Ilulissani toqutseriartutut eqqartuussut Nunatta Eqqartuussisuuneqarfiata attakkaa
Arnap 36-nik ukiullip toqutseriarsimasutut tarnikkut nappaatilinnut Danmarkimi inissiisarfimmiittussanngortinneqarnera allanngortinneqassanngitsoq Nunatta Eqqartuussisuuneqarfiani ataasinngornermi aalajangerneqarpoq.
Toqutseriaraluarneq pillugu suliami Qaasuitsup Eqqartuussisoqarfiani aalajangerneq Nunatta Eqqartuussisuuneqarfiani isumaqatigineqarpoq.
Toqqorsivimmit: Morten Okkels
Arnamut 36-nik ukiulimmut Avannaaneersumut toqutseriaraluarsimasumut eqqartuussutip suliareqqitassanngortinneqarnera Nunatta Eqqartuussisuuneqarfiani ataasinngornermi aalajangiiffigineqarpoq.
Arnap ataatassani savilersorluni saassummagu angut qungatsimigut immannguaq ikilerneqarsimavoq. Kingorna savimmik arsaarneqarpoq. Tamanna Ilulissani 2024-mi maajip 31-ani pivoq.
Arnaq Qaasuitsup Eqqartuussisoqarfiani tarnimikkut napparsimasunut Danmarkimi katsorsaavianniittussanngorlugu aalajangiiffigineqarpoq.
Arnap toqutseriaraluarnini nassuerutigigaluarlugu eqqartuussut suliareqqitassanngortippaa.
Aalajangiinerup allanngortinneqarnissaa kissaatigaa, taamaalilluni Kalaallit Nunaanni katsorsarneqarsinnaalerusukkami. Aamma sioorasaarisimasutut pisuutinneqarnerminut pinngitsuutinneqarusuppoq.
Taakkuali tamaasa iluatsinngilai. Qaasuitsup Eqqartuussisoqarfiani aalajangiussaq Nunatta Eqqartuussisoqarfiani isumaqatigineqarpoq, arnamullu 36-nik ukiulimmut pineqaatissiissut attatiinnarneqarluni.
