Imminut toquttarnerup pinaveersaartinneqarnissaanut
ilisimatusarnermut RAL tapersiisoq
Umiarsuaatileqatigiiffik Royal Arctic Line 130.000 koruuninik tapiissuteqarpoq, ilisimatusartullu nunaqarfinnut pajuttaatinut akeqanngitsumik ilaasinnaanngortillugit.
: Ilisimatusartut ilaatigut RAL-ip nunaqarfinnut pajuttaataannut ilaasinnaanissartik nuannaarutigisinnaavaat.
Royal Arctic Line
Royal Arctic Linep (RAL) aningaasaliissuteqartarnermut ataatsimiititaliaa aalajangersimavoq, suliniut nunaqarfimmiut imminut toquttarnerup pinaveersaartinnissaanut ilisimasaqarnerulernissaannut aamma Nunatsinni imminut toquttarnerup qanoq pinaveersaartinneqarsinnaaneranik innuttaasut ilisimasaqarnerulernissaannut iluaqutaasussaq tapersersorniarlugu.
RAL suliniummut 130.000 koruuninik tapiissuteqarpoq, tamatumalu saniatigut umiarsuaatini nunaqarfinnut pajuttaatit atorlugit, ilisimatusartut nunaqarfinnut anngussinnaaniassammata, Royal Arctic Line nittartakkamini allappoq.
TUSAANNGA – TLF. 801180, SMS 1899
Meeqqat, inuusuttut, inersimasullu tamarmik oqaloqateqarnissamik, allaqateqarnissamilluunniit pisariaqartitsisut Tusaannga attavigisinnaavaat.
Ajornartorsiutit annikikkaluarunik annertuppataluunniit siunnersuisartut ikiuinissamut piareersimapput.
Allat tapersersueqataaqqullugit aamma kajumissaarai
Suliniut tapersersorniarlugu RAL-imi aalajangerpugut, ilaatigut Nunatsinni ilaqutariit nukittorsarnissaat siunertaralugu, attaveqaqatigiinnermut ussassaarinermilu pisortaq Ann-Britta A. Olsvig, Royal Arctic Linemi aningaasaliisartut sinnerlugit taama oqarpoq:
- Amerlaqisugut inuunitsinni imminut toquttarneq qanimut misigisaqarfigisimavarput. Taamaattumik ataatsimiititaliamit aningaasaliisartumit suliniummut tapersersuinissarput pissusissamisoorpoq. Ilisimatusarnikkut ilisimasat pingaarutillit katersorneqassapput, taakkulu Nunatsinni imminut toquttartut ikilisinnissaannut aalajangiisuusinnaapput.
- Innuttaasunut tamanut iluaqutaassaaq, allat aamma kajumissaarusuppavut ilisimatusarnermik suliniummut pingaarutilimmut tamatumunnga, ilisimatusartunit tarnillu pissusaanik ilisimasalinnit pikkorissunit suliarineqartussamut, tapersersueqqullugit, taanna oqarpoq.
Ilisimatusartoq: Ilitsoqqussaralugu oqaatsit atorlugit paasissutissinneqarnissaq inuttut pisinnaatitaaffiuvoq
Ilisimatusartup Arnârak Patricia Blochip, suliniummik aqutsisuusup, tapersersuineq qujamasuutigaa:
- Nammineq peqqissutsimut tunngasunik ilisimasaqarnissaq inuttut pisinnaatitaaffiuvoq, tamatumunnga ilanngullugu imminut toqunnissamut pinaveersaartitsineq. Aamma peqqissutsimut iluaqutaasussamik nammineq oqaatsit ilitsoqqussat atorlugit paasissutissinneqarnissaq inuttut pisinnaatitaaffiuvoq.
- Taamaattumik ilaqutariinnik tarnip pissusaanik katsorsaasartoq MPF, tarnip pissusaanik peqqissaasoq Henriette Berthelsen tarnillu pissusaanik ilisimasalik Vilhelm Berthelsen suleqatigileratsigik pingaaruteqarluinnarpoq, taakkulu suleqatigissavaannga, Arnârak Patricia Bloch oqarpoq.
Taassuma ilanngullugu nassuiaatigaa, aningaasartuutissanut missingersuutitik killeqarmata tapiissutigineqartut atorfissaqartinneqarluassasut:
- Inuiaqatigiit tamarmik imminut toquttarnerup pinaveersaartinnissaanut peqataanerannut tamanna takussutissaavoq, pinaveersaartitsinerlu sunniuteqarluarsinnaasoq, tamatumunngalu atatillugu Royal Arctic Linep soqutiginninnera tapersersuineralu pillugit qamannga pisumik qujassuteqarfigaara. Taamaalillunimi nunaqarfimmiut isumaat Nunatsinni imminut toquttarnerup pinaveersaartinnissaanut suliniuteqarnermi aalajangiisoqassatillugu ilanngunneqarsinnaassammata, Arnârak Patricia Bloch oqarpoq.
