Inatsisartuni apeqquteqarusussuseqartoqangaarneq – ingammik Naleqqamit

Inatsisartuni ilaasortat ukioq manna qaammatini tallimani siullernitulli apeqqarissaarusussuseqartigiinnarpata, paragraf 37 naapertorlugu apeqqutit ukiut tallimat kingulliit ingerlaneranni aatsaat taama amerlatigilersinnaapput.

Naleqqami politikkerit ukioq manna paragraf 37 naapertorlugu Naalakkersuisunut apeqquteqartarnermikkut rekortiliipput. Hans Enoksen apeqquteqarnerpaasartunut ilaavoq.

Qaammatip iluani apeqqutit 20-t

Apriilip 23-anit maajip 24-ata tungaanut Hans Enoksen 20-riarluni apeqquteqartoq Sermitsiap naatsorsuinerata takutippaa. Taamaasilluni Naleraq partiinit tamanit apeqquteqarnerpaajuvoq, IA-mit Siumumillu marloriaammik amerlanerusunik apeqquteqarluni.

2024-mi juunip sisamaani naatsorsuinerit takukkit:

Apeqquteqarneq Namminersorlutik Oqartussat aningaasartuutaasarpoq.

§ 37 naapertorlugu apeqqummut ataatsimut akissuteqarnermut agguaqatigiisillugu akunnerit 12,5-it atorneqartartut, Naalakkersuisut siulittaasuat Múte B. Egede siornatigut Sermitsiamut paasissutissiinikuuvoq.

- Tassa imaappoq § 37 naapertorlugu apeqquteqaatit akiniarnerannut aningaasat 2.522,62 koruunit 9.109,12 koruunillu akornanni naalakkersuisoqarfinni atorneqartartut. Tamatuma saniatigut nutserneqarneranut, Naalakkersuisup piffissamik atuisimaneranut kiisalu Inatsisartut Siulittaasoqarfiata sulisuisa piffissamik atuisimaneranut aningaasartuuteqartoqartarpoq.

Ukiumut aningaasartuutit

Paasissutissat taakku tunngavigalugit ukiumut aningaasartuutit naatsorsorneqarpata, apeqquteqarusussuseqarnerujussuaq Nunatta Karsianut 300.000 koruunit 1,075 millionit koruunillu akornanni akeqarsimavoq.

Taamatulli apeqquteqartoqaannarpat ukiup naannginnerani aningaasartuutit 1 millionit koruunit 2,5 millionillu koruunit akornanniissapput.