KL

DK

ANGERLARSIMAFFIUP AVATAANUT INISSIISARNEQ

Inatsisissatut siunnersuut erngertumik tusarniaassutigineqartoq

Inatsisissatut siunnersuut, Danmarkimi kommunit ilaqutariinnik kalaallit meerartaannik angerlarsimaffiup avataanut inissiiniarnermi suliani tarnip pissusaanik misissuutinik akerleriissutaasunik atorunnaarsitsinissamik siunertalik, februaarip 17-iata tungaanut tusarniaassutigineqarpoq.

Inatsissatut siunnersuut kommunit meeqqanik angerlarsimaffiup avataanut inissiinermut atatillugu tarnip pissusianik misissuutit atorunnaarsissinnaanerannut qallunaat naalakkersuisunut periarfissiisoq februaarip 17-iata tungaanut tusarniaassutigineqarpoq.
Trine Juncher Jørgensen
TUSAGASSIORTOQ / JOURNALIST
Saqqummersinneqarpoq

Isumaginninnermut Ineqarnermullu ministerip inatsisissatut siunnersuut februaarip 17-iata tungaanut tusarniaassutigaa. Inatsisissatut siunnersuutip pingaaruteqassusia nukinginnarneralu pissutigalugu piffissaq sivikitsoq atorlugu tusarniaasoqartoq ministeriaqarfik oqaaseqaatini tunngavilersuivoq.

Qallunaat naalakkersuisuisa kommunit tarnip pissusaanik misissuutinik isorineqaqisunik atuinerat inatsisissatut siunnersuut akuerineqarpat unitsissinnaalissavaat. Misissuutit taakku immikkut ilisimasallit eqqartuussissuserisullu eqqunngitsunik takussutissiisartut isorinikuuaat.

Suliassaqarfimmik immikkut ittumik pilersitsisoqartoq

Isumaginninnermut ineqarnermullu aqutsisoqarfimmi immikkoortortaqarfimmik immikkut ittumik VISO-mik (Nuna tamakkerlugu ilisimasanik immikkut ittumik siunnersuisarfik) kalaallisut oqaasilinnik kulturiannillu ilisimasalinnit suliani ikiuisoqarsinnaanngorlugu kommuninut piumasaqaateqartoqarnera Inatsisissatut siunnersuutip ilaatigut imaraa.

Suliani meeqqat inuusuttuaqqalluunniit ilaqutariinnit kalaallineersut angerlarsimaffiup avataanut inissiisoqartariaqarnerani kommunip paasiniarnerani, angajoqqaanut meeqqamulluunniit tarnip pissusaanik misissuiffissaraluani suliassaqarfimmi immikkut ittumik atuisarnissaanik inatsit pisussaaffiliisoq inatsisissatut siunnersuummi erseqqissarneqarpoq. Suliassaqarfik tarnip pissusaanik misissuinermi ikiuissasoq tusarniaanermut allakkani allassimavoq.

Suliat misissorneqartut

Aammattaaq meeqqanik angerlarsimaffiup avataanut inissiiniarnermi suliani maanna ingerlasuni tarnip pissusiinik misissuutit kalaallit oqaasiinut kulturiannullu naleqqussarneqarsimanngitsut atorneqarsimappata suliaq misissorneqassasoq inatsisissatut siunnersuutigineqartup ilagaa.

Suliani taamaattuni suliassaqarfik naliliineq ataatsimut isigalugu suliarissavaa. Tassa angerlarsimaffiup avataanut inissiisoqarnerani aalajangiisimanerup allanngortinneqartariaqarnera naliliiffigineqarpat kommunalbestyrelsip imaluunniit Inuusuttuaqqat Pinerluuteqartartut Ataatsimiititaliaata naliliinerminni atorsinnaasaannik.

Inatsissatut siunnersuut naapertorlugu tamanna Danmarkimi kalaallit ilaqutariit meeqqaminnik inuusuttuaraatiminnilluunniit arsaagaareersimasut inatsisitigut isumannaatsuunerulernissaannut annertusaataassalluni,.

Inatsisissatut siunnersuut arlalinnut tusarniaassutigineqarpoq, ilaatigut Meeqqanut Inuusuttunullu Naalakkersuisoqarfimmut, Kalaallit Illuutaannut, Inuit Pisinnaatitaaffii pillugit Siunnersuisoqatigiinnut, SILA 360-imut, Peqatigiiffik Kalaallit Meerartaannut aamma Peqatigiiffik Mentor Immanuelimut.

social- og boligministeriet psykologiske tests lovforslag inuiaqatigiit grønlandske familier viso samfund

ATORFIIT Se alle jobs

Powered by Labrador CMS