Illersornissamut isumaqatigiissut nutaaq pillugu eqqasuuteqartoq
Illersornissaqarfiup nukittorsarnissaanut maanna milliardilikkaanik aningaasaliissutit Kalaallit Nunaata qanoq iluaqutigitigissanerai Folketingimut ilaasortap Aaja Chemnitzip (IA) ernummatigaa. Isumaqatiginninniarnerit Kalaallit Nunaata tungaanit nukittuumik naammassineqarnissaat taamaattumik neriuutigaa.
- Isumaqatigiissutip Kalaallit Nunaannut iluaqutaanissaa ernumassutigaara, aningaasammi amerlanersaat atorneqareerput, Aaja Chemnitz oqarpoq.
Foto: Trine Juncher Jørgensen
- Isumaqatigiissut misissorluaqqissaartariaqarpoq Kalaallit Nunaat pillugu allassimasut nassaarissagaanni.
Illersornissamut ministerip Troels Lund Poulsenip marlunngornerup unnukkuani illersornissamut isumaqatigiissummi aningaasat agguataarneqarnissaat pillugu isumaqatigiissutip immikkoortuata aappaa saqqummiummagu folketingimut ilaasortaq Aaja Chemnitz oqarpoq.
Isumaqatigiissutip immikkoortuata aappaani 95 milliardit koruunit agguaanneqarput, Aaja Chemnitzillu oqaasii naapertorlugit 38 milliardit koruunit isumaqatiginninniutigineqartussaapput:
- Isumaqatigiissutip Kalaallit Nunaannut iluaqutaanissaa ernumassutigaara, aningaasammi amerlanersaat atorneqareerput, Sermitsiamut oqarpoq.
Nammineq piumassutsimik sakkutuunngorniarsinnaaneq nuannaarutigigaa
Isumaqatigiissummi nutaami erseqqissarneqarpoq Kalaallit Nunaanni innuttaasut namminneq kajumissutsiminnit sakkutuunngorsinnaasut, aamma Issittumi Sakkutooqarfiup umiarsuai nutarterneqartariaqarmata umiarsuarnik taarsersuinissamut pilersaarut ukiaru saqqummiunneqassasoq.
Umiarsuilli Issittumi atorneqartussat pingaarnersiorneqarnersut suli nalornissutigineqarpoq. Illersornissamut isumaqatigiissummi aningaasat taama agguataarneqartigereernerat ernummatigaa. Assersuutigalugu Kalaallit Nunaannimi angallanneq ilungersunartoqarsinnaasoq eqqarsaatigalugu iluamik inerniliiffigineqannginnera.
Aningaasat sinneruttut pillugit isumaqatiginninniarnermi Aaja Chemnitzip naapertorlugu Kalaallit Nunaat eqqarsaatigalugu uku pingaarnersiorneqartariaqarput:
- Angallanneq ilungersunartoq. Immap naqqatigut kabelip kipineqarpat Kalaallit Nunaanni inuiaqatigiit susinnaajunnaassapput. Taamaattumik immap naqqatigut kabelimik qaammataasanillu amerlanerusunik attaveqaatit nukittorsarneqarsinnaaqqullugit qulakkeerinnittoqartariaqarpoq.
- Isornartorsiuinerunngilaq
- 3 milliardit koruuninik angullugit naleqarsinnaavoq, taamaattumik Kalaallit Nunaat inaarutaasumik isumaqatiginninniarnermi ilungersortariaqarpoq, Aaja Chemnitz oqarpoq.
Kalaallit Nunaata isumaqatiginninniarnermi suliniutaanut isornartorsiuinerunani erseqqissarpaa, soqutigisalli amerlasuut pineqarnertut tikkuarlugu:
- Danskit partiivi ilarpassuisa danskit illersornissaminnut tunngasut pingaartippaat, politikeri oqarpoq.
Folketingimi amerlanerussuteqartut ukiut qulit tulliuttut ingerlaneranni illersornissaqarfiup nukittorsarnissaanut 190 milliardit koruunit atorniaraat Ritzau allappoq.
