KL

DK

Imigassaq aalakoornartortalik pillugu politikki: Imigassamik aalakoornartortalimmik pisermaassinissaq inassutigigaat

Ukiunik killiliineq 21-nik ukiulinnut qaffanneqarnissaa ilaatigut aamma inassutigineqarpoq. Imigassaq aalakoornartortalik pillugu ukiunut arlalinnut politikkissamut, ilisimatusarnermit tunngavilimmut, inassuteqaatit maanna Naalakkersuisut tusarniutigaat. Soqutiginnittut tamarmik maanna isummersuutiminnik apuussinissaminnik periarfissaqalerput. Inassuteqaatit 22. januaari 2025-p tungaanut tamanut tusarniaassutigineqarput.

Tôrtia Reimer-Johansen
Journalist
Offentliggjort

Imigassaq aalakoornartortalik pillugu siunissami ukiunut arlalinnut politikkissamut maanna tusarniutigineqaleruttorpoq.

Naalakkersuisut ilaatigut imigassamik aalakoornartortalimmik kisermaassineq pisortanit pigineqartoq eqqunneqarnissaa inassutigaat. Tassani imigassamik aalakoornartortalimmik kisermaassineq pisortanit pigineqartoq, nakkutilliisoqarfimmit, inuiaqatigiit peqqissusiannik isiginniffiulluartumik nakkutigineqartoq eqqunneqaqquaat.

Naalakkersuisut qulakkeerusuppaat imigassaq aalakoornartortalik niuertarfinni nioqqutissanit allanit immikkoortinneqassasoq, taamalu ulluinnarni nioqqutissatut isigineqarnani.

21-nik ukiulinniit

Imigassamik aalakoornartortalimmik tuniniaanermi aamma sassaalliinermi ukiunut killiliussaq 21-nik ukiulinnut qaffanneqarnissaa Naalakkersuisut innersuussutigaat.

- Inuusuttut imigassamik aalakoornartortalimmik misileqqaarnerisa qanga pinera qanoq annertutigisumik, aamma qanoq akulikitsigisumik imigassamik aalakoornartortalimmik imertarnerannut pingaaruteqarpoq. Inuusuttut imigassamik aalakoornartortalimmik atuillutik aallartinnerat kingusinnerutillugu atuinerisa naammaannartuunissaa aamma aalakoorniutigalugu pinissaata annikinnerunissaa ilimanaateqarnerussaaq, Naalakkersuisut tunngavisersuutiminni allapput.

Naalakkersuisut allapput imigassaq aalakoornartortalik inuiaqatigiinnut annertuumik kingunerluuteqartitsisartoq, taamaattumik imigassaq aalakoornartortalik pillugu siunissami politikkeqalernissaa Naalakkersuisut angorusuppaat. Inuiaqatigiit toqqissisimasuunissaannik aamma arlannaataluunniit imigassamit aalakoornartortalimmit ajoquserneqannginnissaanik qulakkeerinninnissamut anguniagaqarfiulluarlunilu siunnerfeqarnissaa pingaaruteqarmat.

- Imigassaq aalakoornartortalik inuiaqatigiinnut annertuumik kingunerluuteqartitsisarpoq. Taamaattumik imigassaq aalakoornartortalik pillugu siunissami politikkissarput inuiaqatigiit toqqissisimasuunissaannik aamma arlannaataluunniit imigassamit aalakoornartortalimmit ajoquserneqannginnissaanik qulakkeerinninnissamut anguniagaqarfiulluarlunilu siunnerfeqarnissaa pingaaruteqarpoq, Peqqinnissutsimut Naalakkersuisoq allappoq nangillunilu:

-  Inuup imigassamik aalakoornartortalimmik pisillunilu imersinnaanerminik pisinnaatitaaffeqarlunilu kiffaanngissuseqarnerata peerneqarnissaa inassuteqaatitigut anguniarneqanngilaq, akerlianilli inersimasut imigassamik aalakoornartortalimmik atuinerannit ajoquserneqannginnissamik kinguaariit peroriartortut pisinnaatitaaffeqarnerannik aamma kiffaanngissuseqarnerannik qulakkeerinninnissaq anguniarneqarluni, Peqqissutsimut Naalakkersuisoq, Agathe Fontain oqarpoq nangillunilu:

- Inassuteqaatit siammasissumik oqaloqatigiissutigineqarnissaat, aamma tamanit oqaluuserilluaqqissaarneqarnissaat pingaaruteqarpoq, taamaaliornikkut imigassaq aalakoornartortalik pillugu siunissami politikkissap imarisaanik politikerit aalajangiinissaminnut pitsaanerpaamik tunngavissaqarniassammata. Imigassamut aalakoornartortalimmut tunngatillugu massakkut iliuuseqarnissatsinnik aalajangernerput siunissatsinnik, minnerunngitsumillu meerartatta aamma ernuttatta siunissaannik ilusilersuisuusussanngussaaq.

Suliniuteqarfigineqartussat isamanik inassuteqaatinillu 17-it

Inassuteqaatit suliniuteqarfigineqartussanik isamanik, aamma inassuteqaatinik 17-inik ilaqarput, taakku ataatsimoorlutik inuiaqatigiinni imigassamit aalakoornartortalimmit ajoqusertarnernik annikillisataasinnaallutillu pitsaaliuissutaasinnaassallutik.

Inassuteqaatit 22. januaari 2025-p tungaanut tamanut tusarniaassutigineqarput, Naalakkersuisullu nittartagaani nassaarineqarsinnaallutik.

folkesundhed alkoholpolitik aldersgrænse agathe fontain inuiaqatigiit samfund naalakkersuisut

ATORFIIT Se alle jobs

Powered by Labrador CMS