Illiua iluanaarluni 1,4 millionit koruuninik eqquisoq?
Nunatsinni innuttaasoq tallimanngormat Eurojackpotimi eqqugassat pingajuannik 1,4 millionit koruuningajannik eqquivoq.
Eurojackpotimi eqquereernerup kingorna nunatsinni millionærimik imminut taasoqarsinnaanngorpoq.
Leiff Josefsen
Sapaatip-akunnerata siuliani millionærinngortunik tallimanik nutaanik Danske spil toqqaasinnaasimavoq, taakkualu ilaat ataaseq Kalaallit Nunaanni Brugsenimi Eurojackpot-imik pisisimavoq. Illoqarfimmi sumi pisiaanersoq ilisimatitsissutaanngilaq.
Eurojackpotimi eqqugassaq anneq, maanna 621 millionit koruuninik nalilik, eqqorneqanngilaq.
Eqqugassalli pingajuat 1.399.626 koruuniusoq aamma nuannaarutaalluarsinnaavoq.
Sapaatip-akunneranut marloriarluni makitsineq
Eurojackpot eqquiniaanerni annerpaanik eqquisitsisarpoq. Marlunngornerit tallimanngornerillu tamaasa makitsisoqartarpoq, eqqugassallu minnerpaamik 63 millionit koruuninit amerlanerpaamik 750 millionit koruuninut amerlassuseqartarput.
- Danmarkimi eqqugassamik annerpaamik eqquisoq 2022-mi aasakkut eqquivoq, tassanilu qallunaaq iluatsitsisoq Eurojackpot-imik Meny-mi Blåvandimi pisiaqarluni 750 millionit koruuninik eqquivoq, tusagassiuutinut nalunaarummi tamanna ilisimatitsissutigineqarpoq.
