Tassaarsuaqarnera
pissutaalluni nunaqarfik aalisartoqarfiusoq Illorsuit Uummannap eqqaaniittoq
2017-mi matuneqarpoq, tassanilu innuttaasut taamanikkut qimagussorneqarput.
Tamatuma kinguninnguatigut Peqatigiiffik Illorsuarmiut pilersinneqarpoq,
tassani innuttaasut nunaqarfimmut uterlutik nuunnissaat siunertarineqarluni.
Tamannali suli pinngimmat nunaqarfik nunaqarfittut allatuulli tamakkiisumik
ajornaquteqanngitsumillu nuuffigineqarsinnaanersoq pillugu Inatsisartunut aamma
Folketingimut ilaasortaq Aki-Matilda Høegh-Dam, Naleraq, paragraf 37
naapertorlugu Naalakkersuisunut apeqquteqarpoq.
Tassaarsuaqarnera
pissutaalluni nunaqarfik aalisartoqarfiusoq Illorsuit Uummannap eqqaaniittoq
2017-mi matuneqarpoq, tassanilu innuttaasut taamanikkut qimagussorneqarput.
Tamatuma kinguninnguatigut Peqatigiiffik Illorsuarmiut pilersinneqarpoq,
tassani innuttaasut nunaqarfimmut uterlutik nuunnissaat siunertarineqarluni.
Tamannali suli pinngimmat nunaqarfik nunaqarfittut allatuulli tamakkiisumik
ajornaquteqanngitsumillu nuuffigineqarsinnaanersoq pillugu Inatsisartunut aamma
Folketingimut ilaasortaq Aki-Matilda Høegh-Dam, Naleraq, paragraf 37
naapertorlugu Naalakkersuisunut apeqquteqarpoq.
Piginnittussaatitaanermik
inatsit tunngavigalugu innuttaasut Illorsuarni najugaqaqqilissanerlutik
kissaateqartut taamaaliornissartik pisinnaatigaaffigigaat, kisiannili
nunaqarfik navianartutut suli nalilerneqarmat siornatigutut pisortat
kiffartuussinerat aallarteqqinneqarsinnaanngitsoq, Isumaginninnermut,
Suliffeqarnermut, Nunamullu Namminermut Avatangiisinullu Naalakkersuisoq
Bentiaraq Ottosen, Atassut, akissuteqarluni allappoq.
Innuttaasut
nunaqarfimmut uteqqikkusuttut periarfissaat pillugit Naalakkersuisunit
ataatsimeeqatigineqartariaqartut, Peqatigiiffik Illorsuarmiut siulittaasua
Dorthe Qvist oqarpoq.
Avannaata
Kommuniani kommunalbestyrelsimi ilaasortaq Ole Møller, Naleraq, naapertorlugu
nunaqarfiup inoqaleqqinnissaa pillugu apeqqut kommunalbestyrelsimi
oqaluuserineqarnikuunngilaq, pineqartorli pillugu nalilersuisoqarnissaa
pisariaqartoq, taanna isumaqarpoq.
Suli
navianartoq
Nunamut
Namminermut Naalakkersuisoq Bentiaraq Ottosen naapertorlugu Illorsuarni
najugaqartut pinngitsaalillugit nuutsinneqanngillat, kisiannili nunaqarfiup
navianarnera oqartussanit nalilerneqarmat qimagussortinneqarlutik. Nunaqarfillu
pinngitsaalisamik matuneqanngitsoq, taassuma erseqqissaatigaa. Illorsuit
inoqaleqqissappat pisortat naliginnaasumik sullissinissaq, pilersuinissaq,
atuartitsinissaq, ajornartoornermi ikiunissaq allanillu sullissinissaq
pisussaaffigaat. Kisiannili sumiiffimmi innuttaasut isumannaatsumik
atugaqarnissaat qulakkeerniarlugu pisortat sillimaniarnikkut iliuusissanik
tamanik aalajangersaanissaminnut pisussaaffeqartut, akissummi erserpoq.
Upaluungaarsimanermut
Ataatsimiititaliap Umiammakku Nunaani qaqqat sisoorsinnaanerinut tunngatillugu
pissutsit inissisimanerinut, sumiiffinnilu pineqartuni qaqqat sisoornerisa
kingunerisaanik tassaarsuaqarsinnaaneranut upalungaarsimanermut suliatigut naliliinera
kingulleq naapertorlugu Illorsuit sumiiffittut inissisimaffigissallugu
navianartutut suli isigineqarpoq.
Inuussutissarsiornermut,
Aatsitassanut, Nukissiuutinut, Inatsisit Atuutsinneqarnerannut
Naligiisitaanermullu Naalakkersuisoqarfik ukiut kingulliit tallimat
ingerlanerini Umiammakku Nunaani aamma Kangerluarsummi alapernaarsuinermut
atortunik qajannaatsunik marlunnik suliaqarsimavoq, taakkulu ujarassiuunit
ullut tamaasa nakkutigineqartut, Bentiaraq Ottosen paasissutissiivoq.
- Alapernaarsuinermut
atortut taakku siusinnerusukkut ilimasaarutitut atorput taamaattumillu aamma
innuttaasunut sumiiffimmiittunut aarlerinaateqarneranik annertuumik
annikillisaataallutik, Illorsuarni sumiiffik ilanngullugu.
- Alapernaarsuinernut
atortut maannamut takutippaat qaqqat sisoorneranik annertuumik
pisoqaqqajaanngitsoq. Aarlerinaateqarnerali annertusitillugu
alapernaarsuinermut atortut piffissami pisumi nakkutilliinermut
annertusarneqarsinnaapput, piffissaatillugu illersuinissaq qularnaarniarlugu,
Naalakkersuisoq paasissutissiivoq.
Ukiut
tulliuttut 50-it iluanni qaqqat sisooqqissinnaanerat annertuumik
aarlerinaateqartutut nalilerneqarpoq, taamaattumillu innuttaasut Illorsuarnut
utissappata killilersuinerit arlallit atuutsinneqassasut, tamannalu
nuunnginnermi eqqumaffigineqartariaqartoq akissummi ilaatigut erserpoq.
Sillimaniarneq
pingaaruteqartoq
Naalakkersuisup
paasissutissiinera naapertorlugu innuttaasut eqqumaffigisariaqagaat siulleq
tassaavoq sumiffimmut nuunnerminni inatsisit atuuttut tamaasa
atuutsinneqaannassammata, tassunga ilanngullugit sillimaniarnermut
isumaginninnikkullu najoqqutassat tamarmik aamma ilaapput.
- Tassunga
atatillugu erseqqissarneqassaaq sumiiffimmi illumut piginnittussaanermi
sanaartornermi teknikkikkut sillimaniarnikkullu malittarisassat
atuutsikkunnaarneqassanngimmata.
- Taamatuttaarlu
naatsorsuutigineqassalluni sumiiffimmut navianartumut meeqqanik nassassagunik
isumaginninnermi oqartussaniit pisussaaffigineqassammat naliliiffigissallugu
sumiiffimmut nuuttoqarnera meeqqap illersugaanissaanut naapertuunnersoq.
Illorsuarnut
nuuttoqassappat ajunaarnersuup siornatigut sullissinerup qaffasissusiata
assinganik sullissisoqarnissaa naatsorsuutigineqarsinnaanngilaq, tassungalu
Kalaallit Nunaanni sullivinni avatangiisit pillugit inatsisit naapertorlugit
pisortat sulisuminnut sulinermi avatangiisinik isumannaatsunik
qulakkeerinninnissamik saneqqunneqarsinnaanngitsumik pisussaaffeqarnerat
pissutaasoq, akissummi aamma erserpoq.
Atuarfik
ammarneqarsinnaanngitsoq
Sulinermi
avatangiisit isumannaatsuunissaannut piumasaqaatit naammassineqarsimanngippata,
Illorsuarni meeqqat atuarfiannik pilersitsisoqarsinnaanngitsoq, taamaalillunilu
atuartitsinissamik neqerooruteqartoqarsinnaanngitsoq, Aki-Matilda Høegh-Damimut
akissummi erserpoq.
- Taamaattumik
meeqqat atuarfiat pillugu Inatsisartut inatsisaat naapertorlugu angajoqqaat
atuartussaatitaasutut ukiulinnik meerallit Illorsuarnut nuunnissartik
toqqarunikku, inatsisit atuuttut naapertorlugit meeqqat atuartinneqarnissaasa
qulakkeernissaannut tamakkiisumik akisussaassuseqarnertik atuutiinnassanersoq
eqqumaffigissavaat, Bentiaraq Ottosen paasissutissiivoq.
Taamatut
pisoqartillugu atuartitsineq angerlarsimaffinni isumagineqassaaq,
kommunalbestyrelsimulli allakkatigut nalunaaruteqarnissaq ingerlaavartumillu
nakkutilliinissaq pisariaqassaaq. Atuartitaanerup meeqqat atuarfianni
piumasaqaatinut naapertuunnissaa angajoqqaanit aamma qulakkeerneqartussaavoq,
tassunga ilanngullugu misilitsinnernut nalilersuinernullu peqataanissaq aamma
piumasaqaataasoq, paragraf 37-mit apeqqutigineqartumut akissummi erserpoq.
Innuttaasut
Illorsuarnut uteqqikkusuttut
Peqatigiiffik
Illorsuarni siulittaasup Dorthe Qvistip oqarnera naapertorlugu Illorsuarni
najugaqarsimasut arlallit nunaqarfimmut uteqqinnissartik suli kissaatigaat.
- Innuttaasut
Illorsuarnut uteqqikkusuttut pisortaniit qanimut naapinneqarnissaat
pisariaqarpoq, taanna oqarpoq.
Illorsut
inoqaleqqissinnaanissaat Avannaata Kommuniani kommunalbestyrelsimi
eqqartorneqarsimanngitsoq, kisiannili suli nuukkusuttoqarpat tamanna
oqaluuserineqartariaqartoq Avannaata Kommuniani kommunalbestyrelsimi ilaasortaq
Ole Møller, Naleraq, Nuugaatsiarmiuusoq, oqarpoq.
Illorsuit
eqqaani qaleraleqarluarpoq, taamaattumillu nunaqarfik ukioq tamaat suli
najorneqartartoq, Ole Møller maannakkut Uummannami najugaqarpoq aammalu
aalisartuusoq oqarpoq.
