Illu ikuallattoq - umiatsiaaqqamik aallarussisut orsussaaruttut

Tasiilami illumik ikuallattoqartoq Kalaallit Nunaanni Politiit sisamanngornerup unnuaani nal. 01.15 nalunaarfigineqarput.

Illu najuqarfigineqanngitsoq Prinsessevejimiittoq ikuallattuusoq pigaartut pisortaat Jørgen Madsen oqarpoq.

Politiit qatserisartullu ornigupput, illorli nungulluni ikuallappoq.

Ikuallattoqarnerani inunnik ulorianartorsiortoqanngilaq, aamma illunut allanut siaruaannissaa aarlerinanngitsoq pigaartut pisortaat oqarpoq.

Tasiilami politiit ikuallatsitsisoqarsimaneranik maanna misissuipput.

Tillinniat inuusuttut orsussaaruttut

Umiatsiaq qaqortoq tillinneqartoq Nuummi politiit nalunaaqutaq 01.52 nalunaarfigineqarput.

Nukappiaqqat marluk 18-it inorlugit ukiullit umiatsiaq aallarteriarlugu aallarussimagaat Jørgen Madsen oqarpoq.

Ajoraluartumik Nuup eqqaani taakku orsussaruttoorput.

- Motoriat unittoormat aaneqaqqullutik namminneq sianersimapput, Jørgen Madsen oqaluttuarpoq.

Ilisarisimasaasa talittarfimmut aavaat, politiilli umiatsiap piginnittua suli inuttarsinngilaat.

Taamaattumik Nuummi umiatsiaaqqamik qaqortumik qalipaatilimmik tammaasaqartoqarpat politiinut saaffiginneqqittoqarsinnaasoq Jørgen Madsen oqarpoq.

Pisiffimmut tillinniartoqartoq

Maniitsumi pisimasumi allami politiit takunnissimasinnaasunik ujartuipput.

Pisiffimmi tillinniartoqarneranik kalerrisaarut nalunaaqutaq 04.31 aallartippoq. Politiillu ornigutsinneqarput.

- Pisimasoq misissuiffigineqarpoq, innuttaasunilli nalunaaqutaq 04.30 missaani takunnissimasoqarpat paasisaqarfigerusuppavut, Jørgen Madsen oqarpoq.

Politiit oqarasuaammut uunga attaveqarfigineqarsinnaapput: 70 14 48.