Avatangiisinut illersuiniaq Paul Watson maanna Nuummi pinerluuteqarsimasunut inissiisarfimmi qaammatini pingasuni tigummigallarneqarsimalerpoq. Kingullermik Nunatta Eqqartuussissuneqarfiata Nunatsinnilu Eqqartuussiviup isumartik malillugu – aamma 2010-mi pisumit videoliat illersuisut takutitaat takoreerlugit - Japanimit uppernarsaatissatut tunngavigineqartut itigartinniarnagit erseqqissuliorput.
Allatut oqaatigalugu Japanimit uppernarsaatissat qulaajarnissaanut immikkut periusissaqartoqanngitsoq eqqartuussivik isumaqarpoq.
Avatangiisinut illersuiniaq Paul Watson maanna Nuummi pinerluuteqarsimasunut inissiisarfimmi qaammatini pingasuni tigummigallarneqarsimalerpoq. Kingullermik Nunatta Eqqartuussissuneqarfiata Nunatsinnilu Eqqartuussiviup isumartik malillugu – aamma 2010-mi pisumit videoliat illersuisut takutitaat takoreerlugit - Japanimit uppernarsaatissatut tunngavigineqartut itigartinniarnagit erseqqissuliorput.
Allatut oqaatigalugu Japanimit uppernarsaatissat qulaajarnissaanut immikkut periusissaqartoqanngitsoq eqqartuussivik isumaqarpoq.
Tamatuma saniatigut tigummigallarneqarneq Paul Watsonip pinerluutigisimasaanut sanilliullugu, japanimi oqartussat malillugit japanimiut arfanniutaannut saassussinermut peqataaneranut, inatsisillu unioqqutillugit arfanniat suliaminnik ingerlatsinerannik akornusiiniarnermi, sivisuallaartutut isigineqarsinnaanngitsoq eqqartuussivik aamma isumaqarpoq. Saassussinermi aamma umiarsuarmi inuttaasumik ajoqusiisimasutut unnerluutigineqarpoq.
Eqqartuussisarnermi periuseq misissorneqassaaq
Paul Watson eqqartuussissuserisualu Jonas Christoffersen naapertorlugit, iliuuserineqartoq sivisuumik tigummigallarneqarneranut naapertuutinngilaq, taamaammallu eqqartuussisarnermi periutsinut itisiliiumapput.
– Maanna Paul Watsonip pinerluuteqarnermini pineqaatissiissutissaata takutinnissaa aallutissavarput – tamatumani japanimiut oqartussaasut oqarnerattulli pisimanera tunngavissaatissagaanni – maanna tigummigallarneqarnerup sivisussusaanik tamanna tunngavissiisinnaanngitsoq takutinniarlugu, Jonas Christoffersen Sermitsiamut oqarpoq.
– Tippassaammik umiarsuarmut ingeriussineq unnerluussisup Kalaallit Nunaanni aqqusinermi aallaasersornermut sanillersuussinera tupaallaatigisorujussuuarput. Taamatut sanillersuussineq ingasattajaarnerujussuuvoq. Nunatta Eqqartuussissuneqarfiata sooq taamatut isiginninnini erseqqinnerusumik tunngavilinngilaa.
– Taamaalilluta maanna Rigsadvokatip Justitsministeriaqarfiullu Paul Watsonip tunniunneqarnissaa tunniunneqannginnissaalluunniit pillugit aalajangiinissaa suli utaqqivarput. Kalaallit Nunaanni Politiit misissuinerisa naammassineqarsimanerannik isumaqarnerat isumaqatiginatigu taakkununnga nalunaarutigereerparput. Paul Watson Japanimut tunniutissagutsigu, suut tamarmik misissorneqartariaqarput, Jonas Christoffersen oqarpoq.
Politikikkut qimaasoq
Paul Watson Japanimi pisuutinneqassaguni ukiut 15-it angullugit parnaarussaariataarsinnaasoq, tusagassiorfiit nunanit allaneersut allapput. Taamak sakkortutigisumik pillaaneq taassuma inuttut pisinnaatitaaffiinik sanioqqutsinertut isigineqarsinnaagunarput. Tamannalu Danmarkip tunniutissallu toqqassappagu, taakku ilanngullugit isiginiartariaqarpai. Paul Watson amerikamiutut-canadamiutut inuttaassuseqartoq Frankrigimi, Kalaallit Nunaanni juulimi tigummigallagaalernissani sioqqullugu nulianilu meeqqatillu marluk najugaqarfigisamini politikikkut qimaasutut isigineqarumalluni qinnuteqarpoq.
– Justitsministeriap suliaa tunniussisarnermik inatsit malillugu ingerlavoq, tassanilu Japanimut tunniunneqassappat, taassuma inuttut pisinnaatitaaffiisa unioqqutinneqarnissaat aarlerinaateqarnersoq nalilissallugu naapertuuppoq. Frankrigip aamma taassuma inuttut pisinnaatitaaffiisa unioqqutinneqarnissaanik apeqqummut isummerfiginnippat, tamanna aamma soorunami Danmarkimi suliamut sunniuteqassaaq. Taamaalilluni politikikkut qimaasutut isigineqarnissamik Frankrigip aalajangernera Danmarkillu tunniussisarnermi inatsimmi tunngavissai imminnut quleriinnersut apeqqutaalluinnarpoq, Jonas Christoffersen oqarpoq.
Paul Watsonip illersuisui suliap Eqqartuussiviit qullersaanni misilinneqarnissaanik Procesbevillingsnævnimit akuerineqarput. Tamatumalu qaqugu pinissaa suli ullulerneqanngilaq.
Paul
Watsonip tigummigallarneqarnera sapaatip-akunnerini pingasuni, tassa novembarip
13-iata tungaanut, pingasunngornermi sivitsorneqarpoq.
