Ilisimatusarneq: Raajap sananeqaataa immikkuullarissoq
ilisimasaqarfigileruk
Raajat issittup imartaaneersut nunarsuaq tamakkerlugu piumaneqarluartuupput, Royal
Greenlandillu puugutatsinnut apuuttartut annertunersaat uusutut qalipaajakkatullu
tunisassiarivai. Raajalli issittup imartaanersut qanoq ilisimasaqarfigaagut? Royal Greenlandip inuussutissarsiutigalugu ph.d.-nngorniartoq Signe Vangsgaard Lyngbymi
Danmarks Tekniske Universitetsimeersoq suleqatigalugu raajap timaa immikkuullarissoq
sukumiisumik ilisimatusarfigalugu aallartippaa.
Scanpix/Ritzau
Raaja ilisimatusarfigineqassaaq, raajap uumanerani pisut pingaarutillit raajat uusut qalipaajakkallu tunisassiarineranut pitsaassusaanullu iluaqutaasinnaasut paasiniarneqassallutik.
- Raaja qanorpiaq ittuunersoq paasiniarparput, ingammik qaleruani pissusissamisut taarseraangagu, Niels Bøknæs, suliniummi aqutsisoq RG Innovationimeersoq oqarpoq.
Signe Vangsgaardip raajat qalipaareernermi kingorna nerpiisa pitsaassusaat iluanaarutigineqarsinnaaneralu qaffatsissinnaasoq isumaqarami ph.d.-nngorniarluni allaatigisamini raajap qaleruaata taarsertarnera ukkatarivaa.
Raajap ukiuni arfinilinni uumanermini qalipani arlaleriarlun taarsertarpaa, ilisimatusarnermilu matumani qalipamik taarsiisarnerit tunisassiornermut iluaqutaasussanngorlugit qanoq pitsanngorsarneqarsinnaanersut ilisimatusarnermi misissorneqarpoq.
Pitsaassuseq qaffasissusaalu
Royal Greenland raajaanik Issittup imartaaneersunik tunisassiortut nunarsuarmi annersaraat, taamaammat Royal Greenlandip tunisassiorfiini Sisimiuniittumi Ilulissaniittumilu raajanik uusunik qalipaajakkanillu tunisassiornermi qalipaajaariaatsip pitsanngorsartuarnissaa pisariaqarpoq. Tamanna ukiut 20-30-it kingulliit sulissutigineqarpoq.
Signe aammattaaq paasisassarsiuutigaluni suliniutiminut misiliutissaminik aallerluni 2023-mi aasaanerani Royal Greenlandip tunisassiorfiani Sisimiuniittumiippoq.
- Ilisimatusarfinni ilisimatusartut uuttortaatinillu immikkuullarissunik atuisinnaammata suleqatigikkajuppagut, Niels Bøknæs oqarpoq.
- Ilisimatusartut sulinerminni tigussaasunik aallussaqarlutik amerlanertigut Kalaallit Nunaannut suliartorsinnaanertik soqutigivaat, taamaammallu suleqatigiinneq pissarsiaqarfiulluarpoq.
