Illu oqaluttuarisaanermut pingaarutilik kommunip annaanniarpaa
Sisimiuni utoqqaat peqatigiiffiata illu 1 koruunilerlugu kommunimit pisiartik aserfallatsaaliornissaanut akissaqartinngilaat. Maanna illu annaanniarlugu kommunip utertillugu pisiariniarpaa.
Dorthea Reimer-Johansen
Illu qisuusoq aappalaartumik qalipaatilik qaqortunillu igalaalik 1907-imi napparsimavittut nakorsallu illuattut sanaaq Sisimiuni ippoq.
Sisimiuni innuttaasut illu ukiunik 100-nik pisoqaassusilik qularnanngitsumik ilisarisimavaat, takornariallu illoqarfimmut tikeraartut takusimassajunnarsivaat.
Illu aappaluttoq 1950-ikkut tungaannut napparsimavittut atuuffeqartoq, kingorna atuartut angerlarsimaffiattut kingusinnerusukkullu 2000-imi meeqqerivittut allanngortiterneqarpoq.
Illu kingullertigut ulloq manna tikillugu utoqqaat peqatigiiffiatut eqqissisimanartigisumik atuuffeqarpoq.
Koruunilerlugu pisiaq
Utoqqaat peqatigiiffiata illu kommunimit 1 koruunilerlugu pisiarinikuuaat. Eqqissisimatitaanermut inatsit naapertorlugu utoqqaat peqatigiiffiata pisussaaffigaa illu aserfallatsaaliornissaanut. Akissaqanngillalli. Taamaattumik peqatigiiffiup illu kommunimut utertikkusullugu tuniniarpaa, neriuutigalugu illu oqaluttuarisaanermut pingaarutilik ataannarnissaa.
- Utoqqaat peqatigiiffiata Qeqqata Kommunianit 1 koruunilerlugu pisiarinikuusartik kommunimut utertillugu tunineqarnissaa pillugu 2023-mi novembarip 23-anni ullulikkanik kommunalbestyrelsimut saaffiginnissuteqarpoq.
- Taamaattumik allaffeqarfiup innersuussutigaa, piaartumik pisarialimmik iluarsartuussinissaq siunertaralugu kommunimi takussutissalimmik akiliutitalimmut utertitsilluni illumik pisisoqqassasoq, taamaalilluni oqaluttuarisaanermi illu taanna illoqarfimmi innuttaasunut tamanut tikeraanullu iluaqutaasinnaalersinnaalluni, siunnersuummi apriilip 25-ani kommunalbestyrelsimi suliarineqartumi allassimavoq.
Kommunalbestyrelsi isumaqatigiittoq
Illu takussutissalimik annikitsumik akiliilluni utertillugu pisiarineqassasoq kommunalbestyrelsi isumaqatigiippoq, siunnersuullu akuersissutigalugu.
Illu kommunimit tiguneqarnermi kingorna utoqqaat peqatigiiffiannit aamma kulturikkut siunertalinnut suli atorneqarsinnaassasoq siunnersuummi allassimavoq. Taamaalilluni Ilinniartitaanermut immikkoortortaqarfik ilanngullugu kommuni kulturikkut siunertalinnut illumik atuisinnaatitaalissaaq aammalu siusinaartumik pensionisiallit ataatsimoorlutik naapittarnissaannut atorneqarsinnaanera tulluartuussasoq allaqqavoq.
Illu kommunimit pisiarineqariarpat Nunatta Katersugaasiviat Allagaateqarfialu qanimut suleqatigalugit aallaavittut inatsimmik pisussaaffiusumik illumik aserfallatsaaliineq iluarsartuussinerlu aallartinneqassaaq.
