– Illoqarfik ineriartortuuppat maaniiginnassagaluarpunga. Kisianni massakkut Kitaaniikkusunneruvunga

28-nik ukiullip Moses Nukop matut matummagit ini isersimaffigisaat taarsivoq, seqersittakkallu qaamanera iikkamut saqqaqqasoq kisimi qaammaqqutaalerpoq.

Inuusuttut marluk, iikkamut seqersittakkap saqqaqqasaanut saallutik, spilip aquutaanik tamarmik immikkut tigummiarput.

Spilli nuannarineqaqisoq FIFA spilerpaat. Aquullu paarigamikku arsaatsitatik namminneerlutik aqussinnaavaat. Moses Nukolli siunissani nammineerluni aqussinnaanngikkallarpaa. Illersornissaqarfiup ataani Issittumi Tunngaviusumik Ilinniarneq naammassereerlugu Illersornissaqarfiup iluani ilinniarluni ingerlaqqikkusuppoq. Umiarsuarnimi alapernaarsuutini sulilerusukkami sakkutuut imarsiortut ilinniarfiannut qinnuteqarnikuuvoq.

Angutit inuusuttut taakkua marluk Tasiilami inuusuttut kulturikkut illuanneerujoorput. Isersimaffigisaat inuusuttut 15-it 30-llu akornanni ukiullit ornittagaraat. 

Moses Nuko arlalinnik angorusutaqarpoq. Taakkuli tamarmik piviusunngussappata illoqarfimminit aallartariaqassaaq. 

- Immaqa oqaraanni Tasiilaq ineriartunnginnami imatorsuaq. Illoqarfik allanngornani taamaarusaaginnaavittoq, siumut ingerlanani. Najornissaa eqianaq, taava kitaanut pigaanni illoqarfiit allat ineriartortut.

Moses Nuko unammisaminut Thomas Utuangemut ajorsarpoq. Ajorsarninili soqutigivallaanngilaa, inuusuttummi kulturikkut illuanniikkaangami qiimmaallaatigiuaannarpaa.

- Angerlarsimaannaraangama susassaaleqinartarnermik. Qasunartarnermik sineqattaarluni. Taava soorlu eqeersaataa maaneerujoortarpunga, Moses oqarpoq.

Inuusuttut takorluugaqarsinnaasariaqarput

40-nik ukiullip Hans Poul Andersenip inuusuttut ilaat isersimaartarfimmi skakeqatigaa. Hans Poul Andersenip tamaani pisortaagami inuusuttut takkuttartut siunnersortarpai, killiffigisaalli ataqqillugu naligisutut perusunnerusarpai.

- Inuusuttut soqutigisaat pillugit qanorlu ikiorsinnaanerlugit apersortarpagut. Assersuutigalugu ullaakkut makinniarnerminnik ajornartorsiuteqarpata ullaat tamaasa arfineq-pingasunut kaffilioriartortassasut oqarfigisarpagut, Hans Poul oqarpoq nangillunilu.

- Inuusuttut annertugisassaanngikkaluartunilluunniit iluatsitaqartutut misigisarnissaat pingaarutilerujussuuvoq. Iluatsitaqartutummi misiginimik  amerliartuinnarnerini piumassusinillutillu imminnut upperiartuinnalissapput, allaat takorluugaqalersinnaallutik.

Takorluukkalli ilaat tamaani piviusunngortinnissaat ajornakusoorpoq. Inuusuttunut neqeroorutit Tasiilami ikittuinnaasut Hans Poul Andersenip oqaluttuaraa, taamaammat inuusuttut sumiiffinnut allamukarnissaannik kaammattortarpaat.

- Nunarsuarmi periarfissarpassuit ammasumik maani oqaluuserisarpagut. Tasiilammi avataani aamma periarfissarpassuupput. Maani Majoriap saniatigut allanik ilinniarfissaqanngilaq, inuusuttullu praktikkerfigisinnaasaat amigaatigaagut.

Hans Poulip illoqarfiup periarfissaqarnerunissaa nammineerluni aamma angorusuppaa. Aalisarnermimmi ilinniarfeqalernissaa inuusuttut kulturikkut illuata Royal Greenland suleqatigalugu angorusuppaa. Taassuma saniatigut nunanit allaneersunit suleqateqarnermikkut inuusuttut takornarialerinermik ilinniartillugit aallartinnikuuaat. Inuusuttut tallimat tassani ilinniarlutik aallartinnikuupput, aasarulu naammassissallutik.

- Ilinniaqqikkusukkaanni maani periarfissakitsuararsuuvoq, takornarialerinerli allagartartaarfigisinnaagaanni nunarsuarmi tamarmi atorneqarsinnaavoq. Takornarialerinermik aalaakkaasumik pikkorissartitsisarnissarput isumaqatigiissutigeqqammivarput.

Atuarfiusinnaasut Tasiilami amerlanerunissaat Hans Poul Andersenip neriuutigaa.

- Maani efterskoleqalertuuppat illoqarfimmut iluaqutaassagaluaqaaq. Kitaani illoqarfiit, allaat maanngaanniit mikinerusut, ilarpassui efterskoleqanngikkunik højskoleqarput.

Hans Poul Andersenip qanoq periarnissani eqqarsaatigeqqissaarpaa. Pitsianngitsoq qungujulluni oqariasaarpoq: “Skak”. Unammisaatali periapallannermini ajorsarnissaraluani pinngitsoortippaa. Siullermeerlutik skakimik unammilinngillat, aamma unamminerat kingulliugunanngivippoq. Hans Poulip inuusuttut kulturikkut illuanni sulinini iluarisimaaraluarlugu inusserpiassaaraangami ajortumik isigineq ajorpaa.

- Maani illumi takussaaraangatsigit iluatsitaqartutut misigisaqarpunga. Aggissaarsimagunimmi imaassinnaasoq ilinnialersimasut. Taamaattoqarnissaa neriuutigiinnarsinnaavara, Hans Poul oqarpoq.

Kiserliunnginniassagama maanngartarpunga

19-inik ukiulik Kamma Ignatiussen isersimaartarfiup teqeqquisa ilaanni TikTokerujuujutaa suuffami issiaarpoq, isersimaqataasullu ilaat quiasaarsimariaraangat illaqataasarluni. Kamma suliffeqanngilaq maanngartuartarlunilu. 

- Kiserliorlunga qiimarpiarnanga uagutsinninngaanniit aniguma maanngaraangama nuannisalertarpunga, Kamma oqarpoq nangillunilu.

- Tissinartunik oqaluttualeraangata nuannertarpoq imaluunniit spilleraangata kamarujullutik.

Kamma Ignatiussenip Tasiilaq najuinnarusuppaa. Ilinniartitsisunngorusukkamili  takorluukkani anguniaruniuk Kitaanut ilinniariartariaqarpoq.

- Maani ilinniartitsisunngorusuppunga Tasiilami. Ilinniartitsisut amigartartut tusartarakku, aamma ilinniartitsisunik ilinniarsimasoqarpiannginnami, Kamma oqarpoq.

Moses Nuko Thomas Utuangelu FIFA-reerlutik issiaartarfimmukarlutik oqalorusaarput. Moses Tasiilamiiginnarusulissappat susoqartariaqarnersoq aperaarput. Illoqarfimmi Mosesitulli anguniagaqartunik pisariaqartitsivoq.

- Asuki. Nalugakku suna, qanoq. Soorunami illoqarfik ineriartortuuppat maaniiginnassagaluarpunga. Kisianni massakkut Kitaaniikkusunneruvunga.