Immikkut ilisimasalik: USA-p atorfilittanik amerlanerusunik Nuummut aallartitsiniarnera Kalaallit Nunaata akueriinnartariaqarpaa

USA, Nuummi konsuuleqarfimmik ammaaqqinniarluni 2020-mi aalajangermalli, inissisimaffissaanik tulluartumik nassaarniarluni sulissuteqartoqarpoq. Tamanna siusinnerusukkut Sermitsiamut oqaluttuarereerpaat. 

Sulili uppernarsarniarsimanngilaat tassaassanersoq illu portusuuliaq nutaaq Imanermiittoq – Oles Varehusip inissisimaffigisimasaaniittoq – tamannali naatsorsuutigineqarluni. Præsidentip tullersortaata J.D. Vancep nuliatalu marsimi tikeraarniarnerannut atatillugu Amerikamiut piareersaajartortut inimut 3.000 m2-imut, aallaasinik aserorneqarsinnaanngitsunik igalaalimmut isumannaallisaanermullu malittarisassat sakkortunerpaat malillugit sananeqarsimasumut, nuupput.

Innuttaasut ernumasut

Konsuuleqarfik ininut nutaanut qaqugu pisortatigoortumik nuussanersoq ilisimaneqanngilaq. USA-li nalunaareerluni Kalaallit Nunaanni sulisumik amerlinissaat naatsorsuutigigitsik, tamannalu aamma Naalakkersuisut siulittaasuannit Jens-Frederik Nielsenimit sapaatiummat Marienborgimi tusagassiortunik katersortitsinermi uppernarsarneqarluni, tassani Sermitsiap apeqqutigimmagu Naalakkersuisut siulittaasuata Amerikamiut Kalaallit Nunaanniittut amerlanerulernissaat qanoq isumaqarfigineraa. - Nuummi konsuuleqarfik ukiut arlallit matuma siornagut pilersinneqarpoq, tamatta taamani Amerikamiunik suleqateqateqarnissaq annertunerusumik inerisarneqalermat nuannaarutigaarput. Konsuuleqarfiup sulisuisa amerlinissaat Trumpip præsidentinngunngikkallarneranili aamma aalajangerneqarpoq. Paasisinnaavara, arlaatigut ernumassuteqartoqarsinnaasoq, tamannalu pingaaruteqarpoq eqqumaffigissallugu. Taamaattumik aamma pisut tunngavigalugit naalagaaffeqatigisatsinnut EU-mullu annertusisamik attaveqarpugut, Jens-Frederik Nielsen oqarpoq. 

Sakkutooqarfiit pillugit isumaqatigiissut aamma sinniisuutitaqarneq

Illersornissamut ilinniarfimmi ilisimatusartoq Peter Viggo Jakobsen isumaqarpoq, Kalaallit Nunaata Amerikamiut Nuummiittut akueriinnartariaqarai.

– Nuummi konsuuleqarnerup saniatigut USA aamma sakkutooqarfiit pillugit isumaqatigiissuteqarpoq, tamatumani USA Kalaallit Nunaanni sakkutooqarfeqarnissaminut akuerineqarpoq, tamatumunngalu ilaalluni sakkutooqarnikkut atortorissaarutit amerlineqarsinnaanissaat. Maannakkullu USA Nuummi sinniisoqarfeqarsinnaanngorpoq. Isumarpunga Kalaallit Nunaata USA-llu akornanni najuutsitaqarnermut tunngasunik ajornartorsiuteqalersitsinissaq pitsaasumik kinguneqarnavianngitsoq. Isumaqarpungali Kalaallit Nunaata eqqissisimasumik sulissutigissagaa, attaveqaqatigiinnerup nalinginnaasumut appartikkiartuaarneqarnissaa. Neriuutigaaralu isumaqatigiinngissutit pisimasut kingusinnerusukkut eqqisseqatiginninnikkut aaqqinneqarsinnaassasut, Peter Viggo Jakobsen oqarpoq.

Kalaallit Nunaata USA ataatsimeeqatigisariaqaraa

Peter Viggo Jakobsenip oqaatigaa, Kalaallit Nunaata periarfissaa pitsaanerpaaq tassaasoq USA-mik ataatsimeeqateqarnissaq suniarnerannillu tusarnaarnissaq, pisariaqarpallu Naalakkersuisut isumaannik uteqqiinissaq.

– Aamma kalaallit politikerii soorunami Amerikamiut sinniisuutitaat oqaloqatigigaangamikkik eqqarsaqqaartariaqarput, immaqa tapersersoruminaatsunik siunertaqarsinnaammata