Danmarks Tekniske Universitetip,
ilaatigut Sisimiuni immikkoortortaqarfeqartup, Spaniami umiarsualiorfik
Construcciones Navales P. Freire, S.A. umiarsualiornissamut
isumaqatigiissuteqarfigeqqammerpaa.
Umiarsuaq nutaaq Dana V-mik
atserneqartussaq, Issittumi, taamaalillunilu aamma Kalaallit Nunaata imartaani,
angallassinissamut sananeqassaaq.
Danmarks Tekniske Universitetip,
ilaatigut Sisimiuni immikkoortortaqarfeqartup, Spaniami umiarsualiorfik
Construcciones Navales P. Freire, S.A. umiarsualiornissamut
isumaqatigiissuteqarfigeqqammerpaa.
Umiarsuaq nutaaq Dana V-mik
atserneqartussaq, Issittumi, taamaalillunilu aamma Kalaallit Nunaata imartaani,
angallassinissamut sananeqassaaq.
Dana V Schweizerit ukusartuattut
assigiinngitsorpassuarnut atorneqarsinnaasunngorlugu sananeqassaaq.
Umiarsuaq ilisimatusarfissaq nutaaq
DTU-mit pigineqaraluarluni Naalagaaffeqatigiinnermi ilisimatusartunit tamanit
atorneqarsinnaassaaq, soorluttaaq Østersømi ukiukkut sikuusartumi EU sinnerlugu
ilisimatusarnernut atorneqartassalluni.
Nakkutilliineq, EU-p Aalisarnermut Politikkianut aamma EU-p avatangiisinut
inatsisiinut atatillugu Danmarkip pisussaaffigisaa, umiarsuup pingaarnertut
suliassaasa ilagaat.
Immami sikusimasumi ingerlasinnaasoq
- Dana V aammattaaq Naalagaaffeqatigiinni
suleqatigiinnermut tunngaviussaaq, soorlu immap naqqanik uuttortaasarnissamut
aamma imaani sikusimasumi nipinik misissuinermut, ilaatigut ujarassiorluni
misissuinermut avatangiisinillu nakkutilliinermut. Aammattaaq umiarsuaq
Kalaallit Nunaanniinnermini Illersornissaqarfiup Issittumi suliassaanut, soorlu
annaassiniarnernut ujaasinernullu, assartuinermut, immap naqqanik
uuttortaasarnissamut immaqalu nakkutilliinermut, tapersiisinnaassaaq, DTU-mi
siunnersortaaneq Peter Aagaard Brixen Sermitsiamut oqarpoq.
-
Taamaammat umiarsuaq ilisimatusarfissaq nutaaq 70 meterisut takitigisoq
ukiukkut Finlandip/Sverigep imartaani angalasinnaanngortinneqassaaq,
taamatuttaarlu Issittumi Sikuiuitsumilu kujallermi aasakkut ukiakkullu ukiup
aallartinnerani sikumi 1 meteritut issutigisumi angalasinnaanngortinneqassaaq.
Tarajumut
tapertaassasoq
Dana
V Tarajumut, Pinngortitaleriffiup ukiut pingasut matuma siorna pigiligaanut,
tapertaalluassasoq DTU isumaqarpoq.
- Tarajoq
aalisarnermik ilisimatusarnermut umiarsuaasoq nukittullunilu
atortorissaarluarami Atlantikup avannaani nunatsinnilu pissutsini
ilungersunartuni aalisakkat niuerutigineqartut agguataarneqarnerannut
aalisarfiusullu sammillugit aalisarnermik ilisimatusarnermik tamanik
suliaqarsinnaavoq. Umiarsuaq aamma immap naqqanut imarsuarnullu tunngasunik
ilisimatusarfiusinnaagami Pinngortitaleriffimmut, aammali ilisimatusarfinnut
assingusunut soorlu DTU Aquamut, ilisimatusarnernut umiarsuaavoq
pitsaalluinnartoq, Peter Aagaard Brixen nassuiaavoq.
- Umiarsuarnik
pitsaanerpaamik atuinissaq pilersaarutaavoq, tassa Tarajoq oqimaatsunik
atortussarpassuaqarluni aalisarnermik ilisimatusarnermut, Dana V-llu
ilisimasassarsiornerit assigiinngitsunik sammisaqarfiusut pisariaqassappallu
ilisimatusartunik amerlasuunik inuttaqartut immamut tunngasunik
assigiinngitsunik suliaqarfiusut suliarissavai.
- Piffissami
atorneqarsinnaasumi DTU-mit suliffeqarfinniillu allanit aalisarnermik
ilisimatusarnermut pingaarnermut atorneqarnissaa ilersaarutaavoq, Dana V-lu
ilisimatuunit assigiinngitsunik ilisimasalinnit, Kunngeqarfimmi Danmarkimi
suliffeqarfinnit assigiinngitsuneersunit kiisalu nunanit tamalaanit
suleqataasunit atorneqarnissaa pilersaarutaavoq. Tassani ingammik Issittumi
sulineq pingaaruteqaleriartuinnassangatinneqarpoq, DTU isumaqarpoq.
Dana
V inunnut 38-nut inissaqassaaq – 18-it ineeqqani ataasiittarissani 20-llu
ineeqqani marluuttarissani. Dana V siulini assigalugu
Hirtshalsimi Jyllandip avannaaniittumi tulattarfeqassaaq.
Dana
V-ip aningaasalersorneqarnera naalagaaffiup ilisimatusarnermut
immikkoortortaqarfianit tapiissutinit aamma A.P. Møllerip nuliatalu Chastine
Mc-Kinney Møllerip aningaasaateqarfianit tamarmiullutik 50 million koruuninik
kiisalu Aktieselskabet Dampskibsselskabet Orient’s Fondimit, tamatumalu
saniatigut DTU-p aningaasaliissuteqarneratigut pivoq.
Umiarsuup
nutaap akia DTU-mit oqaatigineqanngilaq, kisiannili akia minnerpaamik 370
million koruuniussasoq aningaasassaqartinneqareersorlu – aningaasallu sinneri
DTU-p nammineq pissarsiariumaarai ukiut marluk matuma siornatigut atuagassiami
Fiskeriforumimi oqaatigineqarpoq , taamaammat milliardit affaasa missaannik
akeqassasoq ilimagissallugu kukkunerussanngilaq.
Danmarkip
umiarsuaatai ilisimatusarfiusut annerit ukiut 100-t sinnerlugit Danamik
taaguuteqartarsimapput. Umiarsuit taakku immami uumasunik
ilisimasaqarnerulersitsisimallutillu Danmarkip nunatut ilisimatusarfiusutut
ilisarnaateqalerneranut tapersersuisimapput, DTU ilisimatitsivoq.
- Umiarsuaq
Dana I Sargassohavetimi Europami nimerissap tukertitsivigisartagaanik
1920/21-mi misissuivoq. Umiarsuaq Dana II atorlugu nunarsuarmi
ilisimatuussutsikkut misissuinerit siulliit ilaat 1928-30-mi ingerlanneqarpoq,
umiarsuullu Dana III-p Atlantikup avannaata imartai tamangajasa 1937-77-imi
misissuiffigai. Maanna umiarsuaq Dana IV 1981-imiilli angalasoq suli
suliassaqartarpoq: Umiarsuaq 2025-miinnaq ulluni 180-ini angalavoq.
