Illoqarfinni tallimaannarni aalajangersimasunik nakorsaqarpoq

Nakorsat aalajangersimasumik atorfillit, tassa qaammatit aqqaneq-marluk sinnerlugit sulisimasut, taamaallaat Sisimiuni, Aasianni, Tasiilami, Nuummi aamma llulissani pigineqarput. Qaqortumi septembarip allaqqaataani aalajangersimasumik nakorsaqalissaaq.

Paasissutissat taakku Peqqissutsimut Naalakkersuisup Agathe Fontainip Siumumi politikerimut Anders Olsenimut paragraf 37 naapertorlugu akissutaani atuarneqarsinnaapput.

Illoqarfinni aqqanilinni nakorsat piffissami sivikitsumi atorfeqarput, tassa qaammatit aqqaneq-marluk inorlugit sulisimapput. Illoqarfiit uku pineqarput: Qaanaaq, Upernavik, Uummannaq, Qasigiannguit, Qeqertarsuaq, Maniitsoq, Paamiut, Ittoqqortoormiit, Narsaq, Nanortalik aamma Qaqortoq.

Unammilligassaq annertooq

Peqqinnissaqarfimmi sulisunik amigaateqarneq, nakorsat ilanngullugit, Avannaamioqatigiinni tamani ajornartorsiutaasoq Agathe Fontainip paasissutissiissutigaa. Nakorsanik sulisussarsiorneq aamma sulisoriinnarneqarnissaat nunat allat annertuumik unammilleqatigineqarput, "Kalaallit Nunaat tassani aningaasarsiatigut aamma sulinermi atukkatigut unammillersinnaanngilaq."

- Tamatuma saniatigut peqqinnissaqarfimmi pisariaqartitsineq matussuserniarlugu kalaallit nakorsanngortartut amerlanngillat, taakkunanngalu amerlasuut Danmarkimi nakorsatut ilinniarsimasunngortut Kalaallit Nunaannut utertanngillat, Peqqissutsimut Naalakkersuisoq akissummi allappoq.

2023-mi peqqinnissaq pillugu isumaqatigiissut atsiorneqarpoq, tassanilu nakorsat atorfinitsinneqarnissaannik, sulisinneqartuarnissaannik ilinniartitaanissaannillu qulakkeerinninniarluni pilersaarusiortoqarpoq.

Ukiut 1-3 iluanni suliniutit:

• Peqqissutsimut tunngatillugu isumaqatigiissut 2023-mi Peqqinnissaqarfiup sulisussarsiornermut immikkoortortaqarfia aningaasaliinerit ukiumut 2 mio. kr.- nik amerlineqarneritigut nukittorsarpaa.
• Peqqissutsimut Naalakkersuisoqarfimmi Suliniutinut allattoqarfik Peqqinnissaq pillugu Ataatsimiititaliarsuup innersuussutaasa atulersinneqarnissaannik suliaqarpoq, nunanit allanit sulisut tassani ilaapput. Sulisut eqimattat taakku nutaat iluatsilluartumik atuutilersinneqarnissaat qulakkeerneqarnissaa.
• Susassaqarfiit akimorlugit suleqatigiinnit ataqatigiissakkamik ilinniartitaaneq

Ukiut 5 iluanni suliniutit:

• Ilinniakkani peqqinnissamut tunngasuni pissutsit pitsanngorsaavigineqassapput.
  

Agathe Fountainip aamma oqaatigaa atorfinititsiniarneq assigiinngitsutigut ingerlanneqartoq, ukunani nassuiarlugu:

• Attaveqarfiit aqqutigalugit toqqaannartumik sulisussarsiorneq.
• Inoqatinut attaveqaatini nittarsaassinikkut.
• Nakorsanut atorfimmik inuttassarsiuisarfitsigut.
• Peqqissutsimut tunngasunik saqqummersitsinerni ataatsimeersuarnernullu peqataanikkut.
• Peqqissutsimut tunngasunik ilinniarsimasunut qaammatikkaartumik soraarnerup nalaani aaqqissuussaqarnikkut.
• Danskit napparsimmaviinut paarlaaqatigiinnissamik aaqqissuussinikkut, sulisut Kalaallit Nunaannukarlutik piffissami aalajangersimasumi suliartortarnerisigut.