ULLOQ UNNUARLU NALUNAARUSIAQ
Illuaraq ikuallattoq pisuinnarlu aportittoq
Sapaatiummat politiit Qaqortup eqqaani illuaqqami ikuallattoqarneranik nalunaarfigineqarput.
Assiliisoq: Leiff Josefsen
Qaqortup eqqaani qeqertami illuaqqamik ikuallattoqarneranik sapaatiummat nal. 16.29 politiit nalunaarfigineqarput.
Taama pigaartut pisortaat Aputsiaq Hansen Sermitsiamut oqarpoq.
Qatserisartut suleqatigalugit politiit angallataat atorlugu politiit qeqertamut apuussimasut, pigaartut pisortaat oqaluttuarpoq.
Politiit qatserisartullu illuaqqamut tikiukkamik illuaraq pujorsuataarpoq ikuallannermillu ajoquserneqarsimalluni.
Ikuallattoqarnerani inunnik ajoqusertoqanngilaq, ikuallatsitsisoqarsimanersorli politiit paasiniaapput.
Pisuinnaat ikaarfissiaanni aportittoqartoq
Sapaatiummat kingusinnerusukkut nal. 21.05 politiit nalunaarfigineqarput Ilulissani aqqusinermi angallannermi ajutoortoqarsimasoq.
Tassani arnaq illoqarfiup timersortarfiata eqqaani pisuinnaat ikaarfissiaanni aporneqarsimavoq.
Arnaq qaratsamigut sajuppillassimanersoq misissorniarlugu napparsimmavimmut unitsinneqarpoq.
Politiit aamma ajutoorfimmukartinneqarput, biilertorlu unnerluutigineqassanersoq misissorneqaleruttorpoq.
