18-inik ukiulik Ivana Nikoline Brønlund panimminik Aviaja-Luunamik ataasinngornerup siuliani erniniariarluni arsaagaavoq.
Angajoqqaatut piginnaasanik nalilersuinermi tarnip pissusaanik misissuutit tunngavigalugit arsaarinnittoqarnissaa aalajangerneqarpoq. Taamaaliornikkut kommuni inatsimmik unioqqutitsivoq, inatsimmi nutaaq maajip aallaqqaataani 2025-mi atuutilersoq tunngavigalugu ilaqutariinnut kalaallinit kingoqqisunut misissuutit tamanut atorneqartartut atoqqusaanngillat. Immikkut ittumik siunnersuisarfik ilisimasanillu katersuiffimmiittoq (VISO) kalaallit kulturiannik oqaasiinillu immikkut ilisimasallit kommunip attaveqafigisussaagaluarpai.
18-inik ukiulik Ivana Nikoline Brønlund panimminik Aviaja-Luunamik ataasinngornerup siuliani erniniariarluni arsaagaavoq.
Angajoqqaatut piginnaasanik nalilersuinermi tarnip pissusaanik misissuutit tunngavigalugit arsaarinnittoqarnissaa aalajangerneqarpoq. Taamaaliornikkut kommuni inatsimmik unioqqutitsivoq, inatsimmi nutaaq maajip aallaqqaataani 2025-mi atuutilersoq tunngavigalugu ilaqutariinnut kalaallinit kingoqqisunut misissuutit tamanut atorneqartartut atoqqusaanngillat. Immikkut ittumik siunnersuisarfik ilisimasanillu katersuiffimmiittoq (VISO) kalaallit kulturiannik oqaasiinillu immikkut ilisimasallit kommunip attaveqafigisussaagaluarpai.
Kommuni utoqqatsertoq
Qallunaat isumaginninnermut ineqarnermullu ministeriata Sophie Hæstorp Andersenip Høje-Taastrup Kommunemut suliap qanoq ingerlasimanera pillugu paasissutissanik piumallunilu, Sermitsiamit apersorneqarnermini isumakulunnini oqaatigereeraalu kommuni utoqqatserpoq. VISO januaarip qaammataani attaveqarfigisimallugu paasissutissiipput, inatsillu tunngaviusoq maajimi atuutilernerata kingorna attaveqaqqissimanatik nassuerutigalugu.
Meeqqamik arsaarinninniarluni aalajangiinerup atuutsinneqarsinnaanngitsutut nalilerneqarnissaa atorunnaarsinneqarnissaaluunniit maanna sukataarutigigitsik, Ivana Nikoline Brønlundip eqqartuussissuserisua Jeanette Gjørret Stage Advokatfirmameersoq oqarpoq.
Høje-Taastrup Kommunemit utoqqatsertoqarnerata kingorna Ivana Nikoline Brønlund, arnaa Gitte Brønlund eqqartuussissuserisorlu Jeanette Gjørret kommunimik ataatsimeeqateqarput, tassani eqqartuussissuserisup piumasaqaatai saqqummiunneqarlutik.
- Kommunimiilli kukkuneq pillugu Meeqqanut Inuusuttunullu Ataatsimiititamut nalunaarutiginninnissaq naammattoq isumaqarput, Jeanette Gjørret oqarpoq.
Piumasaqaat pinngitsoorani malinneqartussaq
Meeqqat pillugit inatsit §171-imi imm. 1 naapertorlugu angajoqqaat oqartussaassuseqartut imaluunniit uani pineqartumi angajoqqaanngortussat ”Kalaallit Nunaanni inunngorsimappat peroriartorsimappat imaluunniit kalaallit oqaasiinut, kulturiannut naleqartitaannullu attuumassuteqarpat” kommunip VISO-p immikkoortortaqarfia immikkut ittoq suliami ilannguttussaagaa” Aarhus Ilisimatusarfiani inatsisilerinermik professori Caroline Adolphsen Sermitsiamut oqarpoq.
