Imminut toqunnissamik sioorasaarinerit pisarnermit amerlanerusut

Kalaallit Nunaanni Politiit sapaatip-akunnerata naanerani ulapaarput. Politiit sulisut amerlanerunissaat isumagisimavaat, taamaattumillu nalinginnaasumit amerlanerusut sulisimmata politiit takussaanerusimapput.

Kalaallit Nunaanni Politiit Facebookimi quppernerminni allapput.

Politiit pisunut assigiinngitsunut ornigupput, soorlu toqutsineq ataaseq, nakuusernerit, aqqusinerni eqqissiviilliornerit, ujaasinerit, angerlarsimaffinni assigisaanniluunniit eqqissiviilliornerit. Suliassat amerlanerpaartaani illuatungeriinni minnerpaamik ataaseq annertuumik imigassartorsimavoq.

Imminut toqunnissamik sioorasaarinerit pisarnermit aamma amerlanerupput.

- Tamannaavoq uatsinnut ernumalersitsivoq, politiitut aamma inoqatitut, politiit allapput.

Imminut toqunnissamik eqqarsaateqaraanni kinaassutsimik isertuussilluni Tusaanngamut normumut 80 11 80-imut sianertoqarsinnaasoq kaammattuutigaat.

- Aammattaaq ornigukkaangatta inunnit tapersersorneqarluartarnermut qujassutigaarput. Politiinut tapersersuineq Nunatsinniittunut toqqissisimanerulersitsivoq!