KL

DK

Ilulissani, Paamiuni Nuummilu teriannissanik perlerortunik nassaarneq

Teriannissat tallimat Ilulissanit, Paamiunit aamma Camp Kangiusamit Qooqunillu Nuup Kangerluaniittunit perlerornermut nappaateqartut paasineqarsimapput. Perlerortoqarneranik pasitsaassaqarnikkut teriannissat pineqartut 2024-mi marsip aamma juulip akornanni toqunneqarput.

Jensine Berthelsen
tusagassiortoq
Saqqummersinneqarpoq

Nalinginnaasumik teriannissat nujuartuugaluarput taakkulu teriannissat tallimat misissorneqartut, nalinginnaasuunngitsumik pissusilersorsimapput, inunnut uumasunullu qanillattorlutik imaluunniit saassussisimallutik, taamak tusagassiuutitigut nalunaaruteqarpoq Kalaallit Nunaanni Uumasunut Nakorsaqarfik Inuussutissalerinermullu Oqartussaaffik.

Uumasut inuillu teriannissanit pineqartunit qanillattorneqarsimasut malittarisassat naapertorlugit piaartumik iliuuseqartoqarpoq, ilaatigut akiuussusersuinikkut.

Perlerorneq virusimit nappaataavoq uumasunit napparsimasunit uumasunut allanut inunnullu tuniluussinnaasoq. 

Nunap timmiaataasa ilaatigut pissusilersornerat assigiinngitsorujussuusoq takuneqarpat

Terianniat allalluunniit uumasut pissusilersornerat assigiinngitsorujussuusoq misigigaanni imaluunniit terianniat toqungasut nassaarineqarpat, attavigiuk Uumasut Nakorsaqarnermullu Oqartussat Kalaallit Nunaanni  

uumasut@nanoq.gl

 imaluunniit 34 50 00 sianerfigalugu nal. 9.00-miit 15.00 tungaanut ulluinnarni.

Kalaallit Nunaanni pingaartumik issittup terianniaani perlerorneq takuneqakkajuttarpoq, taamaattorli uumasut allat aamma tunillatsissinnaallutik. 

Uumasoq perlerulersimaguni qisimigut viruseqalersarpoq, taannalu assersuutigalugu kiisinermigut tunillaasinnaalluni imaluunniit ikikkoorlugu tunillaassuussinnaasarluni. 

Uumasoq tunillatsissimasoq perlerornermik nappaammik suli ersiuteqanngikkaluarluni sapaatip akunnerini arlalinni sioqqullugu tunillaassuisinnaasarpoq.

    Tunillaanissamut pinaveersaartitsineq anguniarlugu maleruagassat makku malinneqarnissaat UNIO-mit innersuussutigineqarput:

  • Uumasut pissusissarinngisaminnik pissusinissimasut qanillinaveersaakkit.
  • Teriannissat napparsimarpasippata napparsimarpasinngikkaluarpataluunniit qanillinaveersaakkit.
  • Inuk kiitissimappat ikeq piaarnerpaamik imermik qaqorsaammillu salinneqassaaq piaarnerpaamillu peqqinnissaqarfik attavigineqarluni.
  • Ingerlariaqqinnissaq pillugu siunnersorneqarnissamut Uumasunut Nakorsaqarnermut Inuussutissalerinermullu Oqartussat piaarnerpaamik attavigineqassapput.
  • Akiuussuserneqarneq perlerornissamut illersuilluartarpoq, inatsisitigullu piumasaqaataavoq qimmit qitsuillu perlerornermut akiuussutissamik kapitinneqarsimassasut.
  • Nerisassaasinnaasut teriannissanut ingalassimaartikkit. Nerisassat eqqakkat teriannissanit tikinneqarsinnaagaangamik teriannissat inoqarfinnut qanillattulertarput.

Teriannissamit perlerorneq uppernarsarneqarluni nalunaarsorneqarsimasoq kingulleq pivoq 2017-imi Ilulissani, Paamiuni Nuummilu 2010-mi pisimalluni.

veterinær- og fødevaremyndigheden i grønland rabies samfund inuiaqatigiit

ATORFIIT Se alle jobs

Powered by Labrador CMS