Ineqarnermut akiliutit appartinnissaanut suliassanngortitsiniartut
Qeqqata Kommuniani ineqarnermut akiliutit appartinneqarnissaanut siunnersuut kommunalbestyrelsimit tamanit isumaqatigineqarpoq. Taamaattumik inissianut qaammammut akiliutit appartinnissaanut tunngatillugu borgmesteri Naalakkersuisunut Inatsisartunullu suliassanngortitsinissamut allagaqassaaq.
Dorthea Reimer-Johansen
Barnabas Larsenip, Qeqqata Kommuniani kommunalbestyrelsimut ilaasortap kommunalbestyrelsip ataatsimiinnerani sisamanngornermi inissianut akiliutit appartinnissaanut siunnersuutini ullumi saqqummiuppaa.
Taassuma siunnersuutigaa kommuni Inatsisartunut Naalakkersuisunullu ineqarnermut akiliutip appartinnissaanut suliassanngortitsissasoq, taamaalilluni inissianut akiliutit apparpata innuttaasut aningaasaqarnermigut pitsanngorsaavigineqassallutik.
Suleqatigiit illuatungiliuttullu taamaalillutik siunnersuummut isumaqatigiipput.
- Siunnersuuteqartoq isumaqatigaarput. Inuuniarnermut tunngassuteqartut ukiuni kingullerni qaffakkaluttuinnarnerat
pissutigalugu nunatsinni innutaasut akissaatikinnerusut atugaat
oqimaalligaluttuinnartut malunnarmat, taamaattumik siunnersuuteqartoq suleqatigiinniit
isumaqatigaarput, Gideon Lyberth (S) ataatsimiinnermi oqarpoq nangillunilu:
- Isumaqatigaarput nunatsinni inuuniarnikkut oqilisaassusisoqarnissaa borgmesteri
kommunalbestyrelsi sinnerlugu Naalakkersuisunut saaffiginnissuteqassasoq.
Tupinnarpoq, isumaqatiginarporli
Kommunalbestyrelsimi illuatungiliuttuusut, Naleraq, siunnersuummut aamma isumaqataavoq. Kommunalbestyrelsimulli isornartorsiuivoq.
Karl Lyberth (N) isumaqarpoq nammineq inissiat akiisa apparneqarnissaanut 2021mi siunnersuuteqarsimallutik. Ilaatigullu oqaatigalugu kommunalbestyrelsi imminut assortortoq ineqarnermut akiliut ukiut tamaasa 2%-imi qaffattarlugu maanna apparnialermassuk. Kisiannili inissiat apparnissaat kissaatigigamikku siunnersuummut isumaqataapput.
Nuna tamakkerlugu iluarsaartuussinissaq kinguaattooqqasoq
Qeqqata Kommuniani inissianut qaammammut akiliutit ukiumut 2%-inik qaffanneqartarput. Tassani inissiat aserfallatsaaliorneqarnissaat qulakkeerniarlugu akitsuisarlutik.
Inigisamut akiliutip 3-5 procent akornanni qaffaanissamut illut aserfallannginnissaanik aserfallatsaaliinissap qulakkeerneqarnissaanut ininut akit qaffanneqarnisaat pisariaqartitavimmik A/S INI siusinnerusukkut nassuiaanikuuvoq.
Qeqqata Kommuniani allaffeqarfik naliliivoq, sanaartornermut aserfallatsaaliinermullu aningaasartuutit annertussusaat eqqarsaatigalugit ineqarnermut akiliut nunatsinni ukiuni amerlasuuni appasippallaartinneqarsimasoq, tamatuma kinguneralugu illut pisortanit pigineqartut iluarsartuunneqarnissaannut ullumikkut 2,5 mia. koruuninik kinguaattoqqaneq.
Inissiat siunissami akitigut qaammammut appartinneqarpata siunissami inissianut akiliutit appasippallaannginnissaat qanoq qulakkeerneqassanersoq Sermitsiap paasiniarlugu sulissutigaa.