INATSISARTUT SULERIAASIAT
Inatsisartuni ilaasortat siunnersuuteqarnissaminnut pitsaanerusumik periarfissarsiuunneqarput
Inatsisartuni ilaasortat aalajangiinissamut siunnersuuteqarnerminni allaffissornikkut aningaasaqarnikkullu kingunerisassai pillugit paasissutissanik pissarsinissaminnut naalakkersuisutulli periarfissaqanngillat. Tamanna Inatsisartuni annertuumik pakatsinermik pilersitsisarpoq, aamma § 37 naapertorlugu apeqqutit amerliartuinnavilersarput imaluunniit siunnersuutaasut paasissutissanik amigaateqarnerat pissutigalugu itigartinneqartarnerannut pissutaasimavoq. Maanna siulittaasoqarfik aaqqiissutissamik suliaqalerput.
Inatsisartuni ilaasortat Inatsisartut ukiuata nutaap aallartinnerani qinigaaffimmi matumani assingat kingulleq. Maanna anguniarneqarpoq suleriaatsip allanngortinneqarnissaa, taamaaliornikkut Inatsisartuni ilaasortat siunissami siunnersuutinik oqaluuserisassanngortitsinissamut pitsaanerusumik periarfissaqarnissaat.
Assiliisoq: Leiff Josefsen
Inatsisartuni ilaasortat siunnersuutaat misissulaaraanni malunnarpoq siunnersuutit amerlanerpaartaat killeqartartut kissaatigineqarajulluni "Naalakkersuisut misissuinissaminnik imaluunniit nassuiaasiornissaminnik peqquneqassasut".
Siunnersuutit amerlanerpaartaat taamaattumik killeqartarput allaffissornikkut aningaasaqarnikkullu kingunerisassai pillugit nassuiaatini, pisariaqartinneqassasoq A/C-fuldmægtigit ukiumut affaannarmik imaluunniit ukiumut isertitaqarnerattut naleqassasoq, naatsorsuutigalugu ukiumut suliffik ataatsip naleqartinneqarluni missiliorlugu millioner koruuninik.
Massakkut Inatsisartut siulittaasoqarfiata tungaannit tusarniaaneq aallartisinneqarpoq anguniagaalluni Inatsisartut februaarip aallartinnerani 2025-imi ataatsimiilerpata siunnersuut qaqinneqassasoq.
Ajornartorsiortitsisimavoq
Inatsisartut siulittaasoqarfiannit siunnersuummut oqaaseqaatini erseqqissaatigineqarpoq kingullermik ulloq 17. april 2023-imi Inatsisartunut ilaasortanut
isumasioqatigiissitsinermi ersersinneqarpoq Inatsisartut aalajangiivigisassaattut
siunnersuuteqarnermut atatillugu aningaasatigut allaffissornikkullu kingunerisassat
allaaserineqartarnissaannik ullumikkut piumasaqaatit Inatsisartunut ilaasortanut ulluinnarni
sulinermi naammassiuminaattartut.
Taamatuttaaq pakatsinarlunilu nikallornarsinnaasarpoq ilaasortaq partiiluunniit
qaqugukkulluunniit aalajangiiffigisassatut siunnersuummik oqaluuserisassanngortikkusutamik
saqqummiussisinnaanissaminit mattunneqaraangat, siunnersuutip kingunerisassaasa
naammattumik qulaajarneqarsimannginnerat pissutigalugu.
Ulluinnarni sulinermi Inatsisartunut ilaasortat Inatsisartunilu partiit aalajangiiffigisassatut
siunnersuusiornerminnut atatillugu Inatsisartut Allattoqarfiannit ikiorserneqakkajuttarput,
siunnersuutip kingunerisassaasa allaaserinerinut imaluunniit pitsaassusiisa
qularnaarneqarnerinut.
Inatsisartulli Allattoqarfiat siunnersuutip kingunerisassaasa
qulaajarneqarsinnaanissaanut paasissutissanik pisariaqartunik pissarsinissaminut
akuttunngitsumik periarfissaqarneq ajorpoq.
Taamaattoqartillugu § 37 malillugu
apeqquteqarnikkut siunnersuutip eqqarsaatigineqartup kingunerisassaasa
qulaajarneqarnissaannut siunnersuuteqartoq innersuunneqartarpoq.
Naalakkersuisut kisitsisitalersuinissaminnik iminneqartalissapput
Inatsisartut siulittaasoqarfiata siunnersuutigaa Inatsisartunut ilaasortat partiilluunniit aalajangiiffigisassatut siunnersuutaannut
Naalakkersuisut akissuteqaasiortassasut akissuteqaammilu siunnersuutip allaffissornikkut
aningaasatigullu kingunerisassai allaaserineqartassasut.
Ilaasortat partiillu aalajangiiffigisassatut siunnersuuteqartut ullumikkut pisussaaffeqarput
aalajangiiffigisassatut siunnersuutip aningaasatigut allaffissornikkullu kingunerisassaanik
allaaserinninnissaminnut. Ilusissanut piumasaqaat tamanna 2010-mi suleriaatsimut
ilanngunneqarpoq.
