Ilulissani takornarialerisut umiarsuarnut takornariartaatinut akerliunermik takutitsisut
Ilulissani takornarialerisoq Lars Erik Gabrielsen umiarsuarnut takornariartaatinut akerliunini ullumimiit aasap sinnerani takutinniarpaa. Taanna naapertorlugu illoqarfimmi suliffeqarfiit nunaqavissuunngitsut illoqarfiup aningaasaqarneranut iluaqutaanngitsumik atornerluisartut.
Foto: Katrine Noahsen Nielsen
Takornariartaatit Ilulissanut tikikkaangata takornarialerisut talittarfimmi allagartarsualisarlutik akerliusut aasaq tamaat takussaassapput.
Ilulissani takornarialerisut atugaat pillugit Lars Erik Gabrielsen naammagiliilluinnarpoq.
Takornariartaatit illoqarfimmi takornarialerisunut akikinaarisarnerat skatsimullu akiliineq ajortunut sullinneqartarnerat illoqarfimmut ineriartuutaannginnerat isornartorsiorpai.
- Ilulissat suliffeqarfinniit akileraarutinut akiliineq ajortunit atornerlunneqarpoq, aamma takornarialerisunut akikinaarisarput. Illoqarfitsinniit tilligarput, naak illoqariup ineriartortinneqarnissaanut aningaasat amigaataagaluartut, Lars Erik Gabrielsen Sermitsiamut oqarpoq.
Taassuma aasap tamaat umiarsuit takornariartaatit tikinneranni akerliunermik takutitsioqartarnissaa aaqqissuuppaa.
Takornarialerisut akikinaarneqartut
Lars Erik Gabrielsen naapertorlugu takornariartaassuit 70-it missaaniittut Ilulissanut aasap ingerlanerani tulassapput. Tulattoqaraangat illoqarfimmi takornarialerisut allagartarsualisarlutik sissamiittassapput.
Taakku eqqortumik akilerneqartarnissartik anguniagaraat kiisalu suliffeqarfiit takornarialerisut akileraarutinik akiliisassasut.
- Akilerneqarnerluttarpugut. Umiarsiagut akisoorujussuupput, takornariallu inummut ataasiinnarmut 400 koruunimik akiliillutik iluliarsuarnik takornariartittarpaat. Akinut naaggaarutta siorasaarilertarput allanik pissarsiussallutik, Lars Erik Gabrielsen oqarpoq.
Taassuma ilanngullugu oqaatigaa takornarianik suliffeqarfiit nunaqavissuunngitsut aasaq naagaangat Ilulissat qimallugu aallartartut, aningaasatigut illoqarfimmut iluaqutaanatik.
Inuiaqatigiit ineriartortariaqartut
- Takornariartaatimmi nammineq aalajangissannginnamikku kikkut takornarialerisut atorusunnerlugit?
-Soorunami nammineq aalajangertussaavaat. Kisianni tassani Ilulissat ajorsartarpoq. Illoqarfipput ineriartortariaqarpoq, taamaaliorsinnaanngilagut akilernerlunneqartarutta. Ineriartorsinnaanngilagut atorneqarneq ajorutta. Akiligassaqarpugut, aningaasallu annissuunneqarput.
Taasuma eqqaavaa aningaasat takornariaqarnermi isertinneqartut illoqarfimmi atukkanut, soorlu meeqqanut atugassarititaasunut, aqqusinernut kuuffeqarnermullu iluaqutaasussaagaluartut.
- Illoqarfiup ineriartortinneqarnissaanut piumaffigineqartarpugut, taamaaliorsinnaanngilagulli iluamik akilerneqarneq ajorutta, Lars Erik Gabrielsen naggasiivoq.
