NAMMINEQ ANINGAASAQARNIARNEQ
Ineqarnermut taarsigassarsiatit allanngortikkukkit ima sipaaruteqarsinnaatigivutit
5 procentimik 6 procentimilluunniit ernialimmik realkreditimik taarsigassarsiallit ilaat taarsigassarsiamik allanngortitsinikkut aningaasarpassuarnik sipaarsinnaapput. Pissutsilli arlallit eqqumaffigineqartariaqarput.
Taarsigassarsiani nutaani taarsigassarsiat nunguffissaat allanngortinneqanngippat ineqarnermullu taarsigassarsiat allanngortinneqarpata, katillugit 6 procentit, tassa 300.000 koruunit sinnerlugit sipaarneqarsinnaapput.
Assi: Grønlandsbanken
Qaammatini kingullerni ineqarnermut taarsigassarsianut erniat appariartorput, tamannalu ingammik illuutilinnut iluaqutaasinnaavoq.
Ineqarnermut taarsigassarsiat allanngortinneqarpata qaammatit tamaasa aningaasat qanoq amerlatigisut sipaarneqarsinnaanerinik, Grønlandsbanken Sermitsiamut marlunnik naatsorsuusiorsimavoq.
Ineqarnermut taarsigassarsiat 2 millionit koruunit missaannik nalillit, ullumikkut 6 procentimik 5 procentimillu erniallit, tunngavigineqarput. Taarsigassarsiat nunguffissaat allanngortinnagu taarsigassarsiaq allanngortikkukku, qaammammut 800 koruuninik 400 koruuninilluunniit sipaaruteqassaatit.
Katillugit aningaasat sipaagassat
Taarsigassarsiat atuunnerata ingerlanerani aningaasat qanoq amerlatigisut sipaarneqarsinnaanersut misissoraanni, taarsigassarsisullu allanngortitsinermut aningaasartuutai ilanngaatigereerlugit, sipaarutissat missingersuutip aappaani 325.000 koruuniussapput, aappaanilu 115.000 koruuniussallutik.
Oktobarip aappaani taarsigassarsiat allanngortinneqarneranni naatsorsuinerit takukkit. Erniat ullut tamaasa allanngorsinnaasarmata naatsorsueriaaseq uani takussutissaasoq allannguuteqarsinnaavoq:
Paasissutissiisoq: Grønlandsbanken
Grønlandsbankenip paasissutissiissutigaa aningaasartuutit tassaasut aningaaseriviup taarsigassarsiniartarfiullu taarsigassarsianik nutaanik aaqqissuussinermut tunngatillugu suliarinninnerat (suliassat suliarineqarnerat, aningaasartuutit il.il.). Tamatumunnga ilanngullugu qularnaveeqqut, taarsigassarsiap nutaap nalunaarsugaalernissaata tungaanut taarsigassarsiap pingaarnerusup 1,5 procentianik naleqartoq. Grønlandsbankenip naatsorsuinermini ukiup affaanut takussutissatut akiliut tunngavigaa, tamannali sivikinnerusinnaavoq taamaalillunilu akikinnerusinnaalluni.
"Taarsigassarsiaqarneq tamaat eqqarsaatigalugu allanngortitsineq isumassaqarnersoq takujumallugu ullumikkut naliusoq sakkussaq pitsaanerpaajusoq," Grønlandsbankenimi Sullissisunut Pisortaq Jimmi Johannesen oqarpoq.
Pissutsit immikkuullarissut
Ineqarnermulli taarsigassarsiat allanngortinnissaat isumassaqarpat maluginiagassaqarpoq.
- Soorunami taarsigassarsiaq ukiuni arlalinni atuutiinnassaaq (taarsigassarsiammi taakku marluk nungunnissaata tungaanut atuutiinnarpata aningaasat sipaarutaasut taama amerlatigissapput), taarsigassarsiamilli allannguuteqarneq aningaasartuutinik annertuumik atuinermik kinguneqarsinnaavoq, assersuutigalugu inissiaq ukiut arlaqanngitsut ingerlaneranni nuunniarnermi tuniniarniaraanni, Jimmi Johannesen oqarpoq.
Sullissisunut Pisortaq oqarpoq atuisut ilaat qaammammut akiligassaminnik sipaaruteqarnerpaasinnaasut oqaloqatigineqalereersut.
- Pisariaqarsorigutsigu soorunami aningaaseriviup illuutaanik piginnittut tamaasa attaveqarfiginiarsarissavavut, neriorsuivoq.
