Illersornissamut ilinniarfik nutaaq ammarneqarpoq 

Issittumi tunngaviusumik ilinniarfik Kangerlussuarmi pisortatigoortumik nalliuttorsiutigalugu atoqqaartinneqarpoq.

Kalaallit Nunaata Danmarkillu sivisuumik isumaqatigiinniareernerisa kingorna ilinniarfik piviusunngorpoq. Folketingimit 2021-p aallartinnerani Issittumi piginnaasanik annertusaanissamut isumaqatigiissummut atatillugu ilinniarfik aningaasaliissutigineqarput.

Tamatumali kingorna danskit sakkutuuisa amerlanerusut Issittumiinnissaat kissaatigineqanngimmat, taamani naalakkersuisut IA-meersut Naleqqameersullu, Kalaallit Nunaanni illersornissamut ilinniarfimmik pilersitsinissamut akuersisinnaanersut qularutigineqaleraluarpoq.

Kingusinnerusukkut piumasaqaatit isumaqatigiinniutigineqarput, 2022-milu upernaakkut isumaqatigiissut atsiorneqarpoq. Tamatuma kingunerisaanik ilinniartut sakkutuutut upalungaarsimanermullu tunngasunik piginnaanngorsarsinnaanngorput.

Pisortaq: Sillimaniarnermut politikki sukaterneqarpoq

Issittumi Sakkutooqarfimmi pisortaq Søren Andersen ammaanersiorluni oqalugiartut ilagaat, taassumalu ilinniarfik pissutsini ilungersunartorsiorfiusuni ammarneqartoq ilaatigut oqaatigaa:

- Sillimaniarnermut politikkimik sukateriffiusumi issittumi tunngaviusumik ilinniarfik pilersinneqarpoq, Naalagaaffeqatigiinnerup sakkutooqarnikkut tatiginartuuneranik inuiaqatigiillu ataatsimut isigalugit nukittuujunerannik nukittorsaataasussaq. Illissi siullersaavusi, taamaattumillu soqutigineqarluarlusi.

- Aqaguli ulluinnarni suliassat aallartissapput. Politikki pinnagu tamanna pingaarnerutissavat. Uniforminik tunineqassaasi suliassallu aalajangersimasut aallartissavasi, piginnaasanik nutaanik piginnaanngorsarniarlusi ataatsimoornermullu immikkut ittumut ilaalerlusi. Piffissaq pissanganassaaq ineriartorfiullunilu, nutaanik misigisaqarfiussaaq ataatsimoorfiullunilu immikkuullarissoq. Qilanaarutigisinnaavarsi, Søren Andersen inuusuttunut 22-nut ilinnialertuni siullernut neriuuteqarluartunut oqarpoq.

Nunaqarfimmiunut qujasoq

Ilinniarfiup pisortaata Simon Kokfeltip oqalugiarnermini Kangerlussuarmi innuttaasut illersornissaqarfimmi sulisunik ilinniartitsisunik tikilluaqqusinerat pillugu qutsavigai:

- Kangerlussuarmi najugaqarlusilu sulisartusi suleqataarusussuseqarlusilu paasinnikkumassuseqarassi qujamasuutigeqaara.

- Uniformit qorsuusunik atuineq sungiusimasatsinnit illoqarfimmi annertunerulaalerpoq. Qujanaq tikilluaqqugaatigut – aamma tikilluaqquneqartutut misigigatta. Ataasiussuseqarluta innuttaaqataallutalu, Simon Kokfeldt oqarpoq.

Qinnuteqartorpassuit

Ilinniartut ilaat sila pissutigalugu kinguaattoorsimasut sulilu Kangerlussuarmut apuutinngitsut, kingulliilli sapaatip-akunnerani tullermi ataasinngornermi marlunngornermilu tikinnissaat naatsorsuutigineqartoq Issittumi Sakkutooqarfik ilisimatitsivoq.

Inuusuttunit 236-nit ilinniarfimmut qinnuteqaataat Illersornissaqarfik tigusimavai, tamannalu iluatsilluarneranik ersersitsivoq.

Sakkutuunngorniarfimmi ilinniartut siunissami amerlinissaat illersornissamut ministerip Troels Lund Poulsenip naalakkersuisullu Vivian Motzfeldtip politikkikkut oqaloqatigiissutigalugit aallartisalereerpaat.