KL

DK

Imigassamik kisermaassinissamik siunnersuut partiimi siulittaasup isornartorsiorpaa

Imigassamik kisermaassineq innuttaasunut kaasarfiinit aningaasanik aalleqqinnerussaaq, Atassut isornartorsiuivoq.

Thomas Munk Veirum
Tusagassiortoq
Saqqummersinneqarpoq

Imigassaq pillugu politikki nutaaq pillugu innersuussutit arlallit Naalakkersuisunit tusarniaassutigineqarput. Innersuutigineqartut pingaarnerit ilagaat imigassamik kisermaassisumik, imigassamik tuniniaanermut akisussaasussamik, pisortanit pigineqartussamik pilersitsisoqarnissaa kiisalu 21-nik ukioqalereernerup kingorna imigassamik pisisoqarsinnaalernissaa.

Siunnersuut Atassutip siulittaasuanit Aqqalu C. Jerimiassenimit akerlerilluinnarneqarpoq.

Politikki taamaattoq innuttaasut tamarmik akisussaaffiannik toqqagassatullu periarfissaannik tigusissasoq isumaqarpoq. Kisermaassilluni ingerlatsilernissaq assut eqqarsarnartoqartippaa:

- Naalakkersuisut imigassap tuniniarnissaa pisortanit kisermaassissutaassasoq siunnersuutigimmassuk tupaallannanngilaq. Taakkuami pisortat kisermaassinerannik ataatsimut isiginnilluni nuannaarutiginnittuupput, pissutigalugu taama iliorneq innuttaasut kaasarfiinit aningaasanik aalleqqinnerummat. Tamanna namminersorluni ulluinnarni pisiassanik niuertarfiutilinnut kingunerluuteqassaaq, tamannali Naalakkersuisut soqutiginngilaat, Aqqalu C. Jerimiassen tusagassiutitigut nalunaarummi allappoq.

Jeremiassen: inuttaasut namminersorsinnaanerannik arsaartulerpaat

Naalakkersuisut naapertorlugit imigassamut nutaamik politikkeqalernikkut imigassap inuiaqatigiinnut sunniutai annertuut killilersimaarneqassapput, Naalakkersuisullu imigassamut politikkimik inuiaqatigiinnik toqqissisimanartunik, imigassamit ajoquserneqarfiunngitsunik qulakkeerinnittussamik pilersitsiniarput.

Innuttaasut namminneq akisussaaffimmik tigusisinnaassuseqarnertik ersersikkaat Aqqalu C. Jerimiassen isumaqarpoq:

- Innuttaasut namminneq akisussaaffimmik tigusisarnerat ukiuni amerlasuuni kingullerni ineriartornermi erserpoq. Kalaallit Nunaanni imigassartorneq annikilleriangaatsiarpoq. Tamanna Naalakkersuisut maannakkut akiliutitullusooq atorlugu inuttaasut namminersorsinnaanerannik arsaartulerpaat. Toqqaanissamut periarfissaat killilersorlugit, tallimanngornermi unnukkut immiaarartugassaat viinnisorfimmulluunniit ataatsimut viinnisugassaasa akii qaffallugit.

Imigassaq aalakoornartortalik pillugu siunissami politikkissamut inassuteqaatit pillugit tamanut tusarniaaneq januaarip 22-ata tungaanut ingerlavoq.

grønland aqqalu c. jerimiassen alkoholpolitik alkoholmonopol naalakkersuisut samfund inuiaqatigiit

ATORFIIT Se alle jobs

Powered by Labrador CMS