Inatsisinut ataatsimiititaliaq: Kommunit aaqqissugaanerat misissorneqartariaqarpoq
Kommunitoqqanut utertoqassappat allaffissornikkut ingerlatsinermut aningaasartuutit pillugit ukiup naannginnerani Naalakkersuisut nassuiaammik piareersaateqassasut, Inatsisartut inatsisinut ataatsimiititaliaanni isumaqatigiissutigineqarpoq.
Kommunit aaqqissugaanerat 2009-mi allanngortinneqartup utertinneqarnissaa qanoq akeqassanersoq misissorniarlugu Naalakkersuisut nalunaarusiortariaqarput.
Leiff Josefsen
Kommuninik aaqqissuusseqqinnerup kingulliup 2009-meersup atorunnaarsinneqarnissaa qanoq akeqassanersoq misissuisoqarnissaanik Atassummi ilaasortap Aqqalu C. Jerimiassenip siunnersuutaa tapersersorneqarpoq, taamanikkut kommunit kattunneqarnerat iluatsilluarsimanersoq qularnarmat.
Inatsisinut ataatsimiititaliap isumaliutissiissutini saqqummiuteqqammerpaa, IA-llu allannguutissatut siunnersuutaa tapersersorlugu, tassani nassuiaat pinngitsoorani ukioq manna aappaaguunngitsorlu suliarineqassasoq kissaatigineqarpoq.
- Innuttaasut sapinngisamik pitsaanerpaamik atugassaqarnissaat qulakkeertuarumallugu iliuusissatut ingerlanneqartut misissuiffigineqarnissaat ataatsimiititaliamit tapersersorneqarpoq. Kommunit aaqqissugaanerannik naliliissut 2024-mi Inatsisartut ukiakkut ataatsimiinneranni agguaanniarneqartoq ataatsimiititaliamit maluginiarneqarpoq. Oqartussaaqataaneq innuttaasunullu sullissineq pillugit innuttaasut misilittagaat nalilersuinermi aallaavigineqassapput. Siunnersuut naliliinerlu kommunit aaqqissugaanerisa isumaliutigineqaqqinnissaannut tunngavissaalluassasut ataatsimiititaliaq isumaqarpoq, isumaliutissiissummi allassimavoq.
Ukioq naallugu sulisorisap 500.000 kr.-it
missaannut naapertuuttup iluani AC-fuldmægtimit ataatsimit nassuiaat suliarineqarsinnaassasoq missingerneqarpoq.
Siunnersuut Inatsisartut ataatsimiittarfianni maajip 23-ani aappassaaneerneqassaaq.
