Illersornissaqarfik nunatsinni annertusaavoq
Danmarkip issittumi illersornissaminut nukittorsaanissaata malitsigisaanik nunatsinni sakkutooqarnikkut aasaq manna annertusaasoqassaaq. Suliniutit nutaat arlallit inuiaqatigiinni isumannaallisaanermut tunngassuteqarput.
Kalaallit Nunaanni Issittumilu illersornissamut suleqatigiinneq Vivian Motzfeldtip Troels Lund Poulsenillu akornanni ingerlaqqippoq. Danmarkip Kalaallit Nunaanni annertusaanerit aasaanerani ingerlatissavai.
Foto: Leiff Josefsen
Illersornissaqarfiup Kalaallit Nunaanniaasap ingerlanerani sakkutooqarnerup upalungaarsimanerullu nukittorsarnissaannut suliniutit arlallit ingerlatissavai. Tamanna Danmarkip Issittumi illersornissaminut inissisimaffianik qulakkeerinninniarluni Kalaallit Nunaannilu innuttaasut isumannaatsuunissaannut tapersersuiniarluni periusissiap annertuup ilagaa.
Suliniutit ilaatigut ukuupput:
- Sakkutuut immikkut sungiusarsimasut ukiuunerani sungiusarnerat kiisalu attaveqaatinut pingaarutilinnut attuumasumik sungiusarnerit.
- Helikopterinik marlunnik (EH-101) ingerlatanik suliassanut ikorfartuutissanik tikisitsineq.
- Imartami isumagisassat nukittorsarnissaannut fregatimik tikisitsineq.
- Issittumi tunngaviusumik ilinniartut akuliunnerisigut, nunami attaveqaatinik pingaarutilinnik nakkutiginninneq.
- F-16-mik Kangerlussuarmi sineriammilu nakkutilliinermik sivikitsumik periarfissaqarluni tikisitsisinnaaneq.
Innuttaasut peqataatinneqassasut
Illersornissaqarfiup suliniutaanut Naalakkersuisut akuutinneqarput, ingerlaavartumillu nunaqavissut akuutinneqarnissaat kiisalu piffissap piniariartarfiit uumasullu piaqqisarneri eqqarsaatigalugit pilersaarusiornernut naleqqusaasoqarlunilu paasissutissiisoqassaaq.
Nunanut allanut Ilisimatusarnermullu Naalakkersuisup Vivian Motzfeldtip, S, kalaallit inuiaqatigiit isumannaallisaanermut peqataanissaat pingaaruteqartoq erseqqissaavoq:
– Isumannaallisaanermi politikikkut inissisimanerup illersornissaqarfiup Kalaallit Nunaanni, Kalaallillu Nunaata eqqaani ingerlatsisinnaanermik sungiusartarnissaa pissutissaqartippaa. Nunaqavissut akuutinneqarnissaasa qulakkeernissaat Naalakkersuisut pingaartitaraat, taamaalilluni uagut innuttaasutut nunatsinni isumannaallisaanermik kivitseqataanerput nukittorsarneqarsinnaaqqullugu. Issittumi Tunngaviusumik Ilinniartitaanermi atuartut suliassanik isumaginninnermi suleqataanissaat qilanaaraara, oqarpoq.
Suliniutit Naalakkersuisut, illersornissamut ministeri Troels Lund Poulsen aamma illersornissamut pisortaq Michael Wiggers Hyldgaard qanimut suleqatigalugit suliarineqarput.
Issittumi isumannaallisaanerup pitsanngorsarneqarnissaa
Illersornissamut ministerip oqaatigaa isumannaallisaanikkut politikkikkut pisariaqartoq nunap immikkoortuani upalungaarsimanerup annertusarneqarnissaa:
– Illersornissamut ministerinngoramali Issittumi isumannaallisaanerup nukittorsarnissaa pingaartippara, taamaammallu Naalakkersuisunik qanimut suleqateqarnera annertuumik iluarisimaarpara. Illersornissaqarfiup najuunnerata annertusarnissaani piffimmi pissutsit, Kalaallillu Nunaanni isumannaallisaanermi politikikkut unammillernartut immikkut isiginiarneqassapput, Troels Lund Poulsen oqarpoq.
Sakkutuut Kalaallit Nunaanni Issittumilu suliaqarnertik annertusarniarlugu pilersaaruteqarnikuupput, tamannalu 2023-mi saqqummiunneqartumi piginnaasanik annertusaanissamut pilersaarutinut ilaavoq. Issittumi sakkutuut sakkutuujunngitsullu piginnaasaannik ineriartortitsinissamut milliardilikkaanik aningaasaliisoqarpoq – ilaatigut nakkutilliinerup, attaveqatigiinnerup Kalaallit Nunaannilu oqartussanik suleqateqarnerup nukittorsarnissaannut.
Nuummi Kangerlussuarmilu sakkutuut naapikkit
Suliniutinut ilagitillugu innuttaasunut sammititanik aaqqissuussanik ingerlatsisoqartassaaq, tassani Nuummi fregatip Kangerlussuarmilu timmisartunut illorsuup tamanut ammatinnerisigut, taamaaliornermilu kalaallit innuttaasut Illersornissaqarfimmik piginnaasaanillu paasisaqarnerunissaq siunertaavoq.
