– Iliuuseqarnissatsinnut sapiissuseqarnerusariaqarpugut

Filmi piviusulersaarut "Grønlands Hvide Guld" saqqummernerata kingorna innuttaasunut ulloq unnuarlu eqqarsalersitsivoq.

Sermitsiaq Sisimiuni innuttaasut qanoq qisuariarnersut paasiniarlugu aqqusinermi apersugassarsiorpoq.

Malunnarpoq innuttaasut oqaaseqarusullutik tunuarsimaanngitsut.

Oqaaseqarusuttuni ilaavoq Miki Geisler, taassuma piviusulersaarut takusimallugu attorteqqassutigivaa.

- Assut attortinnarpoq. Makkua kalaallit qanga...Qanoq oqaatigisariaanerpoq. Nassuiaruminaappoq. Qanoq atornerlugaatigisimanerluta paasivara. Bloktilskudit sakkugineqartuaannartut qallunaat nunaannit oqaatigineqaqqittariaqanngillat. Politikerit allat piiaaviusimasut sukuminerusumik misissortariaqaraluarpaat, soorlu Inngili Qernertukkut, tamaavimmik.

- Uanga aamma kamaammerpunga

Jens Bechip piviusulersaarut takusimallugu qisuariarpoq. Taassuma innuttaasut qanoq qisuariarnersut maluginiarsimavaa:

- Kalaaleqatitulli allatulli kamannarisorujussuugaat maluginiarpara, uanga aamma qamuuna assur attortissutigaara. Sunaaffa taama pisoqarsimanikuunera assut mamiatsannaqaaq. Naalakkersuisut siulittaasuata qinersereernerup kingorna qaqilerniarpasimmagit nipangiutiinnarneqarniarpasinngilaq. Angusaqarnissaannik assut kissaateqarfigaakka. Pisunik malinnaassaanga. 

- Nukittuumik siuttoqartariaqassaagut

Sisimiuni innuttaasut ilaat, Kristian Kreutzmannip qanoq qisuariassalluni nalornissutigaa.

- Qisuariarfigissalluguluunniit ingasappoq, eqqarsaaterpassuit sarsuapput. Siuligut naammagittarsimat nalullugu suna iluanaarutaareersoq, illut qarmaliinnannguani najugaqartuarsinnarsimapput. Uffa aana nunatsinneersoq aniasoq, taamarsuaq nalilik. Apeqqutaaginnarpasippoq sukangalaartumik oqariarsinnaasumik siuttoqarnissarput. 

- Nutaarsiassaanngilaq

Innuttaasut ilaat tupaallanngilaq. Morten Siegstad isumaqarpoq tamakku qangali nalunngereerigut:

- Tupaallaatiginngiivippara. 1987-imi piviusulersaarut aallakaatinneqarnikoq "Et hul i jorden", paasissutissat tamarmik tassani erserput. Tupaallaatiginngilara. Nutaajunngilaq uannut. Uagut massakkut takusinnaasatsinni paasiinnarparput uagut nammineerluta qanoq iliuuseqarnissatsinnut sapiissuseqarnerusariaqarluta. Qunugisariaqanngilarput piiaanissaq aningaasat takkutissaqqaarmata. 

- 800 milliarderpassuupput

Bolethe Jessenip paasisani eqqarsaatigisorujussuuai.

- Aningaasat annissuunneqartut nipangiutiinnarneqarsimasut eqqarsarnarluni "Kalaallit Nunaannummita qanoq iluaqutaava?" Ivittuuni piiarneqartoq annertoq. Eqqarsariartorujussuuvunga. Taama aningaasat annertutigisut nunatsinninngaanniit annissorneqartut eqqarsaatigisorujussuuara suli, ullaaq aamma eqqaaqqippara "arraa, taavami?" Nipangiutiinnarneqartut taama annertutigisut. Uagutsinnut kalaallinut naammi iluaqutitaa?