Inatsimmik taama ingasatsigisumik unioqqutitsisoqarpat aalajangiineq atorsinnaanngitsutut nalilerneqassaaq, tassa atuutsinneqarsinnaanani. Meeqqanut inuusuttunullu ataatsimiititaliaq meeqqap inissinneqarnissaanik piaartumik aalajangiinngippat meeraq anaanaminut angerlartinneqartussaavoq”, Aarhusip Ilisimatusarfiani inatsisilerinermik professori Caroline Adolphsen allappoq.
Assi: Aarhus Universitet
"Suliaq pillugu ima ilisimasaqartiginngilara taanna atuunnersoq nalilissallugu. Kommunilli taama naliliisimanera naatsorsuutigisinnaavarput – taamaanngippammi kommunip ukiup aallartinnerani VISO-p attaveqarfigisimagaluaraa eqqaaneqarsimassanngikkaluarpoq" Caroline Adolphsen oqarpoq, erseqqissarpaali meeraq pineqartoq arsaarinnissutigineqassanersoq arsaarinnissutigineqassannginnersorluunniit oqaaseqarfigisinnaanagu. Inatsisit kisiisa pillugit oqaaseqarsinnaalluni.
”Anaananngortussap angajoqqaatut piginnaasaanik nalilersuinermi VISO-mi immikkoortortaqarfiup immikkut ittup peqataatinneqarnissaa pinngitsoorani piumasaqaataammat, qularutissaanngilaq inatsisinik unioqqutitsisoqarsimassasoq. Inatsimmik taama ingasatsigisumik unioqqutitsisoqarpat aalajangiineq atorsinnaanngitsutut nalilerneqassaaq, tassa atuutsinneqarsinnaanani. Meeqqanut inuusuttunullu ataatsimiititaliaq meeqqap inissinneqarnissaanik piaartumik aalajangiinngippat meeraq anaanaminut angerlartinneqartussaavoq. Inatsilli nutaaq suli atuutilinngitsoq VISO-p saaffigineqarnikuunera pissutigalugu aalajangernerup atuukkunnaarsivinneqannginissaanut tunngavilersuutaasinnaanera aamma ilimanaateqarsinnaavoq. Tamanna kalaallit oqaasiinut, kulturiannut naleqartitaannullu tunngatillugu pissutsit immikkut ittut qanoq isigalugit ilanngunneqarnersut, aamma suut misissorneqarsimanersut apeqqutaapput", Caroline Adolphsen allappoq.
Meeqqanut inuusuttunullu ataatsimiititaliap Ivana Nikoline Brønlundimut tunngatillugu aalajangiinera Danmarkimi naammagittaalliuuteqartarfimmi septembarip 16-iani aalajangiiffigineqassaaq.
Assi: Christian Lindgren/scanpix
Kukkunerup kinguneri
Suliamik ingerlatsinermi kukkunerit ingasattut isumaqanngillat meeraq anaanaminut angajoqqaaminullu angerlarteqqinneqassasoq, inatsisilerinermili professori oqarpoq. Kommunip kingorna paasissutissanik eqqortumik katersuisinnaanera apeqqutaavoq.
"Kukkusoqarsimagaluarpalluunniit – aamma ingasattumik – imaanngilaq meeraq angerlarsimaffiup avataanut inissinneqarsinnaanngitsoq imaluunniit inissinneqassasoq. Kommuni paasissutissanik eqqortumik tunngavilersuippat, angerlarsimaffiup avataanut inissiisoqarsinnaassaaq. Angajoqqaajusup kukkusoqarneranik eqqugaanera imaanngilaq meeqqap angerlaqqinnissaanik kinguneqassasoq", Caroline Adolphsen allappoq.
Ivana Nikoline Brønlundimut tunngasumik qanoq sulisoqarsimaneranut nalunaarusiaq, Høje-Taastrup Kommunep isumaginninnermut ineqarnermut ministeriaqarfimmit kingusinnerpaamik aggustip 29-ani tunniutissavaa.
