Inatsisartut Allattoqarfiat nutaamik pisortartaartoq

Inatsisartut Allattoqarfiat aggustip aallaqqaataani pisortartaassaaq.

Inatsisartut siulittaasuat Kim Kielsen (S) Inatsisartut nittartagaanni tusagassiuutinut nalunaarummi taama ilisimatitsivoq.

61-inik ukiulik Steen Lynge Inatsisartuni ilaasortaasimasoq pisortanngussaaq:

- Pisortanngortussaq tassaavoq Steen Lynge, ullumikkut Naalakkersuisut qitiusumik allaffeqarfissuanni suliffeqarnermut ilinniartitaanermullu immikkoortortami pisortaasoq. Steen Lynge taamaalilluni ilaatigut pisortat ingerlatsiviinit allaffissornermik misilittagaqarluarpoq Inatsisartunilu inatsisartutigoortumik sulinermik ilisimasaqarluarluni, tusagassiutinut nalunaarummi allassimavoq.

Steen Lynge ukiuni arlalinni politikimik suliaqarnikuuvoq, Naalakkersuisunut aamma ilaasortaanikuulluni. Ukiorpassuani pisortaanikoq Ellen Kolby Chemnitz soraarninngortoq taarserpaa.