INISSIALIORFIIT
Inatsisartuni tatiginninnginnermik taasisitsinissamik saqqummiussisoqarpoq
Atassut Naalakkersuisunut tatiginninnginnermik taasisitsisoqarnissaanik siunnersuummik saqqummiussaqarpoq, namminersornerullutik Oqartussat kommuunillu inissiaataannik attartortittakkanik inissiatut imaluunniit illutut nammineq pigisatut tigusisarneq pillugu Inatsisartut peqqussutaata allanngortinneqarnera pillugu Inatsisartut inatsisissaannik saqqummiussinermut atatillugu.
Naalakkersuisutip siunnersuutaa tassalu inissianik attartortittakkanik pigisanik piginnittunngortitsinissamut, amerlanerussuteqartut isumaqatigiissutigaat. Kisianni Atassut tamakkiisumik inissiaatileqatigiiffimmut tunngatillugu, Naalakkersuisunut tatiginnikkunnaarnermik ullumi oqaluuserisassamik saqqummiussaqarpoq.
Assi: (Toqqorsivik): Leiff Josefsen
Nutartigaq: Inuit Ataqatigiit aamma Siumut tatiginninnginnermik pinngitsoortitsiniarlutik allannguutissatut siunnersuummik saqqummiussipput, Demokraatit ineqarnermut naalakkersuisumut qingaliisoqarnissaanik piumasaqaatitalimmik taaseqataanngillat, Atassut aamma Naleraq Hans Peter Poulsenimut tatiginnginnerminnik aalajangiusimannillutik taasipput.
Inatsisartut ataatsimiittarfianni oqallinnerit unitsinneqarallarput.
Tamanna pivoq Atassut ineqarnermut attaveqaqatigiinnermullu Naalakkersuisunut ilaasortamut tatiginnikkunnaarnermik siunnersuuteqarmat tamanna tunngavigalugu ineqarneq pillugu aaqqissuussinermut tamarmiusumut Naalakkersuisullu taassuma piviusunngortinnissaanut pilersaarutaannut akerliunermik aallaavilimmik.
Tatiginninnginnermik taasisitsinissamik siunnersuut saqqummiunneqarpoq, Namminersornerullutik Oqartussat kommuunillu inissiaataannik attartortittakkanik inissiatut imaluunniit illutut nammineq pigisatut tigusisarneq pillugu Inatsisartut peqqussutaata allanngortinneqarnera pillugu Inatsisartut inatsisaatut siunnersuut siullermeerneqarmat
Atassut siullermik siunnersuutip suliarineqarnerata kinguartinneqarnissaa anguniarlugu misiliigaluarpoq, kisianni kissaatigineqartoq saqqummiunneqareermat Inatsisartullu partiivisa Naalakkersuisullu akornanni suli qisuariartoqanngitsoq akissuteqartoqanngitsorlu, parti tatiginnikkunnaarnermik siunnersuuteqarmat ataatsimiinneq unitsinneqarallarpoq.
Inatsisartut siulittaasuat, ataatsimiinnermi aqutsisuusoq naapertorlugu, ataatsimiinneq aallarteqqissaaq nal. 16:15.
