Inatsisartut ataatsimiinnerat unitsinneqaqqippoq
Naalakkersuisunut tatiginnikkunnaarnissamik siunnersuuteqarnissamut isumaliutiginninnissamut piffissalerneqarnissaq Naleqqap piumasaraa.
Pele Broberg, Naleqqami siulittaasoq, ataatsimiinnermi unillatsiarnissamik noqqaavoq.
Toqqorsivimmit assi: Leiff Josefsen
Inatsisartut upernaakkut ataatsimiinnerat naggataarnersiorlugu ataatsimiinneq ingerlarsorfiuvoq.
Ataatsimiinneq nalunaaqutaq 11.00 aallartimmalli, aappassaanik tatiginninnginnermik taasititsisoqarmat ataatsimiinneq unitsinneqarpoq.
Nalunaaqutaq ataatsimut ataatsimiinnermi unillatsiarnissamik Naleqqap siulittaasua Pele Broberg noqqaavoq, Naalakkersuisunut tatiginninnginnermik partiimit taasititsiniarnerlutik misissuinissamut piffissaqarniarlutik.
Unillatsiarnissap kissaatigineqarnera ataatsimiinnermik aqutsisup Anders Olsenip akueraa. Unillatsiarnerup kingorna Naleraq Naalakkersuisunut siulittaasumik tatiginnikkunnaarnermik taasititsivoq.
Inummut ilanngaat oqallisaasoq
Naalakkersuisut siulittaasuata Múte B. Egedep (IA) oqaluttarfimmiinnerani akitsuutit appartinneqarnissaannik oqaluuserisassaq oqaluuserineqartillugu oqallinneq aallartippoq.
Naleraq naapertorlugu Múte B. Egede inummut ilanngaammut tunngatillugu eqqunngitsumik paasissutissiivoq, taamaattumillu partii tatiginnikkunnaarnissamik taasititsivoq.
Inummut ilanngaat 48.000 koruuniniit 60.000 koruuninut qaffanneqarnissaat Naalakkersuisoqatigiit akileraartarnermut aaqqissuusseqqinneranni siunnersuutigineqarpoq.
Inummut ilanngaat aatsaat Inatsisartut upernaakkut ataatsimiinneranni appartinneqarsinnaavoq, Pele Broberg, inatsisinut innersuussisoq, oqarpoq. Ilanngaatip qanoq appartinneqarsinnaanera pillugu Múte B. Egede kukkusumik oqaaseqarsimasoq, Pele Broberg isumaqarpoq.
- Paatsoorneqarsinnaasumik oqaaseqarsimavunga
Pipaluk Lyngelli IA-meersup oqaluttarfikkut pinngitsoortitsinissamik amerlanerussuteqartut taasinissaannik siunnersuummik saqqummiussivoq, Naalakkersuisullu siulittaasuat amerlanerussuteqartunit suli tatigineqartoq erseqqissaalluni.
Múte B. Egedep oqaaserisimasami ilai ajuusaarutigai:
- Paatsoorneqarsinnaasumik oqaaseqarsimavunga, Múte B. Egede (IA) oqarpoq, Naalakkersuisullu matoqqasumik aqutsinerarlugit Naleqqap oqarnera narrujuummissutigisimallugu taassuma aamma erseqqissarpaa.
Múte B. Egedep ajuusaarluni oqaaseqarnerata kingorna tatiginnikkunnaarnermik taasititsineq Demokraatit tapersersornavianngikkaat, Demokraatit siulittaasuat Jens-Frederik Nielsen oqarpoq.
Ullumikkut ataatsimiinneq aappassaanik unitsinneqarpoq. Naalakkersuisumut Naaja H. Nathanielsenimut tatiginninnginnermik Naleqqap taasititsinissaa oqaluuserineqarniassammat, siusinnerusukkut politikkerit ataatsimiittarfimmit aniapput. Tatiginninnginnermik taasititsineq IA-mit Siumumillu itigartitsissutaavoq.
