakkanut tunngasunik eqqarsaatissilluarneqarpunga, Kalaallit Nunaanniinninnilu ilinniakkannut tunngatillugu periarfissinneqarluarpunga, tamaanimi inuppassuit danskit oqaasii allamiut oqaasiisut ilinniartarmatigit.

Kollegiami najugaqartut akornanni

Mette Gadegaardip paarlaasseqatigiilluni ilinniarnissani qinnuteqaatiginialeramiuk Kalaallit Nunaat eqqarsaatigivallaarsimanngilaa. Ilinniaqataatali Kalaallit Nunaannukaqatiserivaa, tamannalu peqqissimissutiginngilaa.

– Ilinniaqatiga, aamma maani Nuummi najugaqatigisara, siornatigut Sisimiuni ukioq ataaseq najugaqarpoq, taannalu oqaluttuarpoq assut nuannisarsimalluni. Inuttut attaveqatigiinnermut tunngatillugu aamma iluatsitsivunga kollegiami tikeraatut ilinniartut allat marluk peqatigalugit ineqarama, tikeraatulli ilinniartunut tamanut Facebookikkut gruppiliorsimavugut, taamaalilluta ataavartumik attaveqarfigisinnaavugut aaqqissuussinernullu ilaatigut nuannisaqatigiinnissamut qaaqqusisinnaaniassagatta. Maannamut tamanna ajunngilluinnarpoq, Mette Gadegaard oqarpoq.