KL

DK

Immap assiliornissaanut isumaqatigiissut nutaaq angallannermut isumannaannerulersitsissaaq

2025 aallarnerfigalugu immap assingi elektroniskiusut ENC-mik taaneqartartut kisimik ukkatarineqalissapput. Tamanna umiatsiaararsortunut angallatinullu mikinerusunut immap assinginik pappiaraasunik atuinerusartunut imaani angallannermi isumannaallisaanermut pitsanngorsaataassaaq, Naalakkersuisut paasissutissiipput.

Thomas Munk Veirum
Tusagassiortoq
Saqqummersinneqarpoq

Kalaallit Nunaata imartaata digitaliusumik assiliorneqarnissaa Ineqarnermut Attaveqaasersuutinullu Naalakkersuisoqarfiup aamma Geodatastyrelsenip (GST) isumaqatigiissutigaat.

Kalaallit Nunaata imartaata digitaliusumik assilineqarneranut suliami isumaqatigiissut alloriarnerusoq Naalakkersuisut tusagassiutinut nalunaarummi allapput.

Isumaqatigiissusiornikkut nukiit pitsaanerusumik siunnerfeqarnerusumillu atorneqarsinnaalernissaanik qulakkeerinnittoq isumaqatigiissuteqartut allapput:

- Tamanna imaani angallannermi isumannaallisaanermut nukittorsaataaginnarani umiatsiaararsortut, angallatillu mikinerusut sumiissusersiutinik nutaaliaasunik, taakkua pisariaqartitaannut naleqqussarluarneqarsimasunik atuisinnaalissapput. Immap assingi elektroniskiusut nutarteruminarnerusarput, immallu assinginut pappiaraasunut sanilliullugit paasissutissanik ersarinnerusunik, ullormilu pineqartumi paasissutissanik paasissutissaqarnerusinnaasarlutik, Naalakkersuisut allapput.

Naalakkersuisoq:  Pissusissamisoortumik alloriarneruvoq

Attaveqaasersuutinik nutarterisarneq sumiissusersiutitigullu paasissutissat  qulakkeerneqarnissaat aalajangiisuusoq Ineqarnermut Attaveqaasersuutinullu Naalakkersuisoq Hans Peter Poulsen oqarpoq:

- Kalaallit Nunaanni immap assinginik digitalinngorsaanerunissaq, alloriarfissamut pissusissamisoortumik alloriarneruvoq. Umiatsiaararsortut, angallatit mikinerusut, inuussutissarsiorfiillu pisariaqartitaat iliuuseqarfigissallugit uannut pingaaruteqarpoq.

- Taamatut nutarsaanerup pitsaasumik kingunissai Kalaallit Nunaannilu imarsiornermut isumannaallisaanerunissaq pitsaanerulersitsinissarlu qilanaaraakka, Hans Peter Poulsen oqarpoq.

Kalaallit Nunaata nunani tamalaani najoqqutassianik nutaanik malinninnissaa pingaaruteqartoq, tamannalu immap assingi digitaliusut atulernerisigut pisoq Danskit silap pissusianut, nukissiornermut pilersuinermullu ministeriat Lars Aagaard oqarpoq.

- Taamaalilluta Danmarkip aamma Kalaallit Nunaata suleqatigiinnerini, Kalaallit Nunaanni inuussutissarsiutigalugu aamma sunngiffimmi umiartortartunut iluaqutaasussamik ersarinnerusunik, nutartigaasunillu immap assinginik atugassaqartitsinerusinnaassaagut, Lars Aagaard oqarpoq.

Immap assingi pappiaraasut pisarnertut sumiissusersiutitut atorneqarsinnaallutik suli nutarterneqartarlutik attatiinnarneqassasut ilanngullugu paasissutissiissutigineqarpoq.

inuiaqatigiit hans peter poulsen digitale søkort lars aagaard naalakkersuisut samfund

ATORFIIT Se alle jobs

Powered by Labrador CMS