Inissiaatileqatigiiffiup pisortaata akissarsiani millionilikkaanik qaffappai

2 millionit koruunit. Namminersorlutik Oqartussat inissiaatileqatigiiffianni INI A/S-imi pisortaaneq Henrik Rafn siorna taama akissarsitinneqarpoq. Tamanna 2023-mut ukiumoortumik naatsorsuutaani takuneqarsinnaavoq.

Kalaallit Nunaanni inissiaatileqatigiiffiit annersaanni pisortaanerup akissarsiaasa qaffasissusiat immikkut ilisimasalimmit sakkortuumik isornartorsiorneqarpoq.

Kurt Klaudi Klausen, Syddansk Universitetimi pisortat aaqqissuussaanerannik aqutsineranillu professoriusoq, pisortat akissarsiaat qaqutigoortumik qaffasissutut oqaatigineqarsinnaasut isumaqarpoq. Akissarsiat akisussaaffimmut piginnaasanullu naapertuuttariaqarput, oqarpoq.

- Inissiaatileqatigiiffiup pisortaata kommunimi pisortat akissarsiaat assigai, pisortaasullu taakku aningaasaqarnikkut sulisunullu tunngatillugu akisussaaffeqarnerusarput.

- Suliffeqarfimmi 9.000-it missaannik ininik attartortitsisarfiusumi akissarsiai qaffasilluinnarput. Inissiaatileqatigiiffiup pisortaa 2 million koruuninik akissarsiaqarpat tamanna qaffasippallaarpoq. Suliffeqarfik namminersortuunngilaq, professori Kurt Klaudi Klausen Sermitsiamut oqarpoq.

Professori: - Naapertuuttutut isigiuminaappoq

INI-p 2023-mut naatsorsuutai naapertorlugit agguaqatigiissillugu ulloq naallugu sulisut 155-iupput. Sisimiuni qullersaqarfimmi allaffissornikkut aningaasaqarnikkullu suliassani 29-t sulisuupput.

Inissiaatileqatigiiffik, siorna 98 millionit koruuninik kaaviiaartitaqartoq, immikkoortortaqarfinni 40-ni inissianik attartortittakkanit 8.600-t missaanniittunik aqutsisuuvoq.

Inissiat 5.700-t missaanniittut Namminersorlutik Oqartussanit pigineqarput.

Sulisut amerlassusaat eqqarsaatigalugu pisortaq allaffissornikkut aqutsinermillu annertuumik akisussaaffeqanngilaq. Suliffeqarfillu aningaasaqarluartuuvoq aqunneqartariaqartumik, kisianni aamma taama annertutiginngilaq, Kurt Klaudi Klausen naliliivoq.

- Ukiumut 2 millionit koruuninik akissarsiaqarneq akissarsianut qaffasissunut ilaavoq, naapertuilluartuunersorlu takujuminaappoq.

- Inissiaatileqatigiiffimmik ingerlatsissagaanni aqutsinermik immikkut piginnaasaqarnissaq pisariaqanngilaq, ingerlariusermi ataasiinnaavoq.

- Kalaallit Nunaanni inissiaatileqatigiiffiup pisortaa qallunaat ilinniarnertuunngorniarfianni pisortatut akisussaaffeqarpoq. Danskit kommunianni pisortaq 3.000-init 4.000-inut sulisulik 3,5 milliardit koruuninillu missingersuuteqartoq ukiumut 2 millionit koruunit sinnernagit isertitaqartarpoq. Inissiaatileqatigiiffiup pisortaa siulersuisunut akissarsiassanik pitsaasunik isumaqatiginninniarnermik pikkoriffeqarsimassaaq, Kurt Klaudi Klausen isumaqarpoq.

Siulittaasup akissutai

Inissiaatileqatigiiffiup siulersuisuini siulittaasup Mads Barlach Christensenip professorip isumaa assiginngilluinnarpaa.

Siulittaasoq aperivarput sooq pisortaq Henrik Rafn ukiumut 2 millionit koruuninik akissarsisarnersoq.

- Akissarsiaasa nalilersorneqarneranni pisortap piginnaasai suliassaalu, sulisut amerlassusaat inissiaatileqatigiiffiullu kaaviiaartitai apeqqutaapput. Ilinniarluarsimasuuvoq ukiorpassuarnilu atorfeqarsimalluni. Tamakku tamaasa eqqarsaatigalugit aningaasarsiai naleqquppoq. Qularnanngilluinnarpoq. Akissarsiai siulersuisuniit ajorinngilluinnarpagut, Mads Barlach Christensen oqarpoq.

Siulersuisoqatigiit millioninik tunineqarput

INI-mi siulersuisut katillugit millionit koruunit missaannik siorna akissarsipput. Professorip tamanna aamma isornartoqartippaa.

- Siulersuisunut ilaasortat aningaasarsiatik namminneq aalajangertarpaat. Politikerit assigalugit, Kurt Klaudi Klausenip eqqaavaa.

Siulittaasup Mads Barlach Christensenip saniatigut siulersuisunittut tassaapput: Siulittaasup tullia Aviaaja Karlshøj Knudsen, Kristian May aamma Johanne L. Knudsen. Taakku ataatsimeersuarnermi tamarmik qinigaapput.

Siulersuisuni siulittaasup Mads Barlach Christensenip allaaserisaq e-mailikkut tiguaa, professorilli siulersuisunut ilaasortat akissarsiaannik isornartorsiuinera oqaaseqarfigerusunngilaa.

Qallunaat inissiaatileqatigiiffiini pisortat akissarsiaat

Danmarkimi inissiaatileqatigiiffinni pisortat akissarsiatik 1 millionit koruunit 2 millionit koruunillu akornanni qaffassimagaat Jyllands-Postenip 2021-mi qulaajaaffigaa. Inissiaatileqatigiiffinni pisortanit 151-iusunit 82-it akissarsiatik paasissutissiissutigaat. 13-it 1,5 millionit koruunit sinnerlugit aningaasarsiaqarput. Taakkunannga arfinillit 2 millionit koruunit sinnerlugit aningaasarsisarput.

Jens Elmelund KAB Boligimi, Danmarkimi inissiaatileqatigiiffiit annersaanni 66.000-inik attartortittakkamik inissiaateqartumi, pisortaasoq, siorna 2,4 millionit koruunit missaannik akissarsivoq.