Immikkut ilisimasallit diamanti nassaarineqartoq misissussavaat
Diamantinik tuniniaasartoq naapertorlugu aatsitassarsiorfik, silarsuarmi diamantit annersaasa tullianik nassaarfiusoq, siornatigut pitsaalluinnartunik ujaqqanik piiaaffiusarsimavoq.
Sisamanngorneq Botswanami nassaarineqarsimasoq annerpaaq, ukiunilu 119-ini nassaarineqarsimasoq annerpaaq, takutinneqarpoq Botswanami. (Arkivfoto).
Ritzau Scanpix
Canadamiut aatsitassarsioqatigiiffiat Botswanami, nunarsuarmi diamantit piiakkat annersaasa tullianik nassaarsimanera oqaluttuarisaanermut pingaaruteqartutut qaqutigoortutullu ilannguppoq.
Sidsel Dalby Glerup taama oqarpoq. Taanna Dalby Diamondsimik piginnittuuvoq, diamantinillu tuniniaasartuulluni kiisalu Amerikami gemmologit institutianni (GIA) gemmologitut ilinniarsimasuulluni.
- Diamanti maanna nassaarineqartoq nunarsuarmi nassaarineqarsimasut annersaata tulleraa. Taama nassaarneq qaqutigoortorujussuuvoq, taanna oqarpoq.
Diamanti 2492 karatiuvoq, tassa diamantit 1905-imi Afrika Kujallermi diamantip Cullinanip nassaarineqarneraniilli nassaarineqarsimasut annersaralugu. Diamanti Afrikap kujataani nassaarineqarpoq.
Diamanti Cullinan-imik taaneqartartoq 3106 karatiuvoq, tamatumali kingorna ujaqqanut erlinnartuusiassanut minnernut arlalinnut aggorneqarsimalluni. Taakku Tuluit Nunaanni erlinnartutut pinnersaasiarineqarsimapput.
Sidsel Dalby Glerupip oqaatigaa diamanti nutaaq qanoq pitsaatiginersoq suli ilisimaneqanngimmat qanoq naleqarnersoq oqaatigineqarsinnaanngitsoq.
Diamantinilli piiaffimmi Karowemi, nassaarfiusumi, diamantinik pitsaanerpaanik siornatigut piiaasoqartarsimavoq.
- Piiaaffimmi tassani ujaqqat erlinnartuutit piiarneqartut pitsaanerpaani inissisimapput. Diamantit taakkua pitsaassusaat 2A-mik taaneqartarput, silarsuarmi diamantit tamarmik taamaallaat 2 procentii taama taaneqartarlutik, oqarpoq.
Ujarak mikinerusoq piiaaffimmeersoq 2017-imi tulummut erlinnartuutinik tuniniaasartunut Graffinut 53 millionit dollarit – 40 millionit koruunit missaat – akigalugit tunineqarpoq.
Diamanti 1111 karaatiuvoq, tassa nassaarineqartup affaata inorlugit oqimaassuseqarluni.
Sidsel Dalby Glerupip naatsorsuutigaa diamanti sapaatip-akunnerani matumani siusinnerusukkut nassaarineqartoq Belgiami Antwerpenimi immikkut ilisimasalinnut nassiunneqassasoq.
- Diamantit qaqutigoortut qanoq suliarineqartarnerat ilisimatuussutsikkut ilisimasalinnit misissorneqartariaqarpoq. Diamantit qaqutigoortut qanoq suliarineqartarnerat paasiniarlugu piffissarujussuaq atortariaqarpoq, teknikkilu nutaaliaq atortariaqarpoq, ilisimatuullu amerlasuut peqataasariaqarlutik, nassuiaavoq.
Assersuutigalugu misissorneqassaaq ujaqqap aserorneqannginnerani qanoq qupineqarsinnaanera.
Sidsel Dalby Glerup naapertorlugu diamanti angissutsinut assigiinngitsunut aggorneqartussaavoq.
Nutaarsiassaqartitsivik Reuters naapertorlugu nuna Afrikap kujasissuaniittoq nunat diamantinik piiaaffiusut annersaannut ilaavoq.